កំពង់ចាម៖ សម្ភារៈបរិក្ខារសម្រាប់បំពាក់ស្ទូឌីយោ ផលិតមាតិកាអប់រំឌីជីថល និងមាតិកាអប់រំលើបណ្ដាញ ព្រមទាំងកុំព្យូទ័របន្ទះ (Tablets) ចំនួន ១៨០ គ្រឿង ក្រោមជំនួយឧបត្ថម្ភពីសំណាក់មន្ទីរអប់រំក្រុងប៊ូសាននៃសាធារណរដ្ឋកូរ៉េ ត្រូវបានប្រគល់ជូនអង្គភាពជំនាញ និងសាលារៀនគោលដៅ ដើម្បីលើកកម្ពស់ និងបញ្ជ្រាបការសិក្សាផ្នែកបច្ចេកវិទ្យាព័ត៌មានក្នុងកម្មវិធីអប់រំ ព្រមទាំងដើម្បីបណ្ដុះធនធានមនុស្សប្រកបដោយសមត្ថភាព សម្របខ្លួននឹងសម័យឌីជីថល ខណៈដែលវិទ្យាសាស្ត្រកំពុងរីកចម្រើនឥតឈប់ឈរ និងដើរតួនាទីយ៉ាងសំខាន់ក្នុងការអភិវឌ្ឍន៍លើគ្រប់វិស័យ។
ពិធីនេះត្រូវបានរៀបចំឡើងក្រោមអធិបតីភាព ឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នាព្រឹកថ្ងៃសៅរ៍ ៨ កើត ខែចេត្រ ឆ្នាំកុរ ឯកស័ក ព.ស.២៥៦២ នៅវិទ្យាល័យ សម្ដេច ហ៊ុន សែន ពាមជីកង ខេត្តកំពង់ចាម។
បន្ទាប់ពីបញ្ចប់ពិធីសម្ពោធដាក់ឱ្យប្រើប្រាស់សម្ភារៈបច្ចេកវិទ្យាទាំងនោះ ឯកឧត្ដមរដ្ឋមន្ត្រី អមដោយថ្នាក់ដឹកនាំក្រសួង និងប្រតិភូនៃសាធារណរដ្ឋកូរ៉េ ក៏បានចុះពិនិត្យសកម្មភាពសិក្សារបស់សិស្សានុសិស្ស ក្នុងការរៀនប្រើប្រាស់កុំព្យូទ័របន្ទះ នៅវិទ្យាល័យ សម្ដេច ហ៊ុន សែន ពាមជីក។ ក្នុងឱកាសនោះឯកឧត្ដមបណ្ឌិតបានផ្ដាំផ្ញើដល់សិស្សានុសិស្សឱ្យខិតខំប្រឹងប្រែងរៀនសូត្រ រៀនប្រើប្រាស់សម្ភារៈបច្ចេកវិទ្យាទាំងនោះ ដែលជាឧបករណ៍ដ៏សំខាន់ក្នុងការលើកកម្ពស់គុណភាពនៃការសិក្សាប្រកបដោយប្រសិទ្ធភាព។
សូមជម្រាបថា អង្គភាព និងសាលារៀន ដែលទទួលបានសម្ភារៈបច្ចេកទេសផ្នែកព័ត៌មានវិទ្យា រួមមាននាយកដ្ឋានបច្ចេកវិទ្យាព័ត៌មាន វិទ្យាល័យ សម្ដេច ហ៊ុន សែន ពាមជីកង សាលាបឋមសិក្សាអង្គរបាន សាលាបឋមសិក្សាព្រះនរោត្ដម និងសាលាបឋមសិក្សាវត្តបូព៌៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]