“Hello គ្រូពេទ្យ” ធ្លាប់ប្រាប់ហើយ អាហារពេលព្រឹក គឺសំខាន់ណាស់សម្រាប់ទ្រទ្រង់សុខភាពរាងកាយ បើមិនញ៉ាំអាចធ្វើឲ្យប៉ះពាល់ដល់បេះដូង ស្លាប់មុនអាយុទៀតផង។ ប៉ុន្តែគ្នាយើងធ្លាប់ដឹងថា អាហារពេលព្រឹកបែបណាគួរញ៉ាំ ឬមិនគួរញ៉ាំអត់? អត្ថបទនេះ នឹងប្រាប់គ្នាយើងឲ្យដឹងច្បាស់អាហារពេលព្រឹកមិនគួរញ៉ាំ។
១- ពពួកនំដុត
ភាគច្រើនយើងធ្លាប់ឃើញគេញ៉ាំអាហារប្រភេទនេះតែក្នុងភាពយន្ដដូចជា ការញ៉ាំនំដូណាត់សម្រាប់ធ្វើជាអាហារពេលព្រឹក។ ញ៉ាំបែបនេះមិនខុសនោះទេ ប៉ុន្តែក៏ជម្រើសអាក្រក់បំផុត។ នំដូណាត់ និងពពួកនំដុតដទៃផ្សេងទៀត គឺសុទ្ធតែផ្ទុកជាតិស្ករច្រើន មិនសូវមានផ្ទុកជាតិសរសៃ ឬគ្មានសោះតែម្ដង អាចធ្វើឲ្យជាតិស្ករក្នុងឈាមឡើងខ្ពស់។ បើយើងចង់ញ៉ាំរបស់ផ្អែមៗនៅពេលព្រឹក គួរតែជ្រើសរើសយកនំផ្អែមមានជាតិសរសៃច្រើនដូចជា ផ្លែប៉ោម ផ្លែសារី ឬចេកជាដើម។
២- ទឹកផ្លែឈើ
ទឹកផ្លែឈើ ស្ដាប់ទៅដូចជាល្អសម្រាប់សុខភាព ដោយសារតែវាមានផ្ទុកវីតាមីនច្រើនប្រភេទ គឺជាជម្រើសដ៏ល្អ បើយើងជ្រើសរើសយកទឹកផ្លែឈើស្រស់ៗមកផឹក។ ប៉ុន្តែពពួកទឹកផ្លែឈើដប ឬកំប៉ុងទិញពីផ្សារ ឬតាមតូបចាប់ហួយ គឺសុទ្ធតែផលិតឡើងដោយដាក់ជាតិស្ករគេបម្លែងរួច បន្ថែមរសជាតិសប្បនិម្មិត និងបន្ថែមពណ៌ ដូចនេះទឹកផ្លែឈើទាំងអស់នោះ មិនសូវមានវីតាមីន ឬសារធាតុបំប៉នច្រើននោះទេ។ លើសពីនេះ ដោយសារតែនៅក្នុងទឹកផ្លែឈើដប ឬកំប៉ុនមានផ្ទុកជាតិស្ករច្រើន និងធ្វើឲ្យប៉ះពាល់ដល់ជាតិស្ករក្នុងឈាមយើង អាចធ្វើឲ្យយើងមានអារម្មណ៍មានកម្លាំងភ្លាមៗបន្ទាប់ពីផឹករួច។ ប៉ុន្តែថាមពលបែបនេះនឹងបាត់ទៅវិញក្នុងរយៈពេល ២-៣ ម៉ោងបន្ទាប់។ ហេតុនេះបើផឹកទឹកផ្លែឈើប្រភេទនេះជំនួសអាហារពេលព្រឹកមិនល្អទេ។ បើអាចគួរតែផឹកទឹកផ្លែឈើស្រស់ៗជំនួសវិញ ឬធ្វើទឹកផ្លែឈើដោយខ្លួនឯង ដោយមិនបាច់ថែមស្ករឡើយ។
៣- នំបុ័ងអាំង
បើញ៉ាំនំប៉័ងអាំងទទេគ្មានអ្វីខុសខាតទេ ប៉ុន្តែបើបៀកសូកូឡា និងប៊ឺរបន្ថែមទៀត យើងនឹងមានអារម្មណ៍ដូចជាអ័រម៉ូនអាដ្រេណាលីនចាល់ឡើងក្នុងខ្លួន នឹងមិនឃ្លានអ្វីរាប់ម៉ោងឯណោះ។ ប៉ុន្តែត្រូវដឹងថាវាមិនល្អសម្រាប់សុខភាពឡើយ ហើយបើគ្មានជម្រើស អាចសាកល្បងអាហារមិនមានជាតិគ្លុយតង់ (Gluten-free) និងបន្ថែមគ្រឿងបន្តិចបន្តួចបានហើយ។
៤- គ្រាប់ធញ្ញជាតិផ្អែមៗ
ជនជាតិអាមេរិក ចូលចិត្តអាហារគ្រាប់ធញ្ញជាតិដាក់ស្ករនេះណាស់។ ប៉ុន្តែវាមិនមែនជាជម្រើសល្អនោះទេ ព្រោះញ៉ាំគ្រាប់ធញ្ញជាតិមួយចានគោមសម្រាប់អាហារពេលព្រឹក គឺពិតជាងាយស្រួល និងរហ័សបំផុតសម្រាប់គ្នាយើងតែងក្រោកពីគេងយឺតពេល។ គ្រាប់ធញ្ញជាតិក្នុងប្រអប់ គឺមានផ្ទុកជាតិស្ករ បន្ថែមរសជាតិ បន្ថែមពណ៌ សារធាតុគីមី និងមានផ្ទុកសារធាតុរក្សាគុណភាពបានយូរ។
៥- នំពុម្ភដុត
អាចញ៉ាំនំពុម្ភដុតបាន ប្រសិនបើចង់ញ៉ាំជាតិម្សៅ ប្រេង ឬប៊ឺរ និងត្រូវការជាតិស្ករក្នុងខ្លួនច្រើន។ អាហារប្រភេទនេះ មានផ្ទុកជាតិស្ករច្រើនណាស់ ដូចនេះក៏មិនមែនជាអាហារពេលព្រឹកល្អនោះដែរ។ បើគ្មានជម្រើស អាចញ៉ាំនំដុតដោយប្រើម្សៅគ្មានជាតិគ្លុយតង់ ប្រើស្ករក្រហមជំនួសស្ករកែច្នៃ ចាក់ទឹកស្ករបន្ថែម ឬប្រើទឹកប៉ម និងទឹកចេក។
៦- នំបន្ទះ
នំបន្ទះ ជានំដំបូងគេបំផុត ត្រូវបានផ្សាយបោកបញ្ឆោតថា ជានំល្អសម្រាប់សុខភាពនៅតាមកញ្ចក់ទូរទស្សន៍។ នំបន្ទះទាំងនោះ មានជាតិស្ករកែច្នៃខ្ពស់ណាស់ ហើយក៏ផ្ទុកជាតិខ្លាញ់មិនល្អជាច្រើនដូចគ្នា។ បើចង់ញ៉ាំនំបន្ទះនេះ អាចធ្វើវាដោយខ្លួនឯង ដោយប្រើស្រូវសាឡី លាយជាមួយប៊ឺរធ្វើពីសណ្ដែក ទឹកឃ្មុំ អាចបន្ថែមផ្លែប៉ោម ឬប្រើសណ្ដែកដី ដើម្បីឲ្យនំកាន់តែស្រួយឆ្ងាញ់។
៧- នំផែនខេក និងទឹកសេរ៉ូ Maple សប្បនិម្មិត
ក្មេងៗភាគច្រើន ចូលចិត្តនំផែនខេកខ្លាំងណាស់ ដោយសារតែវាទន់ ស្រាលនៅខាងក្នុង និងមានរស់ជាតិផ្អែម។ នំផែនខេក និងទឹកសេរ៉ូ Maple សប្បនិម្មិតនេះ អាចធ្វើឲ្យជាតិស្ករឡើងខ្ពស់យ៉ាងលឿន។ អាហារប្រភេទនេះ ក៏មិនងាយរំលាយដែរ ហេតុនេះមិនថាយើងញ៉ាំវានៅពេលណាក៏ដោយ ក្រពះមិនងាយរំលាយវាបានរហ័សនោះទេ។សរុបសេចក្តីមក អាហារពេលព្រឹកខាងលើ គឺពេញនិយមខ្លាំងសម្រាប់ពួកអឺរ៉ុប អាមេរិក និងបណ្តាប្រទេសមួយចំនួនទៀត ប៉ុន្តែនៅអាស៊ីអាគ្នេយ៍យើងវិញ អាហារពេលព្រឹកពេញនិយមបំផុត មានបាយ បបរ គុយទាវ មី ហើយក៏ជាជម្រើសអាហារពេលព្រឹកល្អមួយ សម្រាប់សុខភាពយើងដែរ ប៉ុន្តែគ្រាន់តែកុំលោភគ្រឿងពេក ញ៉ាំរសជាតិសាបល្មម មិនប្រៃ កាន់តែល្អសម្រាប់សុខភាព។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា ធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]