ខេត្តស្ទឹងត្រែង ៖ បុរសពីរនាក់រងការចាប់ខ្លួនដោយកម្លាំងអធិការដ្ឋាននគរបាលស្រុកសៀមប៉ាងនាព្រឹក ថ្ងៃទី១០ ឧសភានេះ ក្រោយពាក់ព័ន្ធទៅនឹងអំពើចោរកម្មប្រព្រឹត្តនៅភូមិផាបាំង ឃុំថ្មកែវ កាលពីថ្ងៃទី៤ ឧសភា ២០១៩។
មន្ត្រីនគរបាលស្រុកសៀមប៉ាងបានបញ្ជាក់ឲ្យដឹងថា កម្លាំងនគរបាលស្រុក កាលពីព្រឹក ថ្ងៃទី១០ ឧសភា បានឃាត់ខ្លួនជនសង្ស័យចំនួនពីរនាក់ ដោយពាក់ព័ន្ធក្នុងករណីលួច សត្វគោចំនួន៣ក្បាល កាលពីថ្ងៃទី៤ ឧសភា ២០១៩។
មន្ត្រីនគរបាលដដែលបន្តថា ការចាប់ ជនសង្ស័យខាងលើសមត្ថកិច្វបានឃាត់ខ្លួនបុរសម្នាក់ជាអ្នកទទួលផលចោរកម្មបន្ទាប់មកទើបឈានទៅចាប់ខ្លួនជនដៃដល់ធ្វើសកម្មភាពលួច។
នគរបាលបានបញ្ជាក់ប្រាប់ឱ្យដឹងថា ជនសង្ស័យឈ្មោះ គី ប៊ុនម៉ា ភេទប្រុស អាយុ២៩ឆ្នាំ រស់នៅភូមិឡាកាយ ឃុំថ្មកែវ ស្រុកសៀមប៉ាង ជាជនដៃដល់ធ្វើសកម្មភាពលួច។ រីឯម្នាក់ទៀតគឺអ្នកទទួលផលចោរកម្មឈ្មោះ មីន សារី ភេទប្រុស អាយុ៥៩ឆ្នាំ ពលរដ្ឋខ្មែរឥស្លាម មានទីលំនៅភូមិផាបាំង ឃុំថ្មកែវស្រុកសៀមប៉ាង។
យោងតាមការឲ្យដឹងពីម្ចាស់សត្វគោឈ្មោះ នុត និត ភេទប្រុស អាយុ៥៦ឆ្នាំមានទីលំនៅភូមិផាបាំង ឃុំថ្មកែវ ស្រុកសៀមប៉ាង បានបំភ្លឺប្រាប់សមត្ថកិច្ចថា កាលពីថ្ងៃទី៤ ឧសភា ២០១៩ គាត់បានបាត់សត្វគោចំនួន៣ក្បាល បន្ទាប់ពីបាត់គាត់ក៏បានដើររកតែរកមិនឃើញ។ លុះមកដល់ថ្ងៃទី៩ ឧសភានេះ ទើបប្រទះឃើញសត្វគោរបស់ខ្លួន នៅផ្ទះឈ្មោះ មីន សារី ដែលជាទីតាំងកាប់សាច់គោលក់។
ខណៈប្រទះឃើញសត្វគោរបស់ខ្លួនក៏បានទៅប្ដឹងសមត្ថកិច្ច រហូតឈានដល់ឃាត់ខ្លួនអ្នកលួចគោ និងអ្នកទទួលផលបញ្ជូនទៅកាន់អធិការដ្ឋាននគរបាលស្រុសៀមប៉ាង។ ក្រោយការឃាត់ខ្លួនសាកសួរ នៅអធិការដ្ឋាននគរបាលស្រុកសៀមប៉ាងកម្លាំងជំនាញក៏បានបញ្ជូនទៅកាន់ស្នងការដ្ឋាននគរបាលខេត្តស្ទឹងត្រែងដើម្បីសាកសួរបន្ថែម និងកសាងសំណុំរឿងតាមនីតិវិធី៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]