អបអរសាទរ! NU’EST ទើបតែទទួលបានពានរង្វាន់លើកដំបូង ក្រោយបង្ហាញមុខជាង៨ឆ្នាំ

កូរ៉េខាងត្បូង៖ កាលពីថ្ងៃទី០៨ ខែឧសភាថ្មីៗនេះ ក្រុមចម្រៀងបុរស NU’EST ទទួលបានពានរង្វាន់នៅក្នុងកម្មវិធី Show Champion ដែលនេះជាពានរង្វាន់ដំបូង ក្រោយក្រុមចម្រៀងនេះ បានបង្ហាញខ្លួននៅក្នុងវិស័យសិល្បៈមកជាង៨ឆ្នាំ។

ក្រោយទទួលបានពានរង្វាន់ Minhyun តំណាងឲ្យសមាជិកក្នុងក្រុមទាំងអស់និយាយថ្លែងអំណរគុណទាំងរំភើប ដល់អ្នកគ្រប់គ្នាយ៉ាងដូច្នោះថា « អ្នកគាំទ្រទាំងអស់គ្នា! អរគុណដែលតែងតែនៅទីនេះរហូតមកជាមួយ NU’EST។ ពិតជារំភើបខ្លាំងណាស់ ពួកយើងនឹងប្រឹងប្រែងធ្វើឲ្យបានល្អជាងនេះ»។

គួររំលឹកផងដែរថា NU’EST បង្ហាញខ្លួនជាផ្លូវការនៅក្នុង២០១២ និងទទួលបានការគាំទ្រយ៉ាងខ្លាំងមកដល់សព្វថ្ងៃ ទោះបីជាក្រុមនេះមិនដែលធ្លាប់ទទួលបានពានរង្វាន់ក្នុងកម្មវិធីចម្រៀង សូម្បីតែម្តងក៏ដោយ។

យ៉ាងណាមិញអ្នកគាំទ្រសប្បាយរីករាយសម្រាប់ភាពជោគជ័យលើកនេះ ហើយថែមទាំងសង្ឃឹមថា NU’EST នឹងអាចទទួលបានពានរង្វាន់បែបនេះបន្តទៀត ដោយមើលតាមសមត្ថភាព និងការខិតខំប្រឹងប្រែងរបស់ពួកគេ៕

• តារាកូរ៉េ