Chelsea ត្រៀមប្រើក្បាច់ចុងក្រោយ ដើម្បីប្រឆាំងនឹង FIFA!

បរទេស៖ ក្លិបតោខៀវ Chelsea បានចេញសេចក្តីប្រកាសនៅលើគេហទំព័រផ្លូវការរបស់ខ្លួនថា ពួកគេនឹងសម្រេចប្តឹងជំទាស់នឹង FIFA ពាក់ព័ន្ធនឹងករណីហាមឃាត់មិនឱ្យទិញកីឡាករចំនួន ២រដូវកាល។ គួរឱ្យដឹងថា ក្លិប Chelsea ត្រូវបាន FIFA សម្រេចពិន័យមិនឱ្យទិញដូរកីឡាករចំនួន ២រដូវកាល ដោយចោទប្រកាន់ពីបទ ទិញកីឡាករអាយុក្រោម ១៨ឆ្នាំពីក្រៅតំបន់អឺរ៉ុបមកចូលរួមជាមួយក្លិប។ យ៉ាងណាមិញ Chelsea បានជំទាស់ដាច់ខាតពាក់ព័ន្ធនឹងការចោទប្រកាន់នេះ ដោយបានប្រកាសប្តឹងបន្តទៅកាន់ FIFA ប៉ុន្តែបណ្តឹងនោះត្រូវបានបដិសេធ និងច្រានចោល ហើយស្ថាប័នកំពូលរបស់បាល់ទាត់មួយនេះ បានបន្តរក្សាការដាក់ពិន័យទៅលើក្លិបនេះទុកជាបានការដដែល។

ដោយសារតែហេតុផលនេះ ក្លិប Chelsea បានសម្រេចធ្វើការរៀបចំបណ្តឹងជាបន្ត ដើម្បីដាក់ទៅកាន់តុលាការអាជ្ញាកណ្តាល Court of Arbitration for Sport (CAS) ឱ្យជួយដោះស្រាយករណីនេះជាបន្ត។ គួរឱ្យដឹងថា ប្រសិនបើសេចក្តីសម្រេចចុងក្រោយនៅតែរក្សាការចោទប្រកាន់របស់ FIFA ទុកជាបានការ នោះក្លិប Chelsea នឹងត្រូវហាមឃាត់ការទិញចូលកីឡាករចំនួន ២រដូវកាល។ ក្លិប Chelsea អាចនឹងមានបញ្ហាធ្ងន់ធ្ងរស្របពេលដែលកីឡាករល្អៗមួយចំនួនរបស់ខ្លួន កំពុងត្រូវបានក្លិបផ្សេងៗទាក់ទងចង់បាន ហើយកីឡាករមួយចំនួនដូចជា Oilvier Giroud និង David Luiz ជាដើម ក៏កំពុងតែឈានដល់ការអស់សុពលភាពកិច្ចសន្យាផងដែរ៕