រាជធានីភ្នំពេញ៖ អតីតតារាសម្តែង និងជាអ្នកផាត់មុខស្ទើរតែគ្រប់តួអង្គសម្តែងនាអំឡុងទសវត្ស៩០លោកអ៊ុក ស៊ីវីឡៃយុទ្ធ បានទទួលមរណភាពនៅវេលាម៉ោង១២ និង១៥នាទីរំលងអធ្រាត្រ ឈានចូលថ្ងៃទី៦ ខែឧសភា ឆ្នាំ២០១៩ ដោយរោគាពាធ ក្នុងអាយុជាង៦០ឆ្នាំ ។
បើទោះបីជាយុវវ័យជំនាន់នេះហាក់មិនសូវជាស្គាល់មុខលោកអ៊ុក ស៊ីវីឡៃយុទ្ធ ប៉ុន្តែអ្នកនិយមតាមដានភាពយន្តខ្មែរនាអំឡុងទសវត្សឆ្នាំ៩០ ប្រាកដជាស្គាល់ឈ្មោះរបស់លោកច្បាស់ ក្នុងពេលដែលលោកមានស្នាដៃក្នុងការផាត់មុខស្ទើរតែគ្រប់តួអង្គ ។
តារាសម្តែងជើងចាស់ ល្បីៗដូចជា អ្នកនាង អម្ពរ ទេវី និងអ្នកនាងសុខ ស្រីមុំ ជាដើម គឺលោកលោកអ៊ុក ស៊ីវីឡៃយុទ្ធ ជាអ្នកផាត់មុខឲ្យទាំងអស់ ។
បើតាមលោកសុខ មាន ដែលជាអ្នកស្រាវជ្រាវឯកសារ ចាស់ៗបានបញ្ជាក់ថា លោកអ៊ុក ស៊ីវីឡៃយុទ្ធ ជាអ្នកតុបតែងមុខតារាភាពយន្តដ៏មានស្នាដៃចំណានតាំងពីទសវត្សទី៨០ ហើយលោកក៏ជាអ្នកជិតស្និទ្ធក្នុងរង្វង់សិល្បៈជាមួយកវីគង្គ ប៊ុនឈឿន និងអ្នកស្រី ឌី សាវ៉េត ក្រោយឆ្នាំ១៩៧៩ ហើយក៏ជាអ្នកដែលអាចចងចាំភាពយន្តខ្មែរមុនឆ្នាំ បានច្រើនជាងគេ។
ស្នាដៃទេពកោសល្យសិល្បៈពហុជំនាញរបស់លោកអ៊ុក ស៊ីវិឡៃយុទ្ធ មានស្នាដៃផាត់មុខស្ទើរគ្រប់តួកុន ល្បីៗសម័យឆ្នាំ១៩៨០-១៩៩០ (អម្ពរទេវី សុខ ស្រីមុំ…) អភិរក្សរូបថតឯកសារតួកុនក្រោយ១៩៧៩ រាប់មិនអស់។ ចងចាំឈុតឆាកភាពយន្ត បទចម្រៀងភាពយន្ត និងតារាភាពយន្តមុនឆ្នាំ១៩៧៥ បានច្រើនជាងគេ។ ធ្លាប់ចូលរួមសម្តែងក្នុងភាពយន្តរឿងចៅស្រទបចេក (តួអង្គព្រះឥន្ទ្រ) ឆ្នាំ១៩៩២ និងភាពយន្តឯកសារ Golden Slumbers ឬដំណេកមាស (តួអង្គរំព្ញកពីឈ្មោះរោងកុនខ្មែរពីដើម) ។ មានចំណេះទូទៅទូលំទូលាយផ្នែកសិល្បៈទសវត្សទី៦០-៧០ ។ លោកក៏ពូកែរាំចង្វាក់ពេញនិយមអំឡុងទសវត្សទី៦០-៧០ ក្នុងកម្មវិធី ផ្សេងៗផងដែរ។
លោកអ៊ុក ស៊ីវីឡៃយុទ្ធ គឺជាបុគ្គលដែលប្រើពេលមួយជីវិតផ្ញើបេះដូងនឹងសិល្បៈ។ ដំណឹងមរណភាពរបស់លោកអ៊ុក ស៊ីវីឡៃយុទ្ធ នាពេលនេះធ្វើឲ្យមានការសោកស្តាយពីជនរួមជាតិព្រោះជាការបាត់បង់ធានធានមនុស្សមួយយ៉ាងសំខាន់នៅក្នុងវិស័យសិល្បៈភាពយន្តខ្មែរ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]