អូស្រ្តាលី៖ កាលពីសុក្រថ្ងៃទី៣ ឧសភា ឆ្នាំ២០១៩ កន្លងទៅនេះ ស្រ្តីម្នាក់ឈ្មោះថា Sharon Lam ដែលត្រូវបានគេស្គាល់ថា ជាអ្នកលក់ផ្កាតាមអនឡាញ ក្នុងទីក្រុងស៊ីដនី ប្រទេសអូស្រ្តាលី បានចែករំលែករូបភាពប៉ុន្មានសន្លឹក ពីបាច់ផ្កាដ៏គួរឲ្យចាប់អារម្មណ៍របស់គាត់ ត្រៀមទុកជូនម្តាយក្មេកជាពិសេស ក្នុងថ្ងៃទិវាបុណ្យម្តាយ។
បើតាមប្រភពបានឲ្យដឹងថា បាច់ផ្កានោះ គឺជាស្នាដៃរបស់អ្នកស្រី Sharon ដែលបានធ្វើឡើងដោយខ្លួនគាត់ ដើម្បីត្រៀមទុកជូនម្តាយក្មេកក្នុងថ្ងៃ នៃទិវាបុណ្យម្តាយ ដើម្បីបង្ហាញពីទឹកចិត្តស្រលាញ់។ ប៉ុន្តែអ្វីដែលគួរឲ្យភ្ញាក់ផ្អើលនោះ វាមិនមែនជាបាច់ផ្កាធម្មតានោះទេ។ ពោលគឺវាជាបាច់ផ្កាផ្លែទុរេន ដែលធ្វើឲ្យអ្នកលេងបណ្តាញសង្គម ហាក់កើតចម្ងល់ ប៉ុន្តែក៏សរសើរចំពោះភាពច្នៃប្រឌិតបែបប្លែករបស់អ្នកស្រី Sharon នូវរបស់ជាអំណោយមួយនេះផងដែរ។
ជុំវិញនឹងរឿងរ៉ាវនេះ អ្នកស្រី Sharon បាននិយាយថា ក្នុងនាមគាត់ជាអ្នកលក់ផ្កា ហើយក៏ជាកូនប្រសាស្រីដ៏ល្អម្នាក់ផងដែរនោះ គាត់តែងតែជូនបាច់ផ្កាដល់ម្តាយក្មេករបស់គាត់ជារៀងរាល់ឆ្នាំ។ ប៉ុន្តែសម្រាប់នៅក្នុងឆ្នាំនេះ អ្នកស្រីចង់ធ្វើអ្វីមួយដែលប្លែកវិញម្តង ដើម្បីឲ្យម្តាយក្មេកនិងគ្រួសាររបស់គាត់ រីករាយក៏ដូចជាពេញចិត្តនូវអំណោយនោះ។
អ្នកស្រី Sharon បានទៅផ្សារដើម្បីទិញផ្លែទុរេនមួយផ្លែ យកមកច្នៃដាក់ចូលជាមួយនឹងបាច់ផ្កា បើទោះបីជាផ្លែឈើមួយនេះ មានក្លិនដែលគាត់មិនចូលចិត្ត ប៉ុន្តែគាត់នៅតែព្យាយាមច្នៃធ្វើវាជាពិសេស ដើម្បីជូនម្តាយក្មេក បង្ហាញពីទឹកចិត្តស្រលាញ់។
ជាការពិតណាស់ បាច់ផ្កាមួយនេះមើលទៅពិតជាទាក់ទាញ និងស្រស់ស្អាត ព្រោះតែអ្នកស្រី Sharon បានច្នៃរំលេចនូវផ្កាតូចៗជាច្រើននៅជុំវិញផ្លែទុរេន និងមានការវេចខ្ចប់ពីខាងក្រៅយ៉ាងត្រឹមត្រូវ ពិសេសថែមទាំងមានចងបូលើផ្លែទុរេនយ៉ាងស្អាតផងដែរ។
អ្នកស្រី Sharon និយាយថា នេះមិនមែនជាគំនិតថ្មីអីនោះ ប៉ុន្តែនេះគឺជាលើកទីមួយហើយ ដែលអ្នកស្រីបានច្នៃយកផ្លែទុរេនមកធ្វើជាបាច់ផ្កាបែបនេះ។ ដូច្នេះអ្នកស្រីក៏មានអារម្មណ៍មួយថាប្លែក និងរីករាយតិចតួចក្នុងចិត្តផងដែរ។ ហើយអ្នកស្រីក៏សង្ឃឹមថា ម្តាយក្មេកអ្នកស្រីនឹងពេញចិត្តវាជាមិនខាន។
អ្នកស្រីបានបន្ថែមថា ដោយសារតែមើលទៅវាមានភាពទាក់ទាញខ្លះដែរ អ្នកស្រីក៏នឹងមានគម្រោងច្នៃបង្កើតនូវគំនិតមួយនេះ ដើម្បីដាក់លក់នៅក្នុងឱកាសពិសេសៗផងដែរ។
គួរឲ្យដឹងផងដែរថា ទិវាបុណ្យម្តាយ (Mother’s Day) នៅក្នុងឆ្នាំនេះ គឺចំថ្ងៃទី១២ ខែឧសភា ឆ្នាំ២០១៩ ។
តើអ្នកជាកូនៗមានបានត្រៀមអំណោយអ្វីជាពិសេស សម្រាប់ជូនអ្នកម្តាយជាទីស្រលាញ់ហើយឬនៅ? ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]