«ហ្វៃបឺរ» ទៅណាក៏ឮ បើកអានអត្ថបទអីក៏ឃើញ។ អាហារមានកាកសរសៃ ឬយើងនិយមហៅ «ហ្វៃបឺរ» ជាពពួកស្ករប៉ូលីសាការាយ ដែលមិនងាយនឹងរលាយក្នុងពោះវៀនឡើយ។ បាក់តេរីជាច្រើនលូតលាស់ក្នុងសារធាតុសរសៃនេះក្នុងពោះវៀនធំ។ វាមានគុណតម្លៃជាច្រើនសម្រាប់តម្រូវការប្រចាំថ្ងៃដែលរាងកាយត្រូវកាយ។ ថ្ងៃនេះយល់ពាក្យនេះឲ្យច្បាស់ ហើយប្រយោជន៍អីខ្លះ ដែលបានពីវា បើញ៉ាំ?
១ - អ្វីទៅជា «ហ្វៃបឺរ» ឬសារធាតុសរសៃ?
បើនិយាយពីសម្បូរវិញ គឺនៅក្នុងរុក្ខជាតិជាពិសេសដើមរុក្ខជាតិតែម្ដង។ តែក្រពះពោះវៀនយើងមិនអាចបំបែកសារធាតុសរសៃនេះបានឡើយ។ អ្នកអាចញ៉ាំសារធាតុសរសៃបានដោយញ៉ាំផ្លែឈើ បន្លែ និងគ្រាប់រុក្ខជាតិ។ យើងគ្រប់គ្នាសុទ្ធតែដឹងហើយថាវាជួយសម្រួលបញ្ហាទល់លាមក។ តែលើសពីនេះទៀតវាអាចជួយដល់ការសម្រកទម្ងន់ បន្ថយនឹងការប្រឈមនឹងជំងឺទឹកនោមផ្អែម និងជំងឺសរសៃឈាមនិងបេះដូងជាច្រើនទៀត។
២ - ប្រភេទ «ហ្វៃបឺរ»
របស់ដែលញ៉ាំបានមានកាកសរសៃនេះ ត្រូវបានគេចែកជាពីរប្រភេទគឺ រលាយក្នុងទឹក និងមិនរលាយក្នុងទឹក។ តើ ២ហ្នឹងខុសគ្នាយ៉ាងម៉េច?
- «ហ្វៃបឺរ» រលាយក្នុងទឹក៖ មានសណ្ឋានរាងខាប់ ធ្វើឲ្យយើងមានអារម្មណ៍ថាឆ្អែតបានយូរ ហើយជួយបន្ថយជាតិកូឡេស្តេរ៉ុលក្នុងឈាម និងជាតិស្ករក្នុងឈាមទៀតផង។ ពពួកសារធាតុសរសៃប្រភេទនេះសម្បូរណាស់ក្នុង គ្រាប់សណ្ដែកបារាំង សណ្ដែកក្រហម ផ្លែប៉ោម ការ៉ុត ពពួកស្រូវសាលី និងពពួកផ្លែក្រូច។ល។
- «ហ្វៃបឺរ» មិនរលាយក្នុងទឹក៖ ខុសពីប្រភេទខាងលើត្រង់ថា ជួយសម្រួលដល់ការបត់ជើង (ជុះស្រួល មិនក្ដៀន មិនរាក)។ «ហ្វៃបឺរ» មិនរលាយក្នុងទឹកសម្បូរណាស់ក្នុង គ្រាប់ធញ្ញជាតិ គ្រាប់សណ្ដែកក្រហម ដំឡូងជ្វា ដំឡូងបារាំង ផ្កាខាត់ណា ។ល។
៣ - ប្រយោជន៍អ្វីខ្លះ? ច្រើនប៉ុណ្ណា?
- បន្ទោរបង់ស្រួល៖ ជួយឲ្យលាមកទន់ ងាយស្រួលបញ្ចេញចោល។ ហើយបើសិនជាលាមករាវវិញ សារធាតុសរសៃនេះក៏អាចធ្វើវារឹងវិញដែរ។
- បត់ជើងទៀង៖ ពេលញ៉ាំអាហារសំបូរជាតិសរសៃ យើងអាចបន្ថយកត្តាប្រឈមនឹងជំងឺឫសដូងបាត និងភាពមិនប្រក្រតីក្នុងពោះវៀនធំ ដែលធ្វើឲ្យយើងបត់ជើងអត់ទៀង ឬមានពេលខ្លះ រាប់ថ្ងៃអត់ទាន់បានបត់ជើងទៀត។ ក៏មានសារធាតុសរសៃខ្លះទៀតកាច់មេក្នុងពោះវៀន ដែលអាចនឹងការពារជំងឺក្នុងពោះវៀនធំជាច្រើន។
- បន្ថយកូឡេស្តេរ៉ុលក្នុងឈាម៖ វាទៅបន្ថយលីប្រូតេអ៊ីនកំហាប់ទាបដែលជាខ្លាញ់អាក្រក់ (LDL)។ វាក៏មានគុណប្រយោជន៍ចំណោះសុខភាពបេះដូងផងដែរដូចជា គ្រប់សម្ពាធឈាមនិងប្រឆាំងការរលាក។
- បន្ថយកម្រិតជាតិស្ករក្នុងឈាម៖ អ្នកជំងឺទឹកនោមផ្អែមគួរទទួលទានសារធាតុសរសៃឲ្យបានច្រើន ជាពិសេសសារធាតុដែលរលាយក្នុងទឹក។ វាអាចបន្ថយការស្រូបជាតិស្ករពីក្នុងពោះវៀនចូលក្នុងឈាមបាន។ បើសិនញ៉ាំអាហារដែលល្អសម្រាប់សុខភាព ហើយមានសារធាតុសរសៃដែលរលាយក្នុងទឹកនេះទៀត នោះអ្នកកាត់បន្ថយការប្រឈមនឹងជំងឺទឹកនោមផ្អែមប្រភេទទី ២ បានយ៉ាងខ្ពស់។
- រក្សាទម្ងន់៖ «ហ្វៃបឺរ» ធ្វើឲ្យយើងឆ្អែតបានយូរ ហើយមានកាឡូរីតិចជាងអាហារធម្មតាទោះមានចំនួនប្រហែលគ្នាក៏ដោយ ហើយថែមទាំងការពារយើងពីជំងឺមហារីកពោះវៀនធំទៀតផង។
ក្នុងករណីមានសំនួរឬមន្ទិលសង្ស័យជុំវិញសុខភាពអ្នក ជម្រើសល្អបំផុតសូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា ធ្វើរោគវិនិច្ឆ័យឬ ធ្វើការព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
