ទើបតែជាពីរបួស ពេលនេះ Dembele រងរបួសសាជាថ្មីម្តងទៀត ទំនងមិនអាចចូលលេងទល់នឹង Liverpool!

អេស្ប៉ាញ៖ ក្រោយពីជាសះស្បើយពីរបួសថ្មីៗ ពេលនេះ កីឡាករ Ousmane Dembele កំពុងត្រូវប្រឈមមុខនឹងការសម្រាកពីទីលានបន្តទៀត ក្រោយពីមានការប៉ះទង្គិច និងប្តូរចេញពីទីលានភ្លាមៗ ក្នុងជំនួបរវាង Celta De Vigo ទល់នឹង Barcelona កាលពីយប់មិញ។ 

កីឡាករ Dembele ត្រូវបានប្តូរចេញភ្លាមៗនៅនាទីទី៦ និងជំនួសវិញដោយកីឡាករ Alex Collado ដែលក្រោយមកក្លិបបានបញ្ជាក់ថា ខ្សែប្រយុទ្ធសញ្ជាតិបារាំងរូបនេះមានបញ្ហារបួសសរសៃពួរ ដែលតម្រូវឱ្យមានការពិនិត្យស្ថានភាពជាបន្តទៀត ហើយនឹងត្រូវវាយតម្លៃថាអាចចូលលេងបានឬអត់ទល់នឹង Liverpool។

យ៉ាងណាក្តី យើងនៅរង់ចាំមើលបន្ថែមទៀតពីការបញ្ជាក់របស់ក្រុមគ្រូពេទ្យ រួមនឹងសេចក្តីប្រកាសរបស់ក្លិបអំពីស្ថានភាពរបស់ Dembele នាពេលក្រោយ។ គួរបញ្ជាក់ថា ការប្រកួតជើងទីពីរ រវាង Liverpool ទល់នឹង Barcelona នឹងត្រូវធ្វើឡើងនាថ្ងៃទី ៨ ខែឧសភាខាងមុខនេះ នាទឹកដីកីឡដ្ឋាន Anfield៕