រាជធានីភ្នំពេញ ៖ ស្ថិតក្នុងវ័យ៨៨ឆ្នាំទៅហើយ លោកតាម្នាក់បានខិតខំតស៊ូផលិតស្បែកជើងកង់ឡានបោះឱ្យម៉ូយនៅតាមបណ្តាខេត្តនានា និងជិះកង់ដើរលក់រាប់សិបគីឡូម៉ែត្រ ក្នុងមួយថ្ងៃៗ ដើម្បីចិញ្ចឹមប្រពន្ធចំនួន២នាក់ និងកូនប្រុសស្រីចំនួន១៩នាក់ អស់រយៈពេល២៦ឆ្នាំ មកហើយ ។
នៅតាមដងផ្លូវនានាក្នុងសង្កាត់ទឹកថ្លា ខណ្ឌសែនសុខ គេតែងឃើញចលោកតាជិះកង់កញ្ចាស់មួយគ្រឿងរហែកកែប ដោយលើកន្ត្រកមុខ លើរានក្រោយនិងចងថង់មួយសុទ្ធតែស្បែកជើងកង់ឡាន ។ ជួនកាលគាត់ជិះ ជួនកាលបណ្តើរ ដោយពពាយនាយលក់ស្បែកជើងកង់ឡាននេះ ។
តាមពិតទៅការយកកង់ឡានមកកាត់ធ្វើជាស្បែកជើងអាចចាត់ទុកថាជាការច្នៃដ៏ពិសេសមួយរកកម្រៃពីកង់ឡានចាស់ៗដែលប្រើប្រាស់លែងកើតមកចៀរជាប្រយោជន៍ តែសម្រាប់ការពុះជាស្បែកជើងកង់ឡាននេះ ពិតជាបានផ្សារភ្ជាប់ទៅនឹងសម័យខ្មែរក្រហម ដែលជាសម័យកាលដ៏ខ្មៅងងឹតនៃរបបប្រល័យពូជសាសន៍ ដែលគេនិយមប្រើណាស់ និងមិនមានស្បែកជើងណាផ្សេងមកជំនួសឡើយ បើគ្មានស្បែកជើងកង់ឡានពាក់ទេ គឺដើរជើងទទេហើយ ។ សូម្បីប៉ុលពត អៀង សារី ខៀវ សំផន ក៏ពាក់ស្បែកជើងកង់ឡានដែរ ។
ជួបជាមួយ«កោះសន្តិភាព»លោកតាបានឱ្យដឹងថា គាត់ឈ្មោះ សំរិទ្ធ អ៊ុន អ្នកស្រុកហៅតាអ៊ុនៗ ពេលនេះគាត់អាយុ៨៨ឆ្នាំ មានលំនៅភូមិ អង្គតាសោម ឃុំអង្គតាសោម ស្រុកត្រាំកក់ខេត្តតាកែវ ។ លោកតាបានឱ្យដឹងថា គាត់បានប្រកបមុខរបរធ្វើស្បែកជើងកង់ឡានដើរលក់តាំងពីឆ្នាំ១៩៩៣ ដោយបោះឱ្យម៉ូយនៅរាជធានីភ្នំពេញ និងតាមបណ្តាខេត្ត ដោយស្បែកជើងកង់ឡានមួយគូលក់ក្នុងតម្លៃ១៥.០០០រៀលទៅ២០.០០០រៀលគាត់ថា ក្នុងមួយសប្តាហ៍ធ្វើបានប្រមាណ៧០ទៅ១០០ស្បែកជើង ដោយមានកូន ជាអ្នកជួយផងដែរ ។
ចំពោះការចាប់មុខរបរនេះគឺគាត់បានរៀនកាត់ធ្វើស្បែកជើងកង់ឡាន ដោយខ្លួនឯង ដែលស្បែកជើងនេះមានគុណភាពអាចប្រើបានរយៈពេលប្រមាណ១០ឆ្នាំអត់ទៅណាទេ ។លោកតាបានឱ្យដឹងទៀតថា ជាទូទៅគាត់ដឹកស្បែកជើងកង់ឡានមកទុក នៅកន្លែងកូនលក់ដូរនៅក្នុងអង្គភាពកងពលតូចលេខ៧០ ហើយនៅវេលាម៉ោងប្រមាណ៦ព្រឹក ទើបជិះកង់យកស្បែកជើងទៅលក់និងបោះឱ្យម៉ូយ នៅក្នុងរាជធានីភ្នំពេញ ជួនកាលក៏បានជិះកង់ទៅតាមបណ្តាខេត្តមួយចំនួនផងដែរ ដើម្បីលក់ស្បែកជើងកង់ឡាននេះ ។
គាត់រៀបរាប់ថា ការប្រកបមុខរបរលក់ស្បែកជើងកង់ឡានក្នុងមួយថ្ងៃ ចំណេញបានប្រមាណជាង១០ម៉ឺនរៀលដែរគ្រាន់ចិញ្ចឹមប្រពន្ធ កូនរហូតដល់ក្រមុំ-កំលោះអស់ហើយ ។ គាត់់ថាប្រពន្ធទី១ មានកូន១០នាក់ ក្នុងនោះកូនស្រី៦នាក់ ប្រុស៤នាក់ និងប្រពន្ធទី២ មានកូន៩នាក់ ស្រី៣នាក់ ប្រុស៦នាក់ ។
ទោះបីជាយ៉ាងណា លោកតាបានបញ្ជាក់ថា កាលពីមុនចិញ្ចឹមកូន តែពេលនេះកូនធំមានប្តី ប្រពន្ធអស់ហើយ គឺគាត់មិនអាចឱ្យកូនចិញ្ចឹមវិញទេ គីខំរកខ្លួនឯងដោយក្នុងមួយថ្ងៃជិះកង់រាប់សិបគីឡូម៉ែត្រ យកស្បែកជើងឱ្យម៉ូយដែលគេកម្មង់តាមទូរស័ព្ទ ។លោកតាបាននិយាយទាំងសប្បាយចិត្តថា នៅថ្ងៃទី២ ឧសភាព ឆ្នាំ២០១៩ លោកតាបានយកស្បែកជើងកង់ឡានលក់ឱ្យព្រះសង្ឃនៅវត្តទឹកថ្លាបានប្រមាណ៥ទៅ៦គូ ហើយបន្តទៅវត្តនាគវ័ន និងនៅពេលល្ងាចក៏បានបន្តដំណើរទៅវត្តស្ទឹងមានជ័យ ដែលព្រះអង្គកម្ម៉ង់ចំនួន១៣គូទៀត ។
លោកតាបានបន្តទៀតថា ឥឡូវខ្លួនកាន់តែចាស់ សុខភាពក៏កាន់តែខ្សោយ កូនៗបានឱ្យលោកតាឈប់ដើរលក់ តែគាត់ចេះតែខំរកមិនចង់ពឹងកម្លាំងកូននោះទេ ព្រោះចាស់មែន ប៉ុន្តែកម្លាំងនៅមាន ។គួរបញ្ជាក់ថា ស្បែកជើងកង់ឡាននេះ ជាផលិតផលក្នុងស្រុកមួយដែលភ្ជាប់ទៅនឹងប្រវត្តិសាស្ត្រដ៏ជូរចត់និងមានសិទ្ធិប្រើប្រាស់តែនៅក្នុងរបបប៉ុល ពត ប៉ុណ្ណោះ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]