ខេត្តស្ទឹងត្រែង ៖ សេចក្តីរាយការណ៍បានបន្តឱ្យដឹងទៀត ក្រោយកើតមានករណីភ្លើងឆេះយ៉ាងសន្ធោសន្ធៅហើយនោះ ត្រូវកំលាំងប្រដាប់អាវុធគ្រប់ប្រភេទ ដឹកនាំដោយលោក ម៉ុម សារឿន អភិបាលខេត្តស្ទឹងត្រែងផ្ទាល់ ចុះទៅដល់កន្លែងកើតហេតុចំណុចស្ថានីយប្រេងឥន្ធនៈ «ប៉ាវចិន្តា២» នៅត្រង់កងចក្រគីឡូ២ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ដើម្បីពិនិត្យស្ថានភាពបន្តនាព្រឹកថ្ងៃទី០៤ ឧសភា ខណៈភ្លើងក៏បានរលត់ទៅវិញហើយ តែវាបានបំផ្លាញសម្ភារខ្ទេចខ្ទីរហើយដែរ ។
គួរបញ្ជាក់ថា ហេតុការណ៍ភ្លើងឆេះដ៏រន្ធត់នេះ គឺបានកើតឡើងនៅវេលាម៉ោង៥ និង៤០នាទីល្ងាចថ្ងៃទី០៣ ឧសភា ដែលផ្តើមឆេះត្រង់ពីចំណុចស៊ីទែនធុងហ្គាស ហើយក៏ផ្ទុះលាន់ដូចគ្រាប់បែក រហូតធ្វើឱ្យសំបកធុងប្រេះជា២ហោះរំលងចូលផ្ទះប្រជាពលរដ្ឋនៅផ្លូវម្ខាងទៀត ។ តែសំណាងល្អខ្លាំង ដែលមិនមានគ្រោះថ្នាក់ដល់ម្ចាស់ផ្ទះម្នាក់ណាទេ គ្រាន់តែបង្កឱ្យផ្អើលភ័យស្លន់មួយក្រុងស្ទឹងត្រែងទៅហើយ ។
បើតាមការរៀបរាប់ពីបុរសម្នាក់ ដែលជិះរថយន្តទៅចាក់សាំងនៅចំណុចនោះបាននិយាយថា មុនពេលកើតហេតុ បានឃើញម្ចាស់ស្ថានីយបានផ្សារដែក ដែលមេឃកំពុងក្តៅហើយក៏បានខ្ទាតផ្កាភ្លើង ថែមទាំងមានចំហាយហ្គាសផង ធ្វើឱ្យមានការឆាបឆេះ ។ ប៉ុន្តែយ៉ាងណានោះ សមត្ថកិច្ចបាននិងកំពុងធ្វើការស៊ើបបន្ថែមទៀតលើករណីនេះ ។
ប្រភពបន្តទៀតថា ក្នុងឧប្បត្តិហេតុភ្លើងនេះ បានធ្វើឱ្យមនុស្ស៣នាក់រងរបួស ទី១-ម្ចាស់ស្ថានីយ ភេទប្រុស ត្រូវបានបញ្ជូនទៅសង្គ្រោះនៅប្រទេសវៀតណាម។ ទី២-ជាកម្មករធ្វើការនៅក្នុងស្ថានីយប្រេងឥន្ទនៈ បានដឹកទៅសង្គ្រោះនៅមន្ទីរពេទ្យបង្អែកខេត្ត និងទី៣-ជាក្មេងស្រី ឈ្មោះ នឹម អាយុ១៣ឆ្នាំ ទើបមកធ្វើការនៅផ្ទះកើតហេតុបានចំនួន៤ថ្ងៃប៉ុណ្ណោះ សំណាងល្អដែលនាងរងរបួសស្រាល ។ ហើយពេលនេះ នាងត្រូវមន្ទីរកិច្ចការនារីខេត្តស្ទឹងត្រែង យកទៅសម្រាកនៅមន្ទីរមជ្ឈមណ្ឌលអភិវឌ្ឍន៍ស្ត្រី រង់ចាំឪពុកម្តាយមកទទួលយកទៅផ្ទះវិញ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
