ខេត្តប៉ៃលិន ៖ យុវជនម្នាក់បានរងរបួសយ៉ាងធ្ងន់ធ្ងរដោយបែកក្បាលផុងលលាដ៍បែកប្រអប់មាត់ បាក់ធ្មេញ សន្លប់នៅនឹងកន្លែងបន្ទាប់ពីយុវជនរូបនេះស្រវឹងធ្លាក់ភ្នែកជិះម៉ូតូក្នុងទិសដៅពីលិចទៅកើតរេចង្កូតជ្រុលទៅបុករថយន្តកំពុងធ្វើដំណើរបញ្ច្រាសទិសគ្នាចំពីមុខពេញទំហឹង ។
យុវជនរងគ្រោះរូបនេះឈ្មោះប៊ុន ម៉ាប់ អាយុ២៥ឆ្នាំ រស់នៅភូមិក្តុល ឃុំក្តុល ស្រុកសង្កែ ខេត្តបាត់ដំបង ជិះម៉ូតូម៉ាកណូវ៉ា ពណ៌ខ្មៅ គ្មានស្លាកលេខ ក្រោយពេលកើតហេតុជនរងគ្រោះត្រូវបានគេដឹកតាមរថយន្តសង្គ្រោះយកមកមន្ទីរពេទ្យបង្អែកខេត្តប៉ៃលិន តែដោយរបួសធ្ងន់ធ្ងរពេកទើបគ្រូពេទ្យបញ្ជូនបន្តទៅមន្ទីរពេទ្យខេត្តបាត់ដំបង ។ ចំណែកអ្នកបើកបររថយន្តឈ្មោះសួស អ៊ន់ ភេទប្រុស អាយុប្រហែល៥៦ឆ្នាំ ជាចៅសង្កាត់អូរតាវ៉ៅ បើករថយន្តម៉ាកកាមរីឆ្លាមពណ៌ខ្មៅស៊េរីឆ្នាំ២០០៩ ដោយមានអ្នករួមដំណើរចំនួន៥នាក់ទៀត ។ ទោះបីយ៉ាងណា អ្នកជិះក្នុងរថយន្តគ្មាននរណាម្នាក់រងរបួសទេ ដោយគ្រាន់តែរថយន្តបែកកង់និងដាច់កញ្ចក់មើលចំហៀងផ្នែកខាងឆ្វេង។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង៣៥នាទីព្រលប់ថ្ងៃទី១៨ មីនា ឆ្នាំ២០១២ នៅលើផ្លូវជាតិលេខ៥៧ ចំពីមុខវិទ្យាល័យហ៊ុន សែន ក្រុងទេពនិម្មិត ស្ថិតក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ។
មន្ត្រីនគរបាលចរាចរបានឱ្យដឹងថា មុនពេលកើតហេតុ រថយន្តកាមរីឆ្លាមពណ៌ខ្មៅដែលបើកបរដោយលោកសួស អ៊ន់ ជាចៅសង្កាត់អូរតាវ៉ៅ បានធ្វើដំណើរក្នុងទិសដៅពីកើតទៅលិចដោយ មានអ្នកជិះក្នុងនោះចំនួន៥នាក់ក្នុងគោលបំណងទៅចូលរួមកម្មវិធីរៀបអាពាហ៍ពិពាហ៍កូនរបស់មិត្តភក្តិ និងកម្មវិធីឡើងគេហដ្ឋានថ្មីមួយកន្លែងទៀតដែលគេបានអញ្ជើញកាលពីថ្ងៃមុន ។ ប្រភពបានបន្តទៀតថា លុះរថយន្តមកដល់កន្លែងកើតហេតុ ស្រាប់តែមានយុវជនម្នាក់ជិះម៉ូតូយ៉ាងលឿនក្នុងទិសដៅពីលិចទៅកើតរេចង្កូតទៅបុកជាមួយរថយន្តពេញទំហឹងធ្វើឱ្យយុវជននេះខ្ទាតចេញពីម៉ូតូចម្ងាយជាង១០ម៉ែត្រដោយបោកក្បាលទៅលើថ្នល់ជាតិបណ្តាលឱ្យរងរបួសយ៉ាងធ្ងន់ធ្ងររហូតសន្លប់បាត់ស្មារតី ។ យុវជនរូបនេះរស់នៅភូមិក្តុល ឃុំក្តុល ស្រុកសង្កែ ខេត្តបាត់ដំបង តែបានមករស់នៅធ្វើការនៅខេត្តប៉ៃលិន ។ នៅថ្ងៃកើតហេតុជនរងគ្រោះបន្ទាប់ពីផឹកស្រាស្រវឹងជាមួយមិត្តភក្តិ ក៏បានជិះម៉ូតូឆ្ពោះទៅក្រុងប៉ៃលិនដើម្បីរកទិញបង្អែមហូប តែដោយសារខ្លួនស្រវឹងធ្លាក់ភ្នែកទើបជិះម៉ូតូរេចង្កូតទៅបុកជាមួយរថយន្តដែលធ្វើដំណើរបញ្ច្រាសទិសគ្នាចំពីមុខពេញទំហឹងបណ្តាលឱ្យរងរបួសយ៉ាងធ្ងន់ធ្ងរ និងម៉ូតូខូចខាតស្ទើរទាំងស្រុងតែម្តង ។
ក្រោយពេលកើតហេតុ រថយន្តនិងម៉ូតូត្រូវបានប៉ូលិសយកមករក្សាទុកនៅស្នងការដ្ឋានខេត្តបណ្តោះអាសន្នរង់ចាំដោះស្រាយ ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
