ខេត្តកំពត ៖ សត្វឆ្មាជាច្រើនក្បាលត្រូវបានអ្នកភូមិផ្សេងៗគ្នាយកមកលែងចោលក្នុងវត្តគិរីបុប្ផារំពើន ស្ថិតក្នុងឃុំស្ដេចគង់ខាងលិច ស្រុកបន្ទាយមាស។
បើតាមព្រះសង្ឃមួយអង្គគង់នៅវត្តគិរីបុប្ផារំពើនបានមានសង្ឃដីកាឱ្យអោយដឹងថា សត្វឆ្មាប្រហែល៣០ក្បាលត្រូវបានអ្នកភូមិផ្សេងៗគ្នាចាប់ដាក់បាវយកមកលែងចោលនៅក្នុងវត្ត។
ព្រះសង្ឃដដែលបានមានសង្ឃដីការបន្តថា ដោយសារតែមានការផ្អើលថាសត្វឆ្មាខាំ ឬក្រញៅ បណ្តាលឱ្យមនុស្សស្លាប់ ទើបញាតិញោមបានយកសត្វឆ្មាជាច្រើនក្បាលមកលែងចោលក្នុងវត្តអារាមបែបនេះ។
តាមប្រភពពីលោកជួន ចេន អាយុ៥៧ឆ្នាំ ធ្លាប់បួសនៅវត្តប្រជាសង្គំភ្នំក្រពើ ឃុំប្រសាទភ្នំខ្យង ស្រុកកំពង់ត្រាច និងជាគ្រូប្រើថ្នាំបុរាណដើម្បីព្យាបាលរបួសដោយសត្វឆ្មា និងសត្វឆ្កែខាំបានប្រាប់អោយដឹងថា ថ្មីៗនេះមានពលរដ្ឋជាច្រើនាក់ត្រូវសត្វឆា្មនិងឆ្កែខាំ បាននាំគ្នាមកអោយគាត់ព្យាបាលតាមរបៀបបុរាណ។
តាមប្រភពដដែលបានបន្តថា ជាក់ស្ដែងនៅភូមិរំពើន ក្នុងឃុំស្ដេចគង់ខាងលិចនេះមានប្រជាពលរដ្ឋត្រូវសត្វឆា្មខាំ និងក្រញៅចំនួន១០នាក់ហើយបានជាសះស្បើយហើយ បន្ទាប់ពីគាត់បានព្យាបាល ។ ថ្មីៗនេះមានពលរដ្ឋម្នាក់ទៀតនៅភូមិភ្នំខ្យង ឃុំប្រាសាទភ្នំខ្យងក៍ត្រូវសត្វឆ្មាខាំ បណ្តាលអោយរងរបួសត្រង់ជើងផងដែរ តែគាត់បានព្យាបាលដោយបិតថ្នាំបុរាណរួចហើយដែរ។
តាមប្រភពដដែលបានបន្តទៀតថា ស្ត្រីម្នាក់នៅភូមិជ្រោះតាសោម ឃុំប្រាសាទភ្នំខ្យងក៏បានរងគ្រោះដោយសារសត្វឆ្កែខាំដែរ តែគាត់បានព្យាបាលដោយបិតថ្នាំរួចហើយ ធានាមិនហើម និងមិនអោយមានបញ្ហាឡើយ ។ លោកគ្រូជួន ចេន បាននិយាយថា បើសត្វឆ្មានិងឆ្កែខាំ ទុកយូថ្ងៃពេក ក៏លោកមិនអាចជួយសង្គ្រោះបានទេ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]