រាជធានីភ្នំពេញ ៖ បុរសម្នាក់នាំស្រីស្នេហ៍ទៅក្រេបទឹកឃ្មុំនៅផ្ទះសំណាក់យ៉ាងស្កប់ស្កល់អស់មួយយប់ ហើយត្រូវស្ត្រីជាប្រពន្ធ និងកូន(ប្តីមុន) តាមទាន់ រួចចុចប្រព័ន្ធ GPS ពន្លត់ម៉ាស៊ីនរថយន្តឃាត់ខ្លួនស្រីស្នេហ៍ផ្អើលទាំងព្រឹកបង្កឱ្យមានការភ្ញាក់ផ្អើលកាលពីម៉ោងប្រមាណ៦ព្រឹក ថ្ងៃទី២៩ ខែមេសា ឆ្នាំ២០១៩ នៅចំណុចប្រមាណជិត១០០ម៉ែត្រផ្ទះសំណាក់ «លក្ខណ៍ប៊ូទិច ម៉ូតែល» ស្ថិតក្នុងតំបន់បឹងកក់ សង្កាត់ស្រះចក ខណ្ឌដូនពេញ ។
បុរសលួចមានស្រីកំណាន់នោះឈ្មោះ សុភ័ក្រ អាយុប្រមាណជាង៤០ឆ្នាំ មុខរបរជាអ្នករត់តាក់ស៊ី និងដឹកភ្ញៀវ លំនៅក្នុងសង្កាត់ឃ្មួញ ខណ្ឌសែនសុខ ជិះរថយន្តម៉ាកហាយឡែនឌ័រ ពណ៌ទឹកប៊ិច ពាក់ស្លាកលេខ ភ្នំពេញ២AM.៧៨៨៥ ចំណែកស្រីស្នេហ៍ប្រាប់ថា ខ្លួនអាយុ២៨ឆ្នាំ មុខរបរធ្វើស្រែចំការ មានលំនៅខេត្តក្រចេះ ។
តាមប្រភពព័ត៌មានឱ្យដឹងថា មុនកើតហេតុ បុរសជាប្តីបាននាំស្រីស្នេហ៍ទៅឡើងឋានសួគ៌ានៅផ្ទះសំណាក់ «លក្ខណ៍ប៊ូទិច ម៉ូតែល» បន្ទាប់ពីក្រេបទឹកឃ្មុំយ៉ាងស្កប់ស្គាល់អស់មួយយប់ លុះព្រឹកឡើងជិះរថយន្តចេញវិញក៏ត្រូវកូនប្រុស និងប្រពន្ធមកដល់ក៏ចុច GPS ពន្លត់ម៉ាស៊ីន ហើយឱ្យប្តីជួបគ្នាដោះស្រាយ និងចាប់ដៃនារីជាស្រីស្នេហ៍ជាប់ ដើម្បីថតទុកជាភស្តុតាងដែលបញ្ជាក់ថា ជាសហាយស្មន់នឹងគ្នា ។
ប្រភពដដែលបន្តថា ព្រឹកនោះស្ត្រីជាប្រពន្ធចាប់ដៃស្រីស្នេហ៍ជាប់ ហើយបុរសជាប្តីក៏ព្យាយាមទៅប្រវាយប្រតប់ដើម្បីរំដោះចេញ ក៏មានការទាស់ទែងគ្នាបែកផ្សែងបង្កឱ្យមានការភ្ញាក់ផ្អើលយ៉ាងខ្លាំងផងដែរ។ ភ្លាមៗបុរសជាប្តីក៏គេចខ្លួនបាត់ចោលរថយន្តតែម្តង ដោយឡែកនារីជាស្រីស្នេហ៍ត្រូវស្ត្រីជាប្រពន្ធចាប់ជាប់ រួចនាំទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្រះចក តែក្រោយមកដោះលែងវិញបន្ទាប់ពីនគរបាលណែនាំឱ្យទៅប្តឹងនៅមូលដ្ឋាន។
តាមស្ត្រីជាប្រពន្ធសុំមិនបញ្ចេញឈ្មោះឱ្យដឹងថា ការតាមចាប់ស្ត្រីជាសហាយស្មន់ គឺដើម្បីទុកជាភស្តុតាង និងប្តឹងលែងលះប្តីដែលលួចមានស្រីជាបន្តបន្ទាប់ និងលក់រថយន្តយកប្រាក់សងគេតែប៉ុណ្ណោះ ហើយលោកប្តីចង់ទៅណាទៅៗ គាត់លែងយកទៀតហើយ ។ គាត់បន្តថា នាងជាស្ត្រីម៉េម៉ាយដែលប្តីបែកបាក់គ្នាប្រមាណ១៧ឆ្នាំមកហើយ គាត់ក៏រៀបការជាមួយប្តីថ្មីរូបនោះ ដោយពុំមានកូនទេព្រោះគាត់មានជំងឺខ្សោយ។ ការរស់នៅជាមួយគ្នា ប្តីតែងតែលួចមានស្រីធ្វើបាបចិត្តគាត់ឱ្យទឹកភ្នែករាល់ថ្ងៃ តែគាត់នៅតែស្រលាញ់ប្តី។
ស្ត្រីជាប្រពន្ធបន្តទៀតថា កាលពីឆ្នាំ២០០៩ ព្រោះតែស្រី ប្តីជួបគ្រោះថ្នាក់ចរាចរណ៍បាក់ជើង គាត់ខំព្យាបាល និងមើលតែប្តីរហូតជា ហើយរយៈពេលប្រមាណ៣ឆ្នាំមុននេះប្តីមានជំងឺទឹកនោមផ្អែមក៏នៅតែខំថែទាំប្តី តែលោកប្តីមិនយកចិត្តទុកដាក់នោះទេ ទោះបីជាគាត់មានជំងឺបេះដូង លើសឈាមក៏មិនខ្វល់នៅទៅលួចមានស្រីដេកចោលផ្ទះ ហើយគាត់តាមចាប់បានទាំងលេខទូរស័ព្ទ និងទាក់ទងគ្នាតាមហ្វេសប៊ុកទៀតផង។
ស្ត្រីជាប្រពន្ធបន្តថា នេះជាលើកទី៤ ដែលគាត់តាមទាន់ប្តីលួចមានស្រីនៅក្នុងរយៈពេល ប្រមាណ១ឆ្នាំនេះ ព្រមទាំងណែនាំអប់រំឱ្យឈប់ទាក់ទងស្រី តែលោកប្តីមិនស្តាប់ ហើយកូនគាត់ក៏បំពាក់ប្រព័ន្ធ GPS ចាប់ភស្តុតាងប្តី ដើម្បីលែងលះគ្នា។ លុះមុនថ្ងៃកើតហេតុ២ថ្ងៃលោកប្តីប្រាប់គាត់ថា ទៅខេត្តកំពតដោយឱ្យអ៊ុតខោអាវយ៉ាងស្អាត តែមិននឹកស្មានថាណាត់ជួបស្រីដេកផ្ទះសំណាក់បែបនេះ។
គាត់បន្តទៀតថា តាមរយៈ GPS នៅម៉ោងប្រមាណជាង៩និង៣០នាទីយប់ ថ្ងៃទី២៨ មេសា គាត់ក៏តាមប្តីរកឃើញប្តីនាំស្រីមកដេកផ្ទះសំណាក់ ហើយគាត់ក៏ត្រឡប់ទៅផ្ទះវិញ លុះម៉ោងប្រមាណ៣ទៀបភ្លឺក៏ត្រឡប់មកចាំរហូតដល់ម៉ោងប្រមាណ៦ព្រឹកទើបចេញពីផ្ទះសំណាក់ ហើយត្រូវកូនប្រុសចុច GPS ពន្លត់ម៉ាស៊ីន រួចឃាត់សហាយស្មាន់តែម្តង ។
តាមនារីជាស្ត្រីស្នេហ៍ឱ្យដឹងថា នាងមានទំនាក់ទំនងជាមួយបុរសរូបនោះប្រមាណ១ខែតាមហ្វេសប៊ុក ទើបតែណាត់ជួបគ្នាជាលើកទី១ ហើយការទាក់ទងគ្នាបុរសនេះប្រាប់ថា ខ្លួនគ្មានប្រពន្ធទេរស់នៅជាមួយឪពុក ហើយតែងតែទាក់ទងគ្នាតាមរយៈឆាត ។ ប្រមាណ២ថ្ងៃមុន បុរសរូបនោះក៏ណាត់នាងមកភ្នំពេញដោយប្រាប់ថា ឱ្យលុយ ហើយព្រោះតែប្រាក់ ណាមួយឪពុកឈឺក៏ធ្វើដំណើរមកដល់ភ្នំពេញ លុះពេលល្ងាចត្រូវបុរសនេះចាំទទួលនៅគល់ស្ពានជ្រោយចង្វារ ក៏នាំគ្នាមកដេកផ្ទះសំណាក់ស្រាប់តែប្រពន្ធមកទាន់តែម្តង ។
តាមព័ត៌មានឱ្យដឹងទៀតថា នៅព្រឹកនោះ ស្ត្រីជាប្រពន្ធក៏ឃាត់ខ្លួន (នារីជាស្រីស្នេហ៍) នាំទៅប៉ុស្តិ៍ស្រះចក តែនគរបាលក៏ណែនាំឱ្យទៅប្តឹងនៅមូលដ្ឋាន ក្រោយមកក៏បានលែងនារីនោះឱ្យត្រឡប់ទៅផ្ទះវិញ។ ដោយឡែកចំណែករថយន្តត្រូវបានកូនប្រុសហៅរថយន្តមកស្ទួចយកទៅផ្ទះ ព្រោះរថយន្តនោះអត់ឆេះដោយសារបុរសដែលជាឪពុកយកកូនសោរទៅបាត់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
