ក្រុងប៉េកាំង៖ នាព្រឹកថ្ងៃទី ២៨ ខែមេសា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានជួបពិភាក្សាការងារជាមួយលោក Li Jinge អនុប្រធានក្រុមហ៊ុន Huawei នៅទីក្រុងប៉េកាំង។ នៅក្នុងកិច្ចជំនួបនោះសម្តេចតេជោ និងលោកអនុប្រធានក្រុមហ៊ុន Huawei បានផ្លាស់ប្តូរចក្ខុវិស័យអំពីការអភិវឌ្ឍន៍សេដ្ឋកិច្ចឌីជីថលនៅកម្ពុជា ក៏ដូចជាការផ្លាស់ប្តូរនៃឌីជីថលរបស់ប្រទេសកម្ពុជា ហើយសម្តេចតេជោក៏បានចូលរួមជាសក្ខីភាពនៃពិធីចុះហត្ថលេខាលើអនុស្សរណៈយោគយល់គ្នាស្តីអំពីបច្ចេកវិទ្យាទូរគមនាគមន៍ជំនាន់ទី៥ (5G) រវាងក្រុមហ៊ុន Huawei Technologies (Cambodia) Co., Ltd និងទូរគមនាគមន៍កម្ពុជាផងដែរ។
លោក Li Jinge បានសម្តែងការអបអរសាទរចំពោះរាជរដ្ឋាភិបាលអាណត្តិថ្មី ដែលសម្រេចបាននូវសមិទ្ធផលគួរឱ្យកត់សម្គាល់លើគ្រប់វិស័យក្នុងរយៈពេលកន្លះឆ្នាំចុងក្រោយនេះ។ ជាមួយនឹងការអភិវឌ្ឍសង្គម និងសេដ្ឋកិច្ចយ៉ាងឆាប់រហ័សនេះ ប្រទេសកម្ពុជាបានក្លាយជាអ្នកត្រួសត្រាយមួយក្នុងចំណោមបណ្តាប្រទេសនៅអាស៊ីអាគ្នេយ៍។
លោក Li Jinge បានមានប្រសាសន៍ថា ក្រុមហ៊ុន Huawei បានចាប់ផ្តើមអាជីវកម្មនៅកម្ពុជាចាប់តាំងពីឆ្នាំ ១៩៩៩ មកម៉្លេះ ហើយឆ្នាំនេះគឺជាខួបគម្រប់ ២០ ឆ្នាំនៃក្រុមហ៊ុន Huawei នៅកម្ពុជា។ ក្រុមហ៊ុន Huawei សូមគោរពថ្លែងអំណរគុណយ៉ាងជ្រាលជ្រៅចំពោះការគាំទ្រ និងការផ្តល់អនុសាសន៍ណែនាំពីសំណាក់សម្តេចតេជោនាយករដ្ឋមន្ត្រី និងរាជរដ្ឋាភិបាលកម្ពុជានាពេលកន្លងមក ហើយនឹងមានកិត្តិយសក្នុងការធ្វើជាសក្ខីភាព និងចូលរួមចំណែកចំពោះការរីកចម្រើននៃវិស័យឧស្សាហកម្មបច្ចេកវិទ្យាទូរគមនាគមន៍ និងព័ត៌មានវិទ្យា (ICT) នៃកម្ពុជា។ ក្រុមហ៊ុន Huawei កោតសរសើរយ៉ាងខ្លាំងចំពោះទស្សនវិស័យរបស់សម្តេចតេជោនាយករដ្ឋមន្រ្តីអំពីសារៈសំខាន់នៃសេដ្ឋកិច្ចឌីជីថល និងប្រជាជនអេឡិចត្រូនិច (E-people)។ ក្រុមហ៊ុន Huawei នឹងខិតខំប្រឹងប្រែងដើម្បីបណ្តុះបណ្តាលធនធានមនុស្សផ្នែកបច្ចេកវិទ្យាទូរគមនាគមន៍ និងព័ត៌មានវិទ្យា និងគាំទ្រដល់ការអនុវត្តយ៉ាងពេញលេញនូវ «យុទ្ធសាស្ត្រចតុកោណ» នៅក្នុងប្រទេសកម្ពុជា។
សម្តេចតេជោនាយករដ្ឋមន្ត្រីបានមានប្រសាសន៍ថា សម្តេចពិតជាបានយកចិត្តទុកដាក់យ៉ាងខ្លាំងចំពោះការអភិវឌ្ឍវិស័យ ICT របស់កម្ពុជា ហើយសម្តេចគឺជានាយករដ្ឋមន្ត្រីនៃបច្ចេកវិទ្យាទូរគមនាគមន៍ និងព័ត៌មានវិទ្យា (ICT)។ សម្តេចតេជោបានប្រៀបធៀបអ៊ិនធឺណិតទៅនឹងផ្លូវល្បឿនលឿននៃឌីជីថល ហើយប្រទេសកម្ពុជាក៏គួរតែសង្កត់ធ្ងន់លើការអភិវឌ្ឍសមត្ថភាពទាក់ទងនឹងអ៊ីនធឺណិតនេះផងដែរ។ ប្រទេសកម្ពុជាសង្ឃឹមថា នឹងបានប្រើប្រាស់នូវបច្ចេកវិទ្យាចុងក្រោយបំផុត ដើម្បីជួយប្រទេសកម្ពុជាក្នុងការបង្កើនល្បឿនអ៊ីនធឺណិត។
ក្នុងឆ្នាំ២០១៨ ជាលើកដំបូងដែលប្រាក់ចំណូលពីការលក់របស់ក្រុមហ៊ុន Huawei បានកើនឡើងលើសពី ១០០ ពាន់លានដុល្លារអាមេរិក ពោលគឺកើនឡើង ១៩,៥% ធៀបនឹងឆ្នាំមុនហើយការចំណាយលើផ្នែកស្រាវជ្រាវ និងអភិវឌ្ឍន៍ (R & D) មានចំនួន ១៤,១% នៃចំណូលសរុបប្រចាំឆ្នាំ។ ការបន្តវិនិយោគក្នុងផ្នែកស្រាវជ្រាវ និងអភិវឌ្ឍន៍បានពង្រឹងភាពជាអ្នកដឹកនាំរបស់ក្រុមហ៊ុន Huawei ទៅលើផលិតផលនិងដំណោះស្រាយបច្ចេកវិទ្យា។ ជាពិសេសនៅក្នុងវិស័យបច្ចេកវិទ្យាទូរគមនាគមន៍ជំនាន់ទី5 (5G) ក្រុមហ៊ុន Huawei បានទទួលបានកិច្ចសន្យាពាណិជ្ជកម្មនៃបច្ចេកវិទ្យាទូរគមនាគមន៍ជំនាន់ទី៥ (5G) ចំនួន ៤០ នៅទូទាំងពិភពលោក និងបាននាំចេញ ៧០.០០០ ស្ថានីយ៍មូលដ្ឋាននៃបច្ចេកវិទ្យាទូរគមនាគមន៍ជំនាន់ទី៥ (5G)។ Huawei គឺជាក្រុមហ៊ុនផលិតតែមួយគត់នៅក្នុងឧស្សាហកម្មដែលអាចផ្តល់នូវផលិតផល និងដំណោះស្រាយដ៏ពេញលេញនៃបច្ចេកវិទ្យាទូរគមនាគមន៍ជំនាន់ទី៥ (5G)។ បច្ចេកវិទ្យារបស់ Huawei គឺបានដើរលឿនជាងដៃគូប្រកួតប្រជែងរបស់ខ្លួនយ៉ាងហោចណាស់ពី ១២ ទៅ ១៨ ខែ។
ក្រុមហ៊ុន Huawei ជឿជាក់ថាឆ្នាំ២០១៩ នឹងជាឆ្នាំដំបូងនៃការអភិវឌ្ឍន៍បច្ចេកវិទ្យាទូរគមនាគមន៍ជំនាន់ទី៥ (5G) របស់កម្ពុជា។ ក្រុមហ៊ុនក៏មានឆន្ទៈនាំយកបច្ចេកវិទ្យា និងផលិតផល 5G ចុងក្រោយបំផុតមកកាន់ប្រទេសកម្ពុជា ក៏ដូចជាចែករំលែកនូវបទពិសោធន៍ជាក់ស្តែងជាសកលរបស់ក្រុមហ៊ុនជាមួយទូរគមនាគមន៍កម្ពុជា ដើម្បីកែលម្អកម្រិតហេដ្ឋារចនាសម្ព័ន្ធឌីជីថលរបស់កម្ពុជា បង្កើតប្រព័ន្ធឌីជីថលកម្ពុជា និងគាំទ្រដល់បដិវត្តន៍ឧស្សាហកម្មជំនាន់ទី៤។ សម្តេចតេជោនាយករដ្ឋមន្រ្តីបានមានប្រសាសន៍ថា៖
«ក្រុមហ៊ុន Huawei គឺជាមិត្តចាស់ដ៏ល្អ ហើយខ្ញុំមានសេចក្តីរីករាយដោយបានជួបជាមួយក្រុមហ៊ុន Huawei នៅថ្ងៃនេះ និងបានចូលរួមជាសក្ខីភាពនៃពិធីចុះហត្ថលេខាលើអនុស្សរណៈយោគយល់គ្នារវាងក្រុមហ៊ុន Huawei Technologies (Cambodia) Co.Ltd និង ទូរគមនាគមន៍កម្ពុជាសម្រាប់កិច្ចសហប្រតិបត្តិការលើបច្ចេកវិទ្យាទូរគមនាគមន៍ជំនាន់ទី៥ (5G)។ ខ្ញុំមានសេចក្តីរំពឹងថា ប្រទេសកម្ពុជាអាចស្ថិតនៅក្នុងចំណោមបណ្តាប្រទស ដែលនឹងចាប់ផ្តើម និងប្រើប្រាស់បច្ចេកវិទ្យាទូរគមនាគមន៍ជំនាន់ទី៥ (5G) ដំបូងគេនៅក្នុងតំបន់អាស៊ានក្នុងពេលអនាគតដ៏ខ្លី»។
ក្រោមសក្ខីភាពដ៏ខ្ពង់ខ្ពស់នៃសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងចូលរួមដោយលោក Li Jin’ge អនុប្រធានក្រុមហ៊ុន Huawei ឯកឧត្តម សុខ ពុទ្ធិវុធ ប្រធានក្រុមប្រឹក្សាភិបាលនៃទូរគមនាគមន៍កម្ពុជា និងលោក Li Xiongwei នាយកប្រតិបត្តិនៃក្រុមហ៊ុន Huawei Technologies (Cambodia) Co. , Ltd. បានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើបច្ចេកវិទ្យាទូរគមនាគមន៍ជំនាន់ទី៥ (5G) នៅកម្ពុជា។ ភាគីទាំងពីរនឹងចូលរួមជាមួយគ្នា ដើម្បីបង្កើតប្រព័ន្ធអេកូដ៏ល្អសម្រាប់ការអភិវឌ្ឍន៍បច្ចេកវិទ្យាទូរគមនាគមន៍ជំនាន់ទី៥ (5G) របស់កម្ពុជា និងជួយប្រទេសកម្ពុជាក្លាយជាអ្នកត្រួសត្រាយលើបច្ចេកវិទ្យាទូរគមនាគមន៍ជំនាន់ទី៥ (5G) នៅក្នុងតំបន់អាស៊ាន។
បច្ចុប្បន្នទូរគមនាគមន៍កម្ពុជាកំពុងខិតខំប្រឹងប្រែងកសាងសមត្ថភាពរបស់ខ្លួនទៅរកកម្រិតមួយទៀត ដើម្បីបំពេញតាមការអភិវឌ្ឍបច្ចេកវិទ្យាទូរគមនាគមន៍ព័ត៌មានវិទ្យា (ICT) ពិភពលោក និងដើម្បីផ្តល់នូវបទពិសោធន៍ប្រើប្រាស់អ៊ិនធឺណិតយ៉ាងឆាប់រហ័សដល់ប្រជាជន និងភ្ញៀវទេសចរនៅកម្ពុជា៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
