រាជធានីភ្នំពេញ ៖ យុវជនបួននាក់ក្នុងចំណោមបក្សពួក៦ទៅ៧នាក់ទៀត ត្រូវបានសមត្ថកិច្ចនាំខ្លួនមកអោយបោសសំអាតប៉ុស្តិ៍នគរបាលរដ្ឋបាលភ្នំពេញថ្មី បន្ទាប់ពីវាយតប់គ្នារត់ចោលម៉ូតូ រួចរត់ទៅប្តឹងសមត្ថកិច្ចថា គេវាយប្លន់យកម៉ូតូទៅវិញបង្កអោយមានការភ្ញាក់ផ្អើលឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៤ ខែមេសា ឆ្នាំ២០១៩ ត្រង់ចំណុចខាងមុខក្លឹបកម្សាន្តហ្ស៊ូក ក្លឹប តាមបណ្ដោយផ្លូវ១០៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញយុវជនទាំងបួននាក់ខាងលើ និងបក្សពួក៦ទៅ៧នាក់ទៀតបានជិះម៉ូតូ៤ទៅ៥គ្រឿងចេញមកពីក្នុងក្លឹបកម្សាន្តខាងលើ ។
យុវជនទាំងនោះប្រដាប់ដោយខ្សែក្រវ៉ាត់ដេញវាយគ្នាជាមួយ និងយុវជនមួយក្រុមផ្សេងទៀត ដែលនៅកន្លែងកើតហេតុខាងលើ ប៉ុន្តែយុវជនទាំងបួននាក់រួម និងបក្សពួកវាយមិនឈ្នះភាគីម្ខាងទៀតក៏បាននាំគ្នារត់គេចខ្លួនបាត់ជើងសព្រាត បន្សល់ទុកម៉ូតូមួយគ្រឿងម៉ាកស៊ុយស័រគីឡែត ពណ៌ស ពាក់ស្លាកលេខ ភ្នំពេញ1GR-8941នៅកន្លែងកើតហេតុខាងលើ ។
ភ្លាមៗនោះក៏មានសន្តិសុខយាមនៅក្លឹបកម្សាន្តខាងលើបានចេញមកអន្តរាគមន៍ បណ្តាលឲ្យក្រុមយុវជនដែលជាភាគីម្ខាងទៀតរត់គេចខ្លួនបាត់ស្រមោលផងដែរ ។ សន្តិសុខក៏បានទៅយកម៉ូតូខាងលើដែលយុវជនទាំងបួននាក់ និងបក្សពួកបានបន្សល់ទុកនៅកន្លែងកើតហេតុ យកទៅរក្សាទុកនៅក្នុងក្លឹបកម្សាន្តខាងលើ ។
ប្រភពដដែលបានបន្តថា បន្ទាប់មកយុវជនទាំងបួននាក់ខាងលើ និងបក្សពួកក៏បាននាំជិះម៉ូតូទៅប្តឹងសមត្ថកិច្ចចរាចរណ៍ផ្លូវគោកដែលប្រចាំការនៅគោលដៅខាងលើក្រោមស្ពានអាកាសផ្សារដីហុយថា ខ្លួនត្រូវបានគេវាយប្លន់យកម៉ូតូនៅត្រង់ចំណុចកើតហេតុខាងលើ ។ សមត្ថកិច្ចចរាចរណ៍ផ្លូវគោកនៅគោលដៅនោះក៏ប្រញាប់ប្រញាល់រាយការណ៍តាមវិទ្យុទាក់ទង (ID) ទៅប្រាប់សមត្ថកិច្ចមូលដ្ឋានបង្កឲ្យមានការភ្ញាក់ផ្អើលចុះមកធ្វើការនាំយុវជនទាំងនោះទៅសាកសួរដល់កន្លែងកើតហេតុភ្លាមៗតែម្ដង ។ ខណៈពេលដែលសមត្ថកិច្ចមូលដ្ឋានចុះទៅដល់សន្តិសុខយាមក្លឹបកម្សាន្តហ្ស៊ូក ក្លឹប បានប្រាប់ទៅកាន់សមត្ថកិច្ចវិញថា«មិនមែនជាករណីវាយប្លន់យកម៉ូតូនោះទេ គឺជាករណីឈ្លោះទាស់ទែងគ្នាដោយក្រុមយុវជនទាំងនោះបានដេញវាយទៅលើក្រុមយុវជនម្ខាងទៀត តែដោយក្រុមយុវជនម្ខាងទៀតមានគ្នាច្រើន ហើយវាយមិនឈ្នះយុវជនទាំងបួននាក់ និងបក្សពួកខាងលើក៏នាំគ្នារត់ចោលម៉ូតូម្តងទៅ» ។
ក្រោយមកសន្តិសុខក៏បានយកម៉ូតូរបស់យុវជនខាងលើប្រគល់ទៅឲ្យសមត្ថកិច្ចមូលដ្ឋានយកទៅរក្សាទុកបន្ត។ ក្រោយពេលកើតហេតុយុវជនទាំងបួននាក់ខាងលើត្រូវបានសម្ថកិច្ចនាំខ្លួនយកទៅប៉ុស្តិ៍នគរបាលរដ្ឋបាលភ្នំពេញថ្មី ចំណែកឯបក្សពួកផ្សេងទៀតបានរត់គេចខ្លួនបាត់បន្ទាប់ពីសមត្ថកិច្ចធ្វើការសាកសួរនាំដឹងរឿង ។ ដោយឡែកចំពោះយុវជនទាំងបួននាក់ខាងលើ ត្រូវបានសមត្ថកិច្ចអប់រំពិន័យ អោយបោសសម្អាតប៉ុស្តិ៍នគរបាលរដ្ឋបាលភ្នំពេញថ្មីឲ្យស្អាតរង់ចាំព្រឹកស្អែកទាក់ទងហៅអាណាព្យាបាលឲ្យមកធានាយកត្រឡប់ទៅផ្ទះវិញ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]