ក្មេងស្រីអភ័ព្វម្នាក់ ស្លាប់ព្រោះតែប្រតិកម្មជាមួយនឹងថ្នាំដុសធ្មេញម្យ៉ាង

អាមេរិក៖ ថ្មីៗនេះក្មេងស្រីអភ័ព្វអាយុ ១១ឆ្នាំម្នាក់ បានស្លាប់ដោយសារតែប្រតិកម្មជាមួយនឹងថ្នាំដុសធ្មេញម្យ៉ាង ដែលផ្សំចេញពីសារធាតុទឹកដោះគោ។ ហេតុការណ៍ដ៏សោកសៅនេះបានកើតឡើងក្នុងរដ្ឋកាលីហ្វញ៉ា សហរដ្ឋអាមេរិក។

មុនពេលកើតហេតុ ម្តាយក្មេងស្រីឈ្មោះ Monique Altamirano បាននាំកូនស្រីពៅឈ្មោះ Denise Saldate ទៅពេទ្យធ្មេញ ហើយគ្រូពេទ្យបានឱ្យថ្នាំដុសធ្មេញម្យ៉ាងឈ្មោះ MI Paste One ដើម្បីជួយឱ្យធ្មេញនាងរឹងមាំ។ 

ក្រោយមកនៅពេលល្ងាច ក្មេងស្រី Denise ចាប់ផ្តើមប្រើប្រាស់ថ្នាំដុសធ្មេញនេះជាលើកដំបូង ហើយភ្លាមៗនោះ នាងមានអារម្មណ៍ថាដូចជាមិនសូវស្រួលខ្លួនយកតែម្តង។ បបូរមាត់នាងប្រែជាខៀវ ហើយនាងបានរត់ទៅរកម្តាយនាងយ៉ាងលឿន។ ពេលនោះអ្នកស្រី Monique ដឹងថា កូនស្រីគាត់ប្រាកដជាមានប្រតិកម្មជាមួយនឹងថ្នាំដុសធ្មេញនេះហើយ។

ដូច្នេះម្តាយនាងបានយកនាងដាក់លើគ្រែ ហើយគាត់ក៏រត់សំដៅទៅបន្ទប់ទទួលភ្ញៀវដើម្បីយកថ្នាំ EpiPen មកចាក់ឱ្យនាង។ ហើយគាត់បានប្រាប់កូនស្រីច្បងគាត់ឱ្យតេហៅឡានពេទ្យជាបន្ទាន់។

ខណៈពេលកំពុងតែរង់ចាំរថយន្តសង្រ្គោះ អ្នកស្រី Monique បានធ្វើចលនាបេះដូង ឬ CPR ឱ្យកូនស្រី Denise ដើម្បីឱ្យនាងងាយស្រួលដកដង្ហើម។ ក្រោយមករថយន្តសង្រ្គោះក៏បានមកដល់ ហើយបញ្ជូនក្មេងស្រីនេះទៅកាន់មន្ទីរពេទ្យដើម្បីសង្រ្គោះ ប៉ុន្តែជាអកុសលក្មេងស្រីរូបនេះបានស្លាប់បាត់ជីវិតបាត់ទៅហើយ។

អ្នកស្រី Monique បាននិយាយថា៖

«កូនស្រីពៅខ្ញុំគឺជាពន្លឺនៃជីវិតរបស់ខ្ញុំ ហើយខ្ញុំពិតជាស្រលាញ់នាងខ្លាំងណាស់។» 

គូសបញ្ជាក់ផងដែរ មូលហេតុដែលក្មេងស្រីនេះស្លាប់ ព្រោះតែនាងមានប្រតិកម្មជាមួយនឹងសារធាតុទឹកដោះគោ។ ដូច្នេះនាងមិនអាចហូបទឹកដោះគោ ឬក៏ប្រើប្រាស់របស់អ្វីមួយដែលមានសារធាតុផ្សំពីទឹកដោះគោបាននោះទេ។

អស់រយៈពេលជាច្រើនឆ្នាំមកហើយ ដែលអ្នកស្រី Monique តែងតែពិនិត្យមើលម៉ាកថ្នាំដុសធ្មេញរបស់កូនស្រីគាត់ ហើយគាត់មិនដែលឃើញថ្នាំដុសធ្មេញណាមួយ ដែលផ្សំចេញពីសារធាតុទឹកដោះនោះទេ។ ដូច្នេះ គាត់ក៏ជឿជាក់ថា គ្មានថ្នាំដុសធ្មេញណាផ្សំចេញពីសារធាតុទឹកដោះនោះទេ។ ហើយគាត់ក៏មិនបានពិនិត្យមើលថ្នាំដុសធេ្មញ ដែលទន្តពេទ្យបានឱ្យដែរ។ 

«ខ្ញុំមិនបានពិនិត្យមើលសារធាតុផ្សំចេញពីថ្នាំដុសធ្មេញនេះទេ។ ពេលនោះកូនស្រីខ្ញុំពិតជារំភើបចិត្តណាស់ ពេលនាងទទួលបានថ្នាំដុសធ្មេញពិសេសនេះ។» (សម្តីរបស់អ្នកស្រី Monique)

បន្ទាប់ពីមានឧប្បត្តិហេតុនេះកើតឡើងហើយ អ្នកស្រី Monique បានផ្តាំដល់ក្រុមគ្រួសារដែលមានសមាជិកមានជំងឺប្រតិកម្មជាមួយនឹងចំណីអាហារ សូមប្រយ័ត្នឱ្យបានខ្ពស់ និងត្រូវពិនិត្យរាល់សារធាតុផ្សំទាំងអស់ មុនពេលយកទៅប្រើប្រាស់ ឬទទួលទាន៕