ចិន៖ ដើម្បីមិនចំណាយពេលច្រើនទៅធ្វើការ បុរសម្នាក់រស់នៅក្នុងប្រទេសចិន បានបែកគំនិត ហែលទឹកឆ្លងទន្លេទៅធ្វើការជារៀងរាល់ថ្ងៃ ហើយបច្ចុប្បន្នលោកកំពុងតែល្បី និងទាក់ទាញចំណាប់អារម្មណ៍របស់មនុស្សម្នាជាច្រើន។
យោងតាមប្រភពព័ត៌មានចិនបានឱ្យដឹងថា បុរសរូបនេះមានឈ្មោះ Zhu Biwu អាយុ ៥៣ឆ្នាំ។ ពីមុនលោកត្រូវចំណាយពេលវេលាជាង ១ម៉ោងដើម្បីទៅធ្វើការ ដោយជិះរថភ្លើងពីផ្ទះរបស់លោក ក្នុងស្រុក ហាន់យ៉ាង ក្រុងអ៊ូហាន ខេត្តហ៊ូប៉ី។
ប៉ុន្តែព្រោះតែចំណាយពេលវេលាក្នុងការធ្វើដំណើរច្រើនពេក ដូច្នេះលោកក៏បែកគំនិត ហែលទឹកទៅធ្វើការយកតែម្តង។ លោកហែលទឹកឆ្លងទន្លេយ៉ង់ហ្សេ ដែលមានចម្ងាយជាង ២.២គីឡូម៉ែត្រទៅធ្វើការ។ ដូច្នេះ លោកចំណេញបាន៣០នាទី និងចំណេញទាំងបានសុខភាពផងដែរ។
នៅក្នុងវីដេអូថតដោយក្រុមសារព័ត៌មានចិនច្បាស់ការណ៍មួយបានបង្ហាញថា លោក Zhu ដែលកំពុងតែធ្វើការងារជាអ្នកគ្រប់គ្រងនៅក្នុងក្រុមហ៊ុនឯកជនមួយកន្លែង កំពុងតែរៀបចំផ្លាស់ប្តូរសំលៀកបំពាក់ប្រហែលជាម៉ោងជាង៧ព្រឹក ដើម្បីហែលទឹកទៅធ្វើការ។
លោកបានយករបស់របរទាំងអស់របស់លោក រួមទាំងសំលៀកបំពាក់ការងារ ស្បែកជើង និងរបស់ផ្សេងៗទៀតដាក់ចូលទៅក្នុងថង់ការពារទឹកម្យ៉ាង។
បន្ទាប់ពីរៀបចំរួចរាល់ហើយ លោកក៏ចាប់ផ្តើមហែលទឹកពីទន្លេយ៉ង់ហ្សេយកតែម្តង។
លោកបាននិយាយថា លោកបានហែលទឹកទៅធ្វើការបែបនេះតាំងពីឆ្នាំ២០០៨មកម្ល៉េះ ហើយការធ្វើបែបនេះពិតជាធ្វើឱ្យលោកមានសុខភាពល្អ រាងកាយស្រស់ស្អាត មាំងមួនថែមទៀត។
កាលពីមុនលោក Zhu ត្រូវបានគ្រូពេទ្យរកឃើញថា លោកមានជំងឺទឹកនោមផ្អែមប្រភេទ២ ក្នុងឆ្នាំ១៩៩៩។ ពេលនោះលោកមានទម្ងន់ជាង ១០០គីឡូក្រាម។ ដូច្នេះលោកក៏ស្វែងរកវិធីដើម្បីសម្រកទម្ងន់។
នៅក្នុងឆ្នាំ២០០៤ លោកចាប់ផ្តើមហែលទឹកទន្លេ ហើយបានហ្វឹកហាត់ខ្លួនតាំងពីពេលនោះមកជាហូហែ។ លោកមិនដែលទៅធ្វើការយឺតម៉ោងនោះទេ។
លោកបានប្រាប់ក្រុមសារព័ត៌មានថា៖
«ទម្ងន់ និងកម្រិតជាតិស្កររបស់ខ្ញុំបានត្រលប់ទៅជាធម្មតាវិញ ហើយសុខភាពរបស់ខ្ញុំស្រាប់តែល្អប្រសើរតាំងពីពេលនោះមក។»
លោកបាននិយាយបន្ថែមទៀតថា៖
«អ្នកដែលចង់ធ្វើដូចខ្ញុំ ត្រូវតែឆ្លងកាត់ហ្វឹកហាត់ហែលទឹកឱ្យស្ទាត់ជំនាញជាមុនសិន។»
ក្រោយមករឿងនេះបានល្បីកក្រើកពេញបណ្តាញសង្គម Weibo។ មនុស្សម្នាជាច្រើនបានសរសើរលោកថា លោកពិតជាក្លាហានពិតមែន។ អ្នកខ្លះក៏បាននិយាយថា ការធ្វើបែបនេះចំណេញទាំងពេលវេលា ថវិកា និងសុខភាពថែមទៀត។ ប៉ុន្លែអ្នកខ្លះក៏បាននិយាយថា បើទោះបីមិនស្ទុះផ្លូវក៏ដោយ ប៉ុន្តែលោកអាចមានហានិភ័យក្នុងការលង់ទឹកស្លាប់ក៏ថាបានដែរ។
គូសបញ្ជាក់ផងដែរ លោក Zhu មិនមែនជាមនុស្សតែម្នាក់គត់ដែលបែកគំនិតឆ្លងទន្លេយ៉ង់ហ្សេដោយការហែលទឹកនោះទេ។ ជាក់ស្តែងក៏មានបុរសម្នាក់ជាបុគ្គលិកលក់ធានារ៉ាបរង បែកគំនិតឆ្លងទន្លេយ៉ង់ហ្សេ ដោយការចែវទូកទៅធ្វើការផងដែរ៕
ចង់ជ្រាបច្បាស់ទស្សនាវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
