ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) ថ្លែងថា នៅពាក់កណ្តាលឆ្នាំ២០២៧ នាវាដឹកនាំទិនិញធំៗ អាចដឹកទំនិញត្រង់ចូលចតនៅកំពង់ផែព្រះសីហនុ ដោយមិនបាច់ផ្ទេរទំនិញនៅប្រទេសទី៣ ខណៈតម្លៃចុះ ២០០ដុល្លារក្នុងមួយទូរកុងតឺន័រ ដែលនេះជាអ្វីៗដែលរាជរដ្ឋាភិបាលខិតខំប្រឹងប្រែងធ្វើ។

ឯកឧត្តមឧបនាយករដ្ឋមន្ត្រី ស៊ុន ចាន់ថុល បានថ្លែងក្នុងសន្និសីទសារព័ត៌មានស្តីពី «អត្រាពន្ធគយថ្មី ក្នុងការនាំចូលពីកម្ពុជា ទៅសហរដ្ឋអាមេរិក បន្ទាប់ពីការស៊ើបអង្កេតអនុលោមភាព នៃមាត្រា ៣០១ ច្បាប់ពាណិជ្ជកម្ម សហរដ្ឋអាមេរិក» ដែលបានរៀបចំធ្វើនៅស្តីការក្រុមប្រឹក្សាអភិវឌ្ឍន៍កម្ពុជា (CDC) ថា រាជរដ្ឋាភិបាលកម្ពុជា បានដាក់ទុនច្រើនណាស់ក្នុងការកសាងប្រព័ន្ធហេដ្ឋារចនាសម្ព័ន្ធ ផ្លូវ ស្ពាន, ទាក់ទាញគម្រោងវិនិយោគដាក់ទុនសាងសង់ផ្លូវល្បឿនលឿនភ្នំពេញ-ក្រុងព្រះសីហនុ, បានបើកការដ្ឋានសាងសង់គម្រោងព្រែកជីកហ្វូណន, យើងកំពុងតែពង្រីកកំពង់ផែទឹកជ្រៅក្រុងព្រះសីហនុជំហានទី១ ដែលមានជម្រៅទឹក ១៤ម៉ែត្រកន្លះ ដែលអនុញ្ញាតឲ្យនាវាប្រហែលជា ៩៣% ដែលធ្វើដំណើរនៅតំបន់អាស៊ីប៉ាស៊ីហ្វិកនេះ អាចចូលចតនៅកំពង់ផែយើងបាន។

ឯកឧត្តមឧបនាយករដ្ឋមន្ត្រី ស៊ុន ចាន់ថុល គូសបញ្ជាក់ទៀតថា សព្វថ្ងៃនេះមានតែនាវា ១៨%ទេ ដែលចូលចតនៅកំពង់ផែស្វយ័តក្រុងព្រះសីហនុ ប៉ុន្តែពេលយើងធ្វើកំពង់ផែទឹកជ្រៅចប់នៅប្រហែលជាឆ្នាំ២០២៧ ខាងមុខនេះ អាចខែ ៤ ខែ ៥ អាចធ្វើចប់ នោះនាវា ៩៣% អាចចូលចតនៅកំពង់ផែក្រុងព្រះសីហនុបាន ហើយតម្លៃនឹងចុះ ២០០ដុល្លារក្នុងមួយទូ ដោយសារយើងដឹកទំនិញត្រង់តែម្ដង ដោយមិនបាច់ផ្ទេរនៅប្រទេសទី៣ នេះជាអ្វីៗដែលរដ្ឋាភិបាលខិតខំប្រឹងប្រែងធ្វើ ដើម្បីប្រកួតប្រជែងតម្លៃបន្ថែមនៅក្នុងតំបន់។

ឯកឧត្តមឧបនាយករដ្ឋមន្ត្រី ស៊ុន ចាន់ថុល ថ្លែងបន្តថា នៅពេលដែលកំពង់ផែទឹកជ្រៅនេះ សាងសង់រួចរាល់ នឹងអាចអនុញ្ញាតឲ្យកប៉ាល់ដែលសមត្ថភាពផ្ទុកកុងតឺន័ររហូតដល់ជាង ៤ពាន់កុងតឺន័រ អាចចូលចតដែលពេលនោះកប៉ាល់ប្រមាណ ៩៣% នៃកប៉ាល់ក្នុងតំបន់អាស៊ី ចូលចតនៅកម្ពុជាបាន ដែលនឹងធ្វើឱ្យតម្លៃដឹកជញ្ជូនទាបជាងមុន ដែលតាមការប៉ាន់ស្មានតម្លៃដឹកជញ្ជូន អាចចុះជាង ២០០ដុល្លារក្នុងមួយកុងតឺន័រ។

លើសពីនេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល បន្ថែមទៀតថា បច្ចុប្បន្ននេះកំពង់ផែស្វយ័តក្រុងព្រះសីហនុ អាចអនុញ្ញាតឱ្យនាវាក្នុងតំបន់អាស៊ីប៉ាស៊ីហ្វិច ចូលបានតែប្រមាណតែ ១៨%ប៉ុណ្ណោះ មានន័យថា ក្នុងចំណោម ១០០កប៉ាល់ អាចចូលចតបានតែ ១៨ ឬ ១៩ កប៉ាល់ និងអនុញ្ញាតឱ្យនាវាដែលផ្តុកកុងតឺន័របានតែ ១៥០០ប៉ុណ្ណោះ។

សូមបញ្ជាក់ថា គម្រោងអភិវឌ្ឍន៍កំពង់ផែទឹកជ្រៅនេះ អាចជាចំណតកប៉ាល់ធំដែលផ្តល់ភាពងាយស្រួលក្នុងការដឹកជញ្ជូន និងកាត់បន្ថយការដឹកជញ្ជូនឱ្យមានតម្លៃទាបនាពេលអនាគតផងដែរ ស្របពេលដែលចំណតកំពង់ផែស្វយ័តក្រុងព្រះសីហនុក្នុងជំហានទី១ ដែលមានប្រវែង ៣៥០ម៉ែត្រ និងជម្រៅទឹក ១៤.៥ម៉ែត្រ ដោយទទួលបានប្រាក់កម្ចីជាង ២០០លានដុល្លារពីជប៉ុន បានចាប់ផ្តើមដំណើរការសាងសង់នៅឆ្នាំ២០២៣៕

ដោយ៖khmerhome