អាមេរិក និយាយថានឹងមិនប្រញាប់ប្រញាល់កិច្ចព្រមព្រៀងពាណិជ្ជកម្មមុនពេលកំណត់ខែសីហានោះទេ

អន្តរជាតិ៖ រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយកាលពីថ្ងៃចន្ទ ទី២១ ខែកក្កដា ថា រដ្ឋបាលលោក Trump កំពុងផ្តល់អាទិភាពដល់គុណភាពនៃកិច្ចព្រមព្រៀងពាណិជ្ជកម្ម ជុំវិញការបំពេញតាមកាលកំណត់ដែលកំពុងតែលេចចេញជារូបរាង។ ខណៈ ប្រទេសនានាកំពុងប្រជែងគ្នាដើម្បីចៀសវាងការយកពន្ធថ្មី ដែលនឹងត្រូវចូលជាធរមាននៅថ្ងៃទី១ ខែសីហា។

លោក Bessent បានប្រាប់ CNBC ថា "យើងនឹងមិនប្រញាប់ប្រញាល់សម្រាប់ជាប្រយោជន៍នៃការធ្វើកិច្ចព្រមព្រៀង"។ នៅពេលសួរថា តើកាលបរិច្ឆេទកំណត់អាចត្រូវបានពន្យារពេលសម្រាប់ប្រទេសដែលចូលរួមក្នុងកិច្ចពិភាក្សាដែរឬទេ លោក បានបញ្ជាក់ថា វាអាស្រ័យលើប្រធានាធិបតី Donald Trump។

លោក បានបន្តថា ប្រសិនបើយើង boomerang ត្រលប់ទៅពន្ធថ្ងៃទី១ ខែសីហា ខ្ញុំគិតថាកម្រិតពន្ធខ្ពស់នឹងដាក់សម្ពាធបន្ថែមទៀតលើប្រទេសទាំងនោះឱ្យមកជាមួយនឹងកិច្ចព្រមព្រៀងកាន់តែប្រសើរឡើង។

អ្នកនាំពាក្យសេតវិមានលោកស្រី Karoline Leavitt បាននិយាយថា លោក Trump អាចនឹងបង្កើនពាណិជ្ជកម្មក្នុងអំឡុងពេលពិភាក្សាជាមួយប្រធានាធិបតីហ្វីលីពីន Ferdinand Marcos Jr នៅសេតវិមានកាលពីថ្ងៃអង្គារ។ លោកស្រី បាននិយាយថា សហរដ្ឋអាមេរិកនៅតែចូលរួមជាមួយរដ្ឋាភិបាលទូទាំងពិភពលោក ហើយអាចប្រកាសកិច្ចព្រមព្រៀងថ្មី ឬចេញការជូនដំណឹងអំពីពន្ធបន្ថែមទៀតមុនថ្ងៃផុតកំណត់ ប៉ុន្តែមិនបានផ្តល់ព័ត៌មានលម្អិតបន្ថែមនោះទេ។

ទន្ទឹមនឹងនោះ អ្នកការទូតសហភាពអឺរ៉ុប បាននិយាយថា ប្លុកនេះកំពុងពិចារណាលើវិធានការប្រឆាំងកាន់តែទូលំទូលាយ ចំពេលមានការធ្លាក់ចុះនៃចក្ខុវិស័យសម្រាប់កិច្ចព្រមព្រៀងមួយ។ ប្រទេសអាល្លឺម៉ង់ និងបណ្តាប្រទេសសហភាពអឺរ៉ុបផ្សេងទៀតកំពុងថ្លឹងថ្លែងលើការប្រើប្រាស់ឧបករណ៍ "ប្រឆាំងការបង្ខិតបង្ខំ" ដែលអាចដាក់កម្រិតការចូលប្រើប្រាស់របស់សហរដ្ឋអាមេរិកចំពោះការដេញថ្លៃសាធារណៈ ឬសេវាកម្មគោលដៅ។

អធិការបតីអាល្លឺម៉ង់ លោក Friedrich Merz បាននិយាយថា "ការចរចាលើកម្រិតនៃពន្ធគយនាពេលនេះ គឺមានភាពខ្លាំងក្លា"។ "ប្រជាជនអាមេរិកច្បាស់ណាស់ថាមិនមានឆន្ទៈក្នុងការយល់ព្រមចំពោះការរៀបចំពន្ធស៊ីមេទ្រី"។

ចំពោះប្រទេសចិន លោក Bessent បាននិយាយថា កិច្ចពិភាក្សានឹងចាប់ផ្តើមឡើងវិញ "ក្នុងពេលដ៏ខ្លីខាងមុខនេះ"។ លោក បានលើឡើងថា ពាណិជ្ជកម្មស្ថិតក្នុងកន្លែងដ៏ល្អមួយ។ ការរពិភាក្សានាពេលអនាគតអាចផ្តោតលើការបន្តទិញប្រេងពីអ៊ីរ៉ង់ និងរុស្ស៊ីដែលត្រូវបានដាក់ទណ្ឌកម្មរបស់ទីក្រុងប៉េកាំង និងសមត្ថភាពលើសរបស់វានៅក្នុងវិស័យដូចជាដែកថែបជាដើម។

លោក Bessent ក៏បាននិយាយថា លោកនឹងលើកទឹកចិត្តអឺរ៉ុបឱ្យធ្វើតាមសហរដ្ឋអាមេរិក ប្រសិនបើខ្លួនអនុវត្តពន្ធបន្ទាប់បន្សំលើរុស្ស៊ី។

ប្រេសិតពាណិជ្ជកម្មកំពូលរបស់ប្រទេសជប៉ុន Ryosei Akazawa បានមកដល់ទីក្រុងវ៉ាស៊ីនតោនកាលពីថ្ងៃចន្ទ សម្រាប់ដំណើរទស្សនកិច្ចលើកទីប្រាំបីរបស់គាត់ក្នុងរយៈពេលបីខែ។ ការធ្វើដំណើររបស់លោកកើតឡើងបន្ទាប់ពីក្រុមចម្រុះដែលកំពុងកាន់អំណាចរបស់នាយករដ្ឋមន្ត្រី Shigeru Ishiba បានទទួលរងនូវការធ្លាក់ចុះនៅក្នុងការបោះឆ្នោតសភាជាន់ខ្ពស់ ដែលមួយផ្នែកដោយសារតែការមិនសប្បាយចិត្តរបស់អ្នកបោះឆ្នោតចំពោះពន្ធរបស់សហរដ្ឋអាមេរិក។

លោក Bessent ដែលបានត្រឡប់ពីដំណើរទស្សនកិច្ចទៅកាន់ប្រទេសជប៉ុនកាលពីថ្ងៃអាទិត្យបាននិយាយថា ទីក្រុងវ៉ាស៊ីនតោនបានផ្តោតលើការធានាកិច្ចព្រមព្រៀងដ៏ល្អបំផុតសម្រាប់ជនជាតិអាមេរិក មិនមែនជាសក្ដានុពលនយោបាយក្នុងស្រុករបស់ប្រទេសជប៉ុននោះទេ។

ប្រភព៖ CNA

ប្រែសម្រួលដោយ៖ MD-Angkor