Neymar សារភាពថារូបគេប្រុងនឹងចាកចេញពី Santos មកលេងនៅក្លិបមួយនេះ

 កីឡា៖ ខ្សែប្រយុទ្ធ Neymar នៃក្លិប Santos បានសារភាពថារូបគេវិះនឹងផ្ទេរទៅក្លិប Flumenese ដែលមានកៅអីលេងពានរង្វាន់ FIFA Club World Cup ទៅហើយ ប៉ុន្តែការចរចាបានបរាជ័យទៅវិញ។

កីឡាករវ័យ៣៣ឆ្នាំរូបនេះនឹងអស់សុពុលភាពកុងត្រាជាមួយនឹងក្លិប Santos នៅឯប្រទេសប្រេស៊ីលដែលជាក្លិបដំបូងរបស់គេ នៅចុងខែមិថុនានេះហើយ ខណៈដែលទម្រង់លេងរបស់គេពិតជាធ្លាក់ចុះខ្លាំង ដោយសារតែរងរបួសញឹកញាប់ខ្លាំងពេក ដែលនេះក៏ជាហេតុផលដែលតាំងពីចាកចេញពីក្លិប Paris Saint-Germain កាលពីឆ្នាំ ២០២៣ បន្ទាប់មកក៏បានចូលរួមជាមួយក្លិបនៅអារ៉ាប់ប៊ីសាអូឌីត Al-Hilal ។

ប៉ុន្តែ របួសបានបន្តញាំញីកីឡាករសញ្ជាតិប្រេស៊ីលរូបនេះ ជាហេតុធ្វើឲ្យគេពុំសូវបានបង្ហាញខ្លួនឲ្យ Al-Hilal មុននឹងត្រូវចាកចេញពីទីនោះនាខែមករាឆ្នាំ២០២៥។

Neymar បានទម្លាយថា៖

"ខ្ញុំវិះនឹងបានលេងនៅ Club World Cup ទៅហើយ គឺមានការចរចាផ្ទេរទៅ Flumenese ហើយពួកយើងជិតនឹងឈានដល់ការព្រមព្រៀងផងដែរតែខ្ញុំសម្រេចចិត្តថានឹងហ្វឹកហាត់នៅទីនេះបន្តទៀត។ ពេលនេះខ្ញុំបានជាសះស្បើយរាងកាយមួយរយភាគរយហើយ ដូច្នេះខ្ញុំត្រូវតែរឹងមាំជាងនេះមុននឹងចូលលេងនៅលើទីលាន។"