សូម្បីពិធីករដ៏ល្បីរបស់ UFC ក៏ទាក់ចិត្តខ្លាំងណាស់ដែរ! ថ្មីៗនេះលោក Whitelaw ស្រាប់តែបានបង្ហោះវីដេអូដែលធឿន ធារ៉ា ផ្តួលសៃយុគ និងអមជាមួយការសរសើរលើធារ៉ាពេញៗមាត់បែបនេះទៀត

កម្ពុជា៖ ប្រិយមិត្តច្បាស់ជាបានស្គាល់ហើយអំពីពិធីករដ៏ល្បីឈ្មោះរបស់ UFC ទាំង ២ រូប គឺលោក Andrew Whitelaw និងលោក Cristopher Garridor ដែលបានមកអត្ថាធិប្បាយការប្រកួតនៅក្នុងមហាព្រឹត្តិការណ៍គុនខ្មែរកាលពីថ្ងៃទី ៥ ខែ វិច្ឆិកា កន្លងទៅ។

យ៉ាងណាមិញ បន្ទាប់ពីពិធីករទាំង ២ បានមកអត្ថាធិប្បាយជាលើកដំបូងនៅក្នុងកម្មវិធីដ៏ធំនាទឹកដីក្នុងប្រទេសកម្ពុជាបែបនេះ ពួកលោកហាក់មានការចាប់អារម្មណ៍ជាខ្លាំងមកលើគុនខ្មែររបស់យើង ហើយមួយវិញទៀតលោកក៏បានចាប់អារម្មណ៍មកលើអ្នកលេងពូថៅដៃពិឃាដធឿន ធារ៉ា ខ្លាំងណាស់ដែរ បន្ទាប់ពីរូបគេបានផ្តួលអ្នកប្រដាល់របស់ប្រេស៊ីល Daniel Torres យ៉ាងរហ័សឱ្យសន្លប់នៅក្នុងទឹកទី ២។

ដោយឡែកថ្មីៗនេះ លោកស្រាប់តែបានបង្ហោះវីដេអូការប្រកួតរបស់ធឿន ធារ៉ាមួយទៀតនៅលើគណនី IG របស់ខ្លួន ដែលនៅក្នុងការប្រកួតនោះគឺ ធារ៉ា បានផ្តួលសៃយុគឱ្យបោះបង់ការប្រកួតនៅទឹកទី ១ នៅក្នុងកម្មវិធី Thai Fight ហើយមួយវិញទៀតលោកថែមទាំងបានភ្ជាប់ជាមួយសារសរសើរធារ៉ាថា " ធឿន ធារ៉ា ពិតជា Rock n Rolla ដ៏ពិតប្រាកដម្នាក់មែន។ ខ្ញុំពិតជាអន្ទះសារណាស់ក្នុងការរង់ចាំទស្សនាការប្រកួតរបស់គាត់ម្តងទៀត។ បុរសម្នាក់នេះគឺជាតារាកំពុងរះរបស់ប្រទេសកម្ពុជា។

គួរបញ្ជាក់ថា នៅថ្ងៃទី ២៣ ខែ វិច្ឆិកា ឆាប់ៗខាងមុខនេះ ធឿន ធារ៉ា នឹងត្រូវមានឈ្មោះប្រកួតនៅក្នុងកម្មវិធីដ៏ធំមួយទៀត ដែលត្រូវប្រកួតទល់នឹងកីឡាករមកពី ៨ ប្រទេសផ្សេងគ្នា ដើម្បីដណ្តើមឡាន Pick Up ខ្លាញ់គោមួយគ្រឿង។