ធ្វើម៉េច បើចិត្តនៅតែនឹកគិតដល់គេគ្រប់ពេល?

ស្នេហា៖ ការលង់ស្រលាញ់លើអ្នកណាម្នាក់វាមិនខុសនោះទេ តែអ្វីដែលខុសនោះ គឺការដែលបណ្តោយឱ្យខ្លួនឯងលង់ជ្រៅទៅៗ ព្រោះថានៅពេលដែលលង់កាន់តែជ្រៅទៅ វាមានតែធ្វើឱ្យខ្លួនឯងទទួលរងនូវការឈឺចាប់ ម្យ៉ាងការស្រលាញ់គេតែម្នាក់ឯង ភាគច្រើនគ្មានសង្ឃឹមឡើយ។

ជាពិសេស សម្រាប់អ្នកដែលស្រលាញ់គេម្នាក់ឯង ឬអ្នកដែលទើបតែបែកបាក់គ្នាហើយថ្មីៗ ប៉ុន្តែចិត្តនៅតែនឹកគិតដល់គេគ្រប់ពេល ហើយចង់រៀនឈប់គិតពីគេ អ្នករាល់គ្នាគួរតែសាកជាមួយនឹងវិធីមួយចំនួន ដូចដែលបានរៀបរាប់នៅខាងក្រោមនេះ អ្នកនឹងអាចឃាត់ឃាំងចិត្តខ្លួនឯងបានខ្លះ។

ធ្វើម៉េច បើចិត្តនៅតែនឹកគិតដល់គេគ្រប់ពេល?

១. ធ្វើខ្លួនឱ្យរវល់

ចង់កាត់បន្ថយចិត្តនឹកនាដល់គេ អ្វីដែលអ្នកគួរធ្វើ គឺធ្វើយ៉ាងណាឱ្យខ្លួនអ្នករវល់ កុំឱ្យខ្លួនឯងទំនេរឱ្យសោះ ដំបូងៗអាចនឹងមិនសូវជាទម្លាប់ ប៉ុន្តែរវល់យូរៗទៅ អ្នកនឹងឈប់ពីគេដោយខ្លួនឯង ហើយវាក៏ជាអ្វីដែលធ្វើឱ្យអ្នកមិនសូវមានការឈឺចាប់ផងដែរ លើសពីនេះ ការធ្វើខ្លួនឱ្យរវល់ វាក៏បានធ្វើឱ្យខ្លួនអ្នក មានការរីកចម្រើនជាងមុនផងដែរ។

២. ព្យាយាមស្រលាញ់ខ្លួនឯងឱ្យបានច្រើន

នៅពេលដែលអ្នកព្យាយាមស្រលាញ់ខ្លួនឯងឱ្យបានច្រើនពេលណា អ្នកនឹងមិនបណ្តោយឱ្យខ្លួនឯង ទៅលង់ស្រលាញ់អ្នកណាម្នាក់ ឬគិតគូពីអ្នកណាម្នាក់ខ្លាំងជាងគិតពីខ្លួនឯងឡើយ ដល់ពេលនោះ ទោះអ្នកនៅស្រលាញ់ និងនៅនឹកនាគេ វាក៏គ្រាន់តែជាអារម្មណ៍នឹកនាធម្មតា តែវានឹងមិនធ្វើឱ្យអ្នកឈឺចាប់ដូចរាល់ដងដែលអ្នកនឹកគេទេ។

៣. កុំនៅតែម្នាក់ឯង

ការដែលអ្នកនៅម្នាក់ឯងនេះហើយ ដែលវាជាពេលវេលាដែលធ្វើឱ្យអ្នកកាន់តែនៅនឹកនាដល់គេ ដូច្នេះហើយ បើចង់កាត់បន្ថយចិត្តនឹកនាដល់គេ អ្នកគួរតែចំណាយពេលវេលានៅមួយមិត្តភក្តិ គ្រួសារ ឬនៅជាមួយមនុស្សដែលអាចធ្វើឱ្យអ្នកសប្បាយរីករាយបាន នោះអ្នកនឹងមិនចេះតែនឹកគិតដល់គេគ្រប់ពេលទៀតនោះទេ អញ្ចឹងហើយ កុំនៅតែម្នាក់ឯង ឬទៅណាមកណាតែម្នាក់ឯង ដែលវាអាចធ្វើឱ្យអ្នកនឹកដល់គេបាន។

៤. ស្វែងរកអ្វីដែលខ្លួនចូលចិត្តធ្វើ

អ្នកនឹងអាចកាត់បន្ថយចិត្តនឹកនាដល់គេបាន ប្រសិនបើអ្នកចេះស្វែងរកនូវអ្វីដែលខ្លួនចូលចិត្តធ្វើ យកមកធ្វើនោះ ព្រោះការដែលបានធ្វើអ្វីដែលខ្លួនចង់ធ្វើ វាជាសេចក្តីសុខមួយ ហើយបើអ្នកអាចធ្វើបាន អ្នកនឹងភ្លេចគិតពីគេបានដោយងាយ លើសពីនេះ អ្នកនឹងកាន់តែបានស្គាល់ពីខ្លួនឯង ហើយអាចអភិវឌ្ឍក្លាយជាមនុស្សម្នាក់ដែលទាក់ទាញជាងមុន និងធ្វើឱ្យគេស្តាយក្រោយដែលមើលរំលងអ្នក៕