ដំណឹងល្អ! នៅព្រឹកនេះ ផ្លូវល្បឿនលឿន​ភ្នំពេញ​-ក្រុងព្រះសីហនុ​ចាប់ផ្តើមបើកឱ្យ​ប្រើប្រាស់សាកល្បង ដោយឥតគិតថ្លៃ១ខែ

ព្រះសីហនុ៖ នាព្រឹកថ្ងៃទី​០១​ ខែតុលា​ ឆ្នាំ២០២២នេះ ផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧.០៥គីឡូម៉ែត្រ ​បានចាប់ផ្តើមបើកឱ្យ​ប្រើប្រាស់សាកល្បង ដោយឥតគិតថ្លៃរយៈពេល១ខែ ចាប់ពីព្រឹកនេះហើយ។ 

អ្នកដំណើរអាចចេញ-ចូលក្នុងផ្លូវល្បឿនលឿនបានតាម ០៨ស្ថានីយ រួមមាន៖ ស្ថានីយភ្នំពេញ ផ្លូវកប់ស្រូវ (គ.ម ៣), ស្ថានីយកំពង់ស្ពឺខាងកើត (គ.ម ២៦), ស្ថានីយកំពង់ស្ពឺខាងលិច (គ.ម ៤៣), ស្ថានីយត្រែងត្រយឹង (គ.ម ៧៦), ស្ថានីយកំពង់សិលា (គ.ម ១១៤), ស្ថានីយស្រែអំបិល (គ.ម ១៣៥), ស្ថានីយស្ទឹងហាវ (គ.ម ១៧២) និងស្ថានីយក្រុងព្រះសីហនុ (គ.ម ១៨២)។

​សូមជម្រាបថា ផ្លូវនេះ​ត្រូវបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ ដែលតួផ្លូវមានទទឹង ២៤ម៉ែត្រ មាន ៤គន្លង (២ទៅ ២មក) និងគន្លងឈប់បន្ទាន់ (១ទៅ ១មក) ក្រាលបេតុងកៅស៊ូ (AC) តភ្ជាប់ពីរាជធានីភ្នំពេញទៅដល់សង្កាត់លេខ៣ ក្រុងព្រះសីហនុ ខេត្តព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។ ផ្លូវនេះមានសួនច្បារខណ្ឌកណ្តាល មានផ្លូវបំបែកប្តូរទិស (Inter-Change) ភ្ជាប់មក​ផ្លូវ​ជាតិ​លេខ​៤ ចំនួន ៦កន្លែង មាន​​កន្លែង​ឈប់សម្រាក ៣កន្លែង និងចំណតរថយន្ត ១កន្លែង ផងដែរ៕