បរទេស៖ ក្លិបតោខៀវ Chelsea បានប្រកាសជាផ្លូវការថា ប្រធានក្រុម Cesar Azpilicueta បានយល់ព្រមដាក់ប៊ិចបន្តកុងត្រាថ្មីជាមួយ Chelsea រយៈពេល ២ ឆ្នាំបន្ថែមទៀត ក្រោយកុងត្រាចាស់របស់គេផុតសុពលភាពនៅខែ សីហា ឆ្នាំ ២០២២ នេះ។
ជាការពិតណាស់ នៅរដូវក្តៅនេះ Barcelona បានបង្ហាញការចាប់អារម្មណ៍ចំពោះ Azpilicueta ដែលជាខ្សែការពារស្លាបស្តាំរបស់ Chelsea យ៉ាងខ្លាំង, ប៉ុន្តែឥឡូវនេះគម្រោងរបស់ក្រុមអ្នកមានបុណ្យត្រូវបរាជ័យហើយ បន្ទាប់ពីកីឡាករសញ្ជាតិ អេស្ប៉ាញខាងលើ បានបន្តកុងត្រាថ្មីជាមួយ Chelsea រហូតដល់ឆ្នាំ ២០២៤ ឯណោះ។
គួរបញ្ជាក់ថា Azpilicueta បានរួមរស់ជាមួយ Chelsea អស់រយៈពេលជាង ១០ ឆ្នាំមកហើយ ដោយរូបគេត្រូវបាន Chelsea ទិញយកពី Marseille នៅឆ្នាំ ២០១២, ក្នុងនោះខ្សែការពារវ័យ ៣២ ឆ្នាំបានចូលរួមចំណែកជួយឱ្យក្រុមតោខៀវឈ្នះ Champions League ១សម័យ, Premier League ២ សម័យ, Club World Cup ១ សម័យ, Europa League ២ សម័យ និងពានរង្វាន់មួយចំនួនទៀត៕
ប្រភព៖ Chelsea
