បរទេស៖ ទីភ្នាក់ងារសារព័ត៌មាន Yonhap របស់កូរ៉េខាងត្បូង បាននិយាយនៅថ្ងៃសៅរ៍នេះថា កូរ៉េខាងជើងរាយការណ៍ពីករណីមនុស្សជាង ២០០,០០០នាក់បន្ថែមទៀតមានរោគសញ្ញាគ្រុនក្តៅ ក្នុងរយៈពេល ៥ថ្ងៃជាប់ៗគ្នា ខណៈដែលប្រទេសនេះប្រយុទ្ធប្រឆាំងនឹងការផ្ទុះឡើងនៃជំងឺកូវីដ១៩។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយ៉ាងហោចណាស់មនុស្ស ២១៩,០៣០នាក់ ចេញរោគសញ្ញាគ្រុនក្តៅ គិតត្រឹមល្ងាចថ្ងៃសុក្រ ដែលនាំឱ្យចំនួនករណីសរុបកើនឡើងដល់ ២,៤៦០,៦៤០នាក់ ខណៈចំនួនអ្នកស្លាប់កើនឡើងដល់ ៦៦នាក់។ យ៉ាងណាមិញ ទីភ្នាក់ងារសារព័ត៌មាន Yonhap មិនបានបញ្ជាក់ ថាតើមានមនុស្សប៉ុន្មាននាក់ តេស្តវិជ្ជមានជំងឺកូវីដ១៩នោះទេ។
គួរឱ្យដឹងដែរថា ការកើនឡើងករណីឆ្លង បញ្ហាខ្វះខាតធនធានវេជ្ជសាស្រ្ត និងវ៉ាក់សាំងបង្ការកូវីដ១៩ ក្នុងប្រទេសកូរ៉េខាងជើង បាននាំឱ្យទីភ្នាក់ងារសិទ្ធិមនុស្ស របស់អង្គការសហប្រជាជាតិ បានព្រមានអំពីផលវិបាកកាន់តែយ៉ាប់យ៉ឺនថែមទៀត ចំពោះជីវភាពរស់នៅសម្រាប់ប្រជាជនកូរ៉េខាងជើងចំនួន ២៥លាននាក់ ខណៈដែលមន្ត្រីអង្គការសុខភាពពិភពលោក បានបង្ហាញព្រួយបារម្ភថា ការរីករាលដាលនៃជំងឺដែលមិនបានត្រួតពិនិត្យត្រឹមត្រូវ អាចបណ្តាលឱ្យកើតមានវីរុសបំប្លែងថ្មីៗកាន់តែគ្រោះថ្នាក់ជាងមុន៕