ធ្វើដំណើរកម្សាន្តនៅកូរ៉េ ក្នុងរដូវទាំង ៤នេះ មួយណាត្រូវចិត្តអ្នកបំផុត?

កម្សាន្ត ៖ ការសម្រេចចិត្តរបស់មនុស្សជាច្រើន ថាតើត្រូវទៅប្រទេសកូរ៉េ រដូវកាលណាដែលល្អបំផុត ដើម្បីឲ្យពួកគេរីករាយនឹងដំណើរកម្សាន្តតាមចិត្ត ខណៈដែលប្រទេសកូរ៉េខាងត្បូងមាន ៤រដូវខុសៗគ្នា ទាំងនៅក្នុងលក្ខខណ្ឌនៃអាកាសធាតុ និងបរិយាកាសទេសចរណ៍ ដូច្នេះហើយ មុន​នឹង​ទៅ​កម្សាន្ត​នៅ​ប្រទេស​កូរ៉េ យើង​គួរ​ដឹង​ជាមុន​ថា តើ​គួរ​ទៅ​រដូវ​ណា? តើអាកាសធាតុបែបណា ដើម្បីរៀបចំសុខភាពរាងកាយ រួមទាំងសម្លៀកបំពាក់សមស្របអ្នកអាចធ្វើដំណើរប្រកបដោយសុភមង្គល។

អ្នកណាខ្លះមានគម្រោងទៅដើរលេងនៅកូរ៉េ ស្វែងយល់កន្លែងស្អាតៗ ញ៉ាំអាហារឆ្ងាញ់ៗ ដើរមើល​ Oppa សង្ហាៗ តើអ្នកចូលចិត្តទៅពេលណាជាងក្នុងចំណោរដូវទាំង ៤នេះ?

១. រដូវផ្ការីក (Spring) ៖ ចាប់ផ្តើមនៅដើមខែមីនា-ឧសភា

បើសួរថារដូវណាទៅដើរលេងនៅប្រទេសកូរ៉េ សម្រាប់អ្នកចូលចិត្តធ្វើដំណើរក្នុងរដូវចម្រុះពណ៌ជាមួយផ្ការីក។ រដូវផ្ការីកគឺជាចម្លើយដ៏ល្អបំផុត ដោយសារ​អាកាសធាតុ​ក្នុង​រយៈពេល​នេះ​ត្រជាក់​មិន​ត្រជាក់ សីតុណ្ហភាព​ជា​មធ្យម​ប្រហែល​៦-១៦​អង្សា​សេ ផ្កានឹង​រីក​ផងដែរ។ នៅក្នុងខែមេសានឹងមានផ្កា Cherry blossoms ដែលនឹងរីកនៅដើមខែ ប៉ុន្តែវានឹងចេញផ្កាយឺត - យ៉ាងឆាប់រហ័ស ឬ​រយៈពេល​វា​អាស្រ័យ​លើ​អាកាសធាតុ​ក្នុង​ឆ្នាំ​នោះ​ដែរ តែ​ជាធម្មតា​ផ្កា​មិន​លើស​ពី​២​សប្តាហ៍​ទេ ហើយ​វា​នឹង​ជ្រុះ​ទាំងអស់​ ជាពិសេសនៅក្នុងរដូវកាលនេះ ផ្លែស្ត្របឺរីមានតម្លៃថោកជាងរដូវផ្សេងទៀតផងដែរ។

២. រដូវក្តៅ (Summer) ៖ ចាប់ផ្តើមប្រហែលខែមិថុនា - ដើមខែកញ្ញា

រដូវក្តៅនៅកូរ៉េ សីតុណ្ហភាពជាមធ្យម ២២-៣៨ អង្សាសេ (អំឡុងពេលក្តៅ) និងអាចមានភ្លៀងធ្លាក់នៅថ្ងៃខ្លះ ចាប់់ពីពាក់កណ្តាលខែ កក្កដា ដល់ពាក់កណ្តាល ខែសីហា គឺជាពេលវេលាក្តៅបំផុតប្រចាំឆ្នាំ។ ជាមួយនឹងអាកាសធាតុបែបនេះ មនុស្សជាច្រើនប្រហែលជាមិនចង់ទៅកូរ៉េក្នុងរដូវក្តៅមែនទេ? ប៉ុន្តែសូមជម្រាបអ្នកថា រដូវក្តៅនៅកូរ៉េក៏មានអត្ថប្រយោជន៍ជាច្រើនផងដែរ ព្រោះតម្លៃជាមធ្យមនៃដំណើរទេសចរណ៍កូរ៉េ ការស្នាក់នៅ សំបុត្រធ្វើដំណើរផ្សេងៗ នឹងមានតម្លៃថោកជាងក្នុងអំឡុងពេលនេះ អ្នកអាចធ្វើដំណើរជាមួយតម្លៃសមរម្យ លើសពីនេះ ក្នុងរដូវក្តៅ អ្នកក៏អាចធ្វើសកម្មភាពសប្បាយៗជាច្រើនទៀតផងដែរ។

៣. សរទរដូវ (Autumn) ៖ ចាប់ផ្តើមប្រហែលចុងខែកញ្ញា-វិច្ឆិកា

រដូវកាលនេះត្រូវបានចាត់ទុកថាជារដូវកាលដ៏ស្រស់ស្អាតបំផុតសម្រាប់ប្រទេសកូរ៉េ ហើយវាក៏ជាពេលវេលាដែលមនុស្សពេញនិយមបំផុតក្នុងការធ្វើដំណើរ ព្រោះ​ក្រៅពី​អាកាសធាតុ​ស្រស់ស្រាយ ​និង​ត្រជាក់​ខ្លាំង។ សីតុណ្ហភាព​ក្នុង​រង្វង់ ១០-២០ អង្សា​សេ ក៏​មានឱកាស​ឃើញ​ស្លឹកឈើ​ប្រែ​ពណ៌​លឿង និង​ក្រហម​ពេញ​ដើម​ឈើ ដែល​ប្រជាជន​កូរ៉េ​ចូលចិត្ត​ធ្វើដំណើរ​កម្សាន្ត​ ក្នុងនោះតំបន់ទេសចរណ៍ពេញនិយមនៅក្នុងខេត្ត Jeollabuk ព្រោះ​ទេសភាព​ស្លឹក​ឈើ​ជ្រុះ​គឺ​ស្រស់​ស្អាត ពិសេស​ទៅ​លេង​កូរ៉េ​ស្លឹក​ឈើ​ប្រែ​ពណ៌ យូរៗទៅអ្នកនឹងលង់ស្នេហ៍នឹងរដូវកាលនេះ។

៤. រដូវរងា (Winter) ៖ ចាប់ផ្តើមប្រហែលខែធ្នូ - ពាក់កណ្តាលខែមីនា

ជឿថាមនុស្សជាច្រើនចង់ទៅប្រទេសកូរ៉េក្នុងរដូវរងាព្រោះបានឃើញបរិយាកាសទាក់ទាញពីរឿងភាគកូរ៉េច្បាស់ជាមិនខាន។ សម្រាប់រដូវរងាគឺជារដូវត្រជាក់ សីតុណ្ហភាពជាមធ្យមគឺពី -៥ ទៅ ២០អង្សាសេ រដូវកាលនេះគឺសមរម្យសម្រាប់ការជិះស្គីលើទឹកកក ព្រមទាំងមានមនុស្សជាច្រើនចូលចិត្តស្ទូចត្រីទឹកកកផងដែរ។ អ្នកណាខ្លះចូលចិត្តអាកាសធាតុត្រជាក់ និងព្រិលពណ៌ស មកលេងក្នុងអំឡុងខែមករា និងកុម្ភៈ អ្នកនឹងមិនខកបំណងឡើយ៕

ប្រភព ៖ Sanook