កម្សាន្ត ៖ ភូមិវប្បធម៌កម្ពុជា មានទីតាំងស្ថិតនៅក្នុងក្រុងសៀមរាប ខេត្តសៀមរាប ត្រូវបានគេចាត់ទុកជាកន្លែងទេសចរណ៍ដ៏ពេញនិយម និងជាភូមិគំរូមួយដែលមានសំណង់ ផ្ទះ អាគារប្រវត្តិសាស្រ្ត ប្រមូលផ្ដុំនូវទំនៀមទម្លាប់ ជីវភាព ការរស់នៅរបស់ប្រជាជនខ្មែរ ដោយកន្លែងនេះមានទំហំ ២១០,០០០ ម៉ែត្រការ៉េ មានភូមិតូចៗដែលតំណាងឲ្យវប្បធម៌ផ្សេងៗគ្នា រួមទាំងចរិតលក្ខណៈរបស់ជនជាតិភាគតិចទៀតផង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ការចូលទស្សនា ភ្ញៀវទេសចរណ៍អាចរីករាយជាមួយនឹងការសម្ដែងរបាំអប្សរាខ្មែរ របាំរបស់ជនជាតិភាគតិចនៅកម្ពុជា និងអាចទស្សនាការសម្ដែងអំពីប្រពៃណីរៀបអាពាហ៌ពិពាហ៌របស់ជនជាតិខ្មែរ ទស្សនីយភាពដែលសម្ដែងអំពី ប្រវត្តិសាស្រ្ដខ្មែរនាសម័យអង្គរក្នុងរាជព្រះបាទជ័យវរ្ម័នទី៧ ជាងនេះទៅទៀតនៅតាមភូមិនីមួយៗ អ្នកទេសចរអាចមើលឃើញអំពីការបង្ហាញអំពីរបៀបឆ្លាក់លើថ្ម លើឈើ សកម្មភាពដំគ្រឿងប្រាក់ និងឆ្នៃត្បូងជាដើម។
នៅទីនោះក៏មានសារមន្ទីរក្រមួនដែលបង្ហាញពីរូបប្រវត្តិសាស្រ្ដផ្សេងៗ មានតាំងពីរបៀបសាងសង់ប្រាសាទអង្គរវត្ត ជីវភាពរស់នៅរបស់ជនជាតិខ្មែរនាសម័យចេនឡា និងរូបតំណាងឲ្យមនុស្សដែលមានចារក្នុងប្រវត្តិសាស្រ្ដផ្សេងៗទៀត លើសពីនេះទៅទៀត នៅទីនោះមានរូបគំរូជាច្រើនដែលមានក្នុងប្រទេសកម្ពុជា ដូចជា ផ្សារធំថ្មី ព្រះបរមរាជវាំង វត្តភ្នំនៅភ្នំពេញ ភ្នំឧត្តុង្គ សំណង់ខ្ទម ផ្ទះបែបខ្មែរ ផ្ទះជនជាតិ វត្ត និងវិហារឥស្លាម ព្រមទាំងអ្វីៗជាច្រើនទៀត។
ដំណើរកម្សាន្ដនៅ ភូមិវប្បធម៌កម្ពុជា ជាដំណើរទេសចរណ៏ដែលមិនអាចបំភ្លេចបាន បើទៅលេងសៀមរាប ដើរលេងទស្សនាប្រាង្គប្រាសាទអង្គររួចរាល់ សូមកុំភ្លេចឈាងចូលមកទស្សនា ភូមិវប្បធម៌កម្ពុជា ដែលត្រូវបានចាត់ទុកជាកន្លែងពេញនិយមទាំងភ្ញៀវជាតិ និងអន្តរជាតិ មកមើលទិដ្ខភាព និងអ្វីៗអស្ចារ្យច្រើនយ៉ាងដែលអ្នកនឹកស្មានមិនដល់៕
ទស្សនាទិដ្ឋភាពខ្លះៗ ក្នុងភូមិវប្បធម៌កម្ពុជាខេត្តសៀមរាប៖
ប្រភព និងរូបភាព ៖ Wikipedia, គេទំព័រ បណ្ដាញសង្គមអ៊ីនធើណែត
Bong I.T