ចែករំលែក និងកម្សាន្ត ៖ បច្ចុប្បន្ននេះ សន្ទុះប្រជាប្រិយភាពរឿង រឿងប្រភេទ Boys Love ឬយើងហៅថា BL បានក្លាយជាប្រធានបទគួរឲ្យចាប់អារម្មណ៍សម្រាប់យុវវ័យបបច្ចុប្បន្ន ជាពិសេសថារឿងប្រភេទបែបនេះ ហាក់ទទួលបានការពេញនិយមខ្លាំង ពីសំណាក់មិត្តៗនារីយើងតែម្ដង រហូតមានសំណួរមួយលើកឡើងមកថា ហេតុអ្វីបានមនុស្សស្រីភាគច្រើនចូលមើលរឿង BL?

បើនិយាយឲ្យដល់ទៅរឿងប្រភេទ ប្រុសស្រលាញ់ប្រុស ឬ BL នេះកំពុងទទួលបានការពេញនិយមខ្លាំងទូទាំងពិភពលោក ជាពិសេសរឿង BL ដែលផលិតឡើង នៅប្រទេសចិន និងថៃតែម្ដង។

ត្បិតតែមានឈ្មោះជា BL មែន តែរឿងប្រភេទនេះ វាមិនខុសគ្នាចំពោះប្រភេទរឿងមនោសញ្ចេតនាស្នេហា ទំនាក់ទំនងបែបស្រីប្រុសនោះទេ ត្រង់ចំណុចនេះ វាបានផ្ដល់សារឲ្យអ្នកគាំទ្រយល់ច្បាស់ថា វាជាអារម្មណ៍រវាងតួអង្គមនុស្ស ២នាក់ ដែលមានចិត្តស្រលាញ់គ្នាចេញពីបេះដូង មិនប្រកាន់ថាភាគីម្ខាងទៀតជាមនុស្ស ស្រី ប្រុស​ ឬភេទទីបីឡើយ។

វាគឺស្នេហា និងសម្ព័ន្ធភាពរបស់មនុស្សពីរនាក់ ដែលមានឲ្យគ្នាទៅវិញទៅមក ថែមទាំងបែបនេះវាមានដំណើររឿងប្លែក ខុសពីរឿងភាគធម្មតា អប់រំឲ្យយើងបើកចិត្តទូលាយចំពោះសង្គមជាក់ស្ដែង ដែលមានស្នេហាបែបនេះមែន។

សួរថា ហេតុអ្វីបានមនុស្សស្រីមួយចំនួនធំចូលមើលរឿង BL?

បើឆ្លើយថាដោយសារតួសម្ដែងប្រុសៗសង្ហាៗ វាក៏ជាចម្លើយសមហេតុសមផលមួយដែរ តែយើងក៏មិនអាចវែកញែក រកចម្លើយត្រឹមត្រូវឲ្យបានច្បាស់លាស់នោះដែរ ប៉ុន្តែតាមហេតុផលជាក់ស្ដែង មនុស្សស្រីអាចជាប្រភេទមនុស្សមានអារម្មណ៍រំភើបងាយ មានគំនិតបើកទូលាយ ហើយក៏មិនខ្វល់ខ្វាយចំពោះគំនិតអ្នកដទៃ សម្ដែងចេញពីចំណូលចិត្តរបស់ពួកគេចេញមក ស្រលាញ់អ្វី ឬចូលចិត្តអ្វី ជាពិសេសពួកគេ មានមិត្តភក្តិស្រីៗដូចគ្នា ដែលអាចនិយាយចូលគ្នាបានយ៉ាងងាយ ពេលនិយាយដល់ការតាមដានប្រភេទរឿង BL នេះ អ្នកខ្លះក៏មានមិត្ត ដែលជាភេទទី៣ អាចត្រូវគ្នា យល់ពីគ្នា និងមិនរើសអើងភេទឡើយ។

អាចថារឿងប្រភេទ BL នេះមានតួអង្គសម្ដែងដែល Idols របស់ពួកគេស្រាប់ ឬអាចថាប្រភេទរឿងនោះ ដកចេញពីរឿងប្រលោមលោកដែលពួកគេចូលមកពីមុន ហើយអ្នកមើលគ្រាន់តែចង់តាមដានភាពខុសគ្នាយ៉ាងណា ក្រោយពីផលិតចេញជា Serise ឬ Movie ក្រោយមកហ្វេនៗនារី កាន់តែចូលចិត្តកាន់តែខ្លាំង ជាមួយតួអង្គលេចចេញរូបរាងឡើង វាក៏ជាហេតុផលដែល Fan Girl កាន់តែបាក់ចិត្តស្រលាញ់តួក្នុងរឿង កាន់តែមានអ្នកគាំទ្រច្រើន។

មានក្រុមអ្នកគាំទ្រខ្លះទៀត នាំគ្នាយកមកចាប់គូឲ្យគ្នា ទៅមកជាហូរហែ​ បែបនេះក៏ជាភាពរីករាយរបស់អ្នកគាំទ្រមួយផ្នែកដែរ។

មនុស្សស្រីមួយចំនួនធំ ដែលចូលចិត្តមើលរឿង BL នេះ ពួកគេអាចទទួលយក និងសុទ្ធតែយល់ច្បាស់ពី LGBTQ ដែលកើតមានឡើង ក្នុងសង្គមយើងបច្ចុប្បន្ន ហើយក៏ចង់មើលសាច់រឿងបែបថ្មី ដែលខុសពីរឿងស្នេហាស្រីប្រុសទូទៅ ព្រោះសាច់រឿងខុសគ្នា ផ្ដល់ទស្សនៈ ការយល់ន័យផ្សេងៗ និងបង្កប់ខ្លឹមសារជាច្រើន (LGBTQ ជាឈ្មោះទិន្ននាការមិនប្រកាន់ពូជសាសន៍ ពណ៌សម្បុរ ភេទ យេនឌ៍រ)។

មិត្តៗនារីខ្លះ ពួកពេញចិត្តចំពោះទង្វើ ឬសកម្មភាពបង្ហាញក្ដីស្រលាញ់ចំពោះគ្នា របស់អ្នកសម្ដែង ដែលឆ្លុះបញ្ចាំងពីតថភាពពិត ក្នុងសង្គមបច្ចុប្បន្ន លើសពីនេះ បើនិយាយពីតួអង្គក្នុងរឿងភាគ អាចថាអ្នកសម្ដែងពួកលេងស្និទ្ធស្នាលគ្នា ដូចជីវិតពិត ភាពទាក់ទាញពេលពួកគេលេងជាមួយគ្នា គឺស៊ីគ្នា Sweet ទាំងនៅក្នុងរឿង និងក្រៅរឿង ជាពិសេសឈុតនីមួយៗ សុទ្ធតែដាក់អារម្មណ៍បានល្អ គួរឲ្យចង់តាមដាន ជាពិសេសបើរឿងមានឈុត​ NC អីកាន់តែធ្វើឲ្យហ្វេនៗ បើកភ្នែកៗធំ ស្រែករមួលខ្លួនតែម្ដង។

ជាមួយគ្នានេះដែរ បើអ្នកមើលមាន Idols ដែលជាតួអង្គសម្ដែងរឿង BL ពួកគេកាន់តែគាំទ្រពេញទំហឹង ហើយបង្ហាញការគាំទ្រអស់ពីបេះដូង តាម Support គ្រប់ Event តាម និងតានគ្រប់សកម្មភាពតារាៗ ហើយ Fan Girl មិនខ្វល់ថា ត្រូវមនុស្សជុំវិញខ្លួនគិតយ៉ាងណានោះទេ សំខាន់ពួកគេមានក្ដីសុខ និងរីករាយជាមួយជីវិតបែបនេះ ហើយក៏ជាអារម្មណ៍ ដែលអ្នកមិនមែនហ្វេន BL គ្មានថ្ងៃយល់។

ខាងលើលនេះ គ្រាន់តែជាបង្ហាញការយល់ឃើញខ្លះៗប៉ុណ្ណោះ ពុំមានត្រូវឬខុសឡើយ ព្រោះមនុស្សយើងម្នាក់ៗ មានគំនិត ការយល់ឃើញ មិនដូចគ្នាឡើយ វាដូចជាហ្វេនស្រីៗ ដែលបានមើលរឿងប្រភេទនេះ ដែលមិនខុសពីប្រុសៗមួយចំនួនធំ ដែលជាហ្វេនៗចូលចិត្តផ្នែកកីឡានោះទេ វាគឺជាអារម្មណ៍របស់មនុស្ស ដែលមានទំនោរទៅរកផ្នែកកម្សាន្តដែលពួកគេចូលចិត្ត ដូច្នេះ BL Fan ក៏បែបនោះដែរ៕

ចុះប្រិយមិត្តវិញ ចូលចិត្តរឿង BL ព្រោះតែអ្វីដែរ?