ចង់ចេញហើយ! នៅ PSG អត់សូវកាក់កប ឥឡូវ Wijnaldum ចង់ត្រឡប់មក PL វិញ ដោយចូលរួមជាមួយក្លិបយក្សមួយនេះ

បរទេស៖ អតីតខ្សែបម្រើឆ្នើមរបស់ Liverpool កីឡាករ Gini Wijnaldum កំពុងសម្លឹងរកឱកាសដើម្បីត្រឡប់មកកាន់ក្របខណ្ឌ Premier League វិញ ហើយរូបគេមានបំណងចង់ចូលរួមជាមួយ Arsenal។

រម្លឹកថា កីឡាករសញ្ជាតិ ហូល្លង់ រូបនេះបានផ្លាស់ទៅចូលរួមជាមួយ Paris Saint-Germain នៅរដូវមុន បន្ទាប់ពីចាយពេល ៥ ឆ្នាំក្នុងការស្នាក់នៅទឹកដី Anfield, ជាមួយគ្នានេះ រូបគេក៏បានចូលរួមចំណែកជួយឱ្យ Liverpool ឈ្នះជើងឯក Premier League ១ សម័យកាល និង Champions League ១ សម័យកាលផងដែរ។

ជាការពិតណាស់ Wijnaldum គឺជាកីឡាករម្នាក់ ដែលអ្នកគាំទ្ររបស់អ្នកគាំទ្ររបស់ក្រុមអ្នកមានជាន់ថ្មីពេញចិត្ត និង ស្រឡាញ់ខ្លាំង, ប៉ុន្តែការផ្តើមអាជីពរបស់គាត់នៅទឹកដី បារាំង ហាក់ពុំសូវសមប្រកបប៉ុន្មានឡើយ តួយ៉ាងគាត់ទើបតែបង្ហាញខ្លួនជម្រើសដំបូងបាន ១១ លើកប៉ុណ្ណោះសម្រាប់ក្របខណ្ឌ Ligue1។

ខ្សែបម្រើវ័យ ៣១ ឆ្នាំឥឡូវនេះគាត់កំពុងមានបំណងចង់ចាកចេញពី PSG ហើយយោងតាមការចុះផ្សាយរបស់កាសែត Sky Sports បានអះអាងថា គាត់ចង់ត្រឡប់ទៅកាន់ក្របខណ្ឌ Premier League ដើម្បីស្វែងរកទម្រង់លេងដ៏ល្អបំផុតរបស់គាត់មកវិញ, ខណៈក្រុម Arsenal ជាជម្រើសមួយដែលគាត់ចង់ទៅបំផុត៕  

ប្រភព៖ Metro