ម្នាក់នេះក៏មិនអន់! បើសិនទិញយក Haaland មិនបាន R.Madrid នឹងបង្វែរគោលដៅមករកខ្សែប្រយុទ្ធរូបនេះវិញ

អេស្ប៉ាញ៖ ក្លិបអធិរាជស Real Madrid បានគ្រោងទុករួចជាស្រេចថាបើសិនពួកគេទិញយក ខ្សែប្រយុទ្ធ Erling Haaland មិនបានទេ នោះក្លិបនឹងទិញយកខ្សែប្រយុទ្ធ Dusan Vlahovic ពីក្លិប Fiorentina នៅក្របខណ្ឌ Serie A វិញ។

ថ្មីៗនេះ Haaland បានបង្កការភ្ញាក់ផ្អើលដោយចេញមុខមកផ្ដល់បទសម្ភាសន៍ថាការសម្រេចចិត្តពីអនាគតរបស់គេជាមួយ Borussia Dortmund នឹងកើតឡើងឆាប់ៗដែលមានភាគរយខ្ពស់ថា កីឡាករសញ្ជាតិន័រវេសរូបនេះនឹងផ្លាស់ទ្រនំថ្មី។

Haaland បានក្លាយជាគោលដៅធំៗរបស់ក្លិបមួយចំនួនដូចជា Chelsea, Manchester City, Manchester United, Real Madrid និង Barcelona ប៉ុន្តែកីឡាករវ័យក្មេងរូបនេះទំនងជាផ្ទេរទៅលេងនៅអេស្ប៉ាញហើយ Real Madrid ប៉ងចង់បានទាំងគេនិង ខ្សែប្រយុទ្ធ Kylian Mbappe ។

យ៉ាងណាមិញ Haaland ហាក់មានទំនាក់ទំនងជិតស្និទ្ធជាមួយ Barcelona ព្រោះលោក Joan Laporta ធ្លាប់ជួបនិយាយគ្នាជាមួយលោក Mino Raiola ដែលជាភ្នាក់ងាររបស់គេដូច្នេះ Real Madrid បានគិតរួចជាស្រេចថានឹងយក Vlahovic មកជំនួសគេ។

Dusan Vlahovic ជាខ្សែប្រយុទ្ធជួរមុខមួយរូបនៅ Serie A ដោយនៅរដូវកាលនេះគេរកបាន១៦គ្រាប់ក្នុងការបង្ហាញខ្លួន២០ប្រកួត ប៉ុន្តែលេចឮថា Arsenal កាន់តែកៀកក្នុងការទិញយកកីឡាករសញ្ជាតិស៊ែប៊ីរូបនេះ៕

ប្រភព៖ sportsmole