១៥លានយកចុះ! ទីបំផុត Man UTD បានដាក់តម្លៃខ្លួនកីឡាករមិនសូវបានលេងរូបនេះហើយ

អង់គ្លេស៖ ក្លិប Manchester United បានដាក់តម្លៃខ្លួនខ្សែការពារ Phil Jones ចំនួន១៥លានផោន(ស្មើនឹងប្រមាណ២០.៥លានដុល្លារ)បើទោះបីជាគេបានចូលលេងតែ មួយប្រកួតគត់នៅរយៈពេលពីរឆ្នាំចុងក្រោយនេះក៏ដោយ។

Jones បានរងរបួសធ្ងន់តាំងពីឆ្នាំ២០២០ និងបានបាត់មុខពីទីលានរយៈពេលជិតពីរឆ្នាំប៉ុន្តែថ្មីៗនេះគេបានវិលត្រឡប់មកវិញហើយគឺចូលលេងក្នុងការប្រកួតទល់នឹង Wolves ដែល Man UTD ចាញ់ ១ ទល់នឹង០ ហើយទម្រង់លេងរបស់គេក៏ទទួលបានការសរសើរពីអ្នកគាំទ្រនិងការទះដៃអបអរផងដែរ។

យ៉ាងណាមិញ លោក Ralf Rangnick ដាក់ឲ្យ Jones ចូលលេងក៏ដោយសារកាលណោះ ទាំង Harry Maguire, Victor Lindelof និង Eric Bailly សុទ្ធតែរងរបួសហើយ Jones ពុំបានស្ថិតនៅក្នុងគម្រោងរបស់លោកឡើយ ស្របពេលអាយុរបស់គេកាន់តែជ្រេទៀតទើប Man UTD ចង់លក់គេចេញឲ្យបានឆាប់។

កុងត្រារបស់ Phil Jones ជាមួយបិសាចក្រហមនឹងអស់សុពុលភាពនា១៨ខែខាងមុខស្របពេល Newcastle ចង់បានគេមករួមក្រុម។

គួរបញ្ជាក់ផងដែរថា Jones ត្រូវ Sir Alex Ferguson ទិញយកកាលពីឆ្នាំ២០១១ ដោយបានជួយក្លិបឲ្យលើកពាន Premier League,FA Cup និង Europa League ៕

ប្រភព៖ thesun