បរទេស៖ ក្រុមហ៊ុន Tesla បានយល់ព្រមធ្វើការផ្លាស់ប្ដូរលើមុខងារ Passenger Play របស់ខ្លួន ដែលអនុញ្ញាតឲ្យអ្នកជិះអាចលេងហ្គេមបាន នៅលើអេក្រង់ថាច់ស្គ្រីន ខណៈពេលរថយន្តកំពុងធ្វើចលនា។ នេះជាការធ្វើតាម ការស៊ើបអង្កេតដែលធ្វើឡើងដោយរដ្ឋបាលសុវត្ថិភាពចរាចរណ៍ផ្លូវជាតិរបស់សហរដ្ឋអាមេរិក (NHTSA)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សទីភ្នាក់ងារនេះបាននិយាយថា ខ្លួនត្រូវបានជូនដំណឹងដោយក្រុមហ៊ុន Tesla ថា ការធ្វើបច្ចុប្បន្នភាពសូហ្វ៊ែរនឹងបិទមុខងារនេះ ខណៈពេលកំពុងបើកបរ។ ក្រុមហ៊ុនរថយន្តរបស់លោក Elon Musk បានប្រឈមមុខនឹងការរិះគន់ថា មុខងារមួយនេះគឺមានគ្រោះថ្នាក់។ កាសែត New York Times បានរាយការណ៍ថា ក្រុមហ៊ុន Tesla បានទាក់ទងទីភ្នាក់ងារ NHTSA ដោយផ្ទាល់។ ភ្នាក់ងារនេះបានប្រាប់កាសែតថា៖ «មុខងារ Passenger Play ឥឡូវនេះនឹងត្រូវបានចាក់សោ និងមិនអាចប្រើប្រាស់បាន នៅពេលរថយន្តកំពុងធ្វើចលនា»។
ទីភ្នាក់ងារ NHTSA បាននិយាយទៀតថា មុខងារ Passenger Play អាចរំខានអ្នកបើកបរ និងបង្កើនហានិភ័យនៃគ្រោះថ្នាក់។ ទោះបីជាការលេងហ្គេមនៅលើអេក្រង់ថាច់ស្គ្រីនរបស់រថយន្ត មិនមែនសម្រាប់អ្នកបើកបរ ហើយបានសួរបញ្ជាក់ថាអ្នកលេងត្រូវតែជាអ្នកដំណើរ វាមិនអាចរារាំងអ្នកបើកបរ កុំឲ្យលេងវាបានដែរ។ ដំបូងឡើយ មុខងារនេះអាចប្រើបានតែនៅពេលដែលរថយន្តឈប់នៅស្ងៀមប៉ុណ្ណោះ ប៉ុន្តែវាត្រូវបានផ្លាស់ប្ដូរ នៅក្នុងខែធ្នូ ឆ្នាំ២០២០ ដែលអនុញ្ញាតឲ្យលេងហ្គេមបាន នៅពេលរថយន្តកំពុងផ្លាស់ទី៕
ប្រភព: BBC