បរទេស៖ កីឡាករ Cristiano Ronaldo បានបង្ហាញការត្រៀមខ្លួនយ៉ាងយកចិត្តទុកដាក់ មុនការដឹកនាំប្រកួតដំបូងរបស់គ្រូបង្វឹកថ្មីលោក Ralf Rangnick ដែល Manchester United ត្រូវបើកទ្វាកីឡដ្ឋាន Old Trafford របស់ខ្លួនទទួលស្វាគមន៍ក្រុមភ្ញៀវ Crystal Palace នៅថ្ងៃ អាទិត្យនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ លោក Rangnick នឹងចូលខ្លួនមកដឹកនាំប្រកួតដំបូងនៅសប្តាហ៍នេះ ក្រោយពេលកាលពីសប្តាហ៍មុនលោកបានត្រឹមតែទស្សនាប៉ុណ្ណោះនៅក្នុងជំនួបដែល Man UTD បានបំបាក់ Arsenal ក្នុងលទ្ធផល ៣ ទល់នឹង ២។ យ៉ាងណាមិញ Ronaldo ជាអ្នករកគ្រាប់បាល់ចុងក្រោយតាមរយៈបាល់ពិន័យ ១១ ម៉ែត្រ ជួយឱ្យក្រុមបិសាចក្រហមទទួលបាន ៣ ពិន្ទុយ៉ាងសំខាន់។
ក្រោយឃើញទម្រង់លេងល្អបែបនេះ លោក Rangnick បានសរសើរខ្សែប្រយុទ្ធវ័យ ៣៦ ឆ្នាំមិនដាច់ពីមាត់ ហើយលោកបានច្រានចោលពាក្យចចាមអារ៉ាមដែលលើកឡើងថា រូបគេមិនស័ក្តិសមជាមួយទម្រង់លេងរបស់គាត់, ក្នុងនោះគ្រូបង្វឹកបណ្តោះអាសន្នលោក Rangnick បានមានប្រសាសន៍យ៉ាងដូច្នេះថា៖
អ្នកតែងតែងអាចសម្របខ្លួនជាមួយរបៀបលេងរបស់អ្នក ឬក៏គំនិតដែលកីឡាករទាំងអស់អាចធ្វើបាននៅក្នុងកីឡាបាល់ទាត់, វាមិនមានអ្វីដែលមិនអាចទៅរួចទេ។ ខ្ញុំបានមើល Cristiano លេងនៅវគ្គទី ២ ទល់នឹង Arsenal ម្សិលមិញ, ខ្ញុំសឹងមិនជឿថាគាត់មានវ័យ ៣៦ ឆ្នាំទៅហើយ, នៅអាយុដូចគ្នានេះ ខ្ញុំមិនដែលឃើញកីឡាករណាដែលមានកាយសម្បទាររឹងមាំដូចជាគាត់ឡើយ...៕
ប្រភព៖ Metro
Bong I.T