ច្បាស់ការណ៍! ទូរសព្ទ Xiaomi 12 នឹងចេញក្នុងពេលឆាប់ៗ ជាមួយឈីបជំនាន់ចុងក្រោយបង្អស់ Snapdragon 8 Gen 1

បរទេស៖ ទូរសព្ទ Xiaomi 12 នឹងមកដល់ក្នុងពេលឆាប់ៗនេះ ហើយនាយកប្រតិបត្តិរបស់ក្រុមហ៊ុននេះបានបញ្ជាក់ថា វានឹងក្លាយជាស្មាតហ្វូនដំបូងគេ ដែលបានប្រកាសដែលនឹងបំពាក់បន្ទះឈីប Qualcomm Snapdragon 8 Gen 1 (ពីមុនត្រូវបានគេរំពឹងថានឹងដាក់ឈ្មោះថា Snapdragon 898)។

លោក Lei Jun ជាស្ថាបនិកនិងជានាយកប្រតិបត្តិរបស់ក្រុមហ៊ុន Xiaomi បានបង្ហាញខ្លួននៅក្នុងវីដេអូមួយ ក្នុងអំឡុងពេលព្រឹត្តិការណ៍ Snapdragon Tech Summit 2021 របស់ក្រុមហ៊ុន Qualcomm ដែលគាត់បានបញ្ជាក់ពីឈ្មោះទូរសព្ទ និងការពិតដែលវាមានបំពាក់បន្ទះឈីបថ្មី។

លោក Jun ក៏បាននិយាយថា ទូរសព្ទនេះនឹងមានលក់ក្នុងពេលឆាប់ៗនេះ។ គាត់មិនបានបញ្ជាក់ពីកាលបរិច្ឆេទនៃការដាក់លក់ Xiaomi 12 នោះទេ ប៉ុន្តែការបែកធ្លាយថ្មីៗនេះបានបង្ហាញថា ក្រុមហ៊ុននឹងបង្ហាញទូរសព្ទថ្មីរបស់ខ្លួននៅក្នុងប្រទេសចិន នៅថ្ងៃទី16 ខែធ្នូ។

ពីមុន Xiaomi បានបង្ហាញទូរសព្ទកំពូលរបស់ខ្លួននៅក្នុងប្រទេសចិនមុនគេ ហើយបន្ទាប់មកនាំពួកវាទៅកាន់ទីផ្សារផ្សេងទៀត (រួមទាំងចក្រភពអង់គ្លេស) នៅពេលក្រោយ។ គេរំពឹងថា វានឹងអាចកើតឡើងក្នុងស្ថានភាពស្រដៀងគ្នានេះ បើទោះបីជាមិនទាន់មានការបញ្ជាក់ក៏ដោយ។ នេះជាក្រុមហ៊ុនផលិតទូរសព្ទដំបូងគេ ដែលបានបញ្ជាក់ថាខ្លួននឹងប្រើ Snapdragon 8 Gen 1 នៅក្នុងស្មាតហ្វូនថ្មីរបស់ខ្លួន៕

ប្រភព: TechRadar