ក្រុមហ៊ុន​​ឱសថអាមេរិក​មួយ​ថា វ៉ាក់សាំង​បង្ការមេរោគបំប្លែងថ្មីអូមីក្រុង អាចនឹងរួចរាល់ក្នុង​ពេល ១០០ថ្ងៃទៀត

បរទេស៖ ប្រធានក្រុមហ៊ុនឱសថយក្សអាមេរិក Pfizer លោក Albert Bourla បាននិយាយថា ក្រុមហ៊ុនអាចនឹងមាន​​វ៉ាក់សាំង​ប្រឆាំងមេរោគបំប្លែងថ្មីអូមីក្រុង (Omicron)​ ក្នុងរយៈពេលតិចជាង ១០០ថ្ងៃទៀត។ ​នេះបើតាមប្រភពព័ត៌មាន NHK។

ថ្លែងនៅក្នុងបទសម្ភាសន៍ជាមួយបណ្តាញទូរទស្សន៍អាមេរិកកាលពីថ្ងៃចន្ទ លោកបានលើកឡើងថា ប្រសិនបើវ៉ាក់សាំង​បង្ការមេរោគបច្ចុប្បន្ន​មិនសូវមានប្រសិទ្ធភាព ក្រុមហ៊ុន Pfizer ត្រូវការបង្កើតវ៉ាក់សាំងថ្មីមួយទៀត។ 

នាយកប្រតិបត្តិរូបនេះ បានបញ្ជាក់ទៀតថា ក្រុហ៊ុន Pfizer ក៏បានបង្កើតវ៉ាក់សាំង​បង្ការមេរោគបំប្លែងថ្មី ប្រភេទ Beta និង Delta រួចហើយដែរ ប៉ុន្តែ​មិនទាន់ត្រូវបាន​ប្រើប្រាស់​ ព្រោះវ៉ាក់សាំងដើមនៅតែមានប្រសិទ្ធភាពនៅឡើយ។ លោក​​​បន្ត​ថា វ៉ាក់សាំង​ប្រឆាំង​នឹងមេរោគបំប្លែងថ្មីអូមីក្រុង នឹង​ត្រូវ​បាន​ប្រើ​ប្រាស់ ក្នុងករណី​ក្រុមហ៊ុន​មើល​ឃើញ​ថា វាក់សាំងបច្ចុប្បន្ន​មិនមានប្រសិទ្ធភាពតែប៉ុណ្ណោះ៕