សម្តេចតេជោបញ្ជាក់ថា ក្នុងចំណោមអ្នកស្លាប់ម្សិលមិញ១២នាក់ គឺមាន៨នាក់ ដែលមិនបានចាក់វ៉ាក់សាំង

ភ្នំពេញ៖ នៅក្នុងសារសម្លេងពិសេសនៅព្រឹកថ្ងៃទី ១៩ ខែតុលា ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា  បានលើកឡើងថា ក្រោយ​ពីពិធី​បុណ្យភ្ជុំបិណ្ឌ​ចំនួនអ្នកស្លាប់ និងចំនួនអ្នកឆ្លងបានថយចុះ។ សម្តេចបានបញ្ជាក់បន្ថែមថា ក្នុងចំណោមអ្នកស្លាប់ចំនួន ១២នាក់ នៅថ្ងៃម្សិលមិញ គឺមាន ៨នាក់ ដែលមិនបានចាក់វ៉ាក់សាំង។

ជាមួយគ្នានេះ សម្តេចតេជោ ក៏សូមអំពាវនាវ​ឱ្យពលរដ្ឋទៅទទួលការចាក់វ៉ាក់សាំង ខណៈដែលការចាក់ដូសទី៣ កំពុងតែធ្វើឡើងនៅរាជធានីភ្នំពេញ ហើយនឹងបន្តទៅតាមបណ្តារខេត្តតាមតំបន់ដែលមានគម្លាត ពីការចាក់ដូសទី២។ ព្រោះវ៉ាក់សាំង គឺជាគ្រឹះការពារអាយុជីវិតរបស់យើងគ្រប់គ្នា។

សម្តេចតេជោ លើកឡើងទៀតថា បើទោះជាការឆ្លង និងស្លាប់ថយចុះ តែការការពារជំងឺកូវីដ១៩ នៅតែបន្ត និងមិនត្រូវពឹងផ្អែកលើវ៉ាក់សាំងទាំងស្រុងនោះទេ ដោយត្រូវប្រកាន់ខ្ជាប់នូវវិធានការ បីកុំ បីការពារ ឱ្យបានជាប់ជានិច្ច៕

ប្រភព៖ PNN