តំបន់មួយនៅអាមេរិក ហាមឃាត់សិស្សមិនឲ្យប្រើកាតាប ស្រាប់តែសិស្សប្រើរបស់ទាំងនេះជំនួសវិញ (មានវីដេអូ)

អាមេរិក៖ កាលពីសប្ដាហ៍មុននេះ តំបន់ Jefferson County ក្នុង Colorado សហរដ្ឋអាមេរិក បានចេញនូវច្បាប់ថ្មីដោយហាមឃាត់សិស្សានុសិស្សទាំងឡាយពីការប្រើប្រាស់កាតាបស្ពាយមកសាលារៀន។ ហើយច្បាប់នេះ ត្រូវបានអនុវត្តចំពោះសាលាមធ្យមក្នុងស្រុកចំនួនពីរ និងវិទ្យាល័យក្នុងស្រុកចំនួនពីរផងដែរ ដោយសាលាបឋមសិក្សាត្រូវបានលើកលែង។

យោងតាមប្រភពព័ត៌មានបានឲ្យដឹងថា មូលហេតុនៃការហាមឃាត់នេះ ត្រូវបានសម្រេចឡើង ក្រោយពីកាំភ្លើងមួយដើម ត្រូវបានគេរកឃើញនៅក្នុងកាតាបរបស់សិស្សស្រីម្នាក់អាយុទើបតែ១៣ឆ្នាំ កាលពីថ្ងៃទី២៣ ខែកញ្ញាកន្លងទៅថ្មីៗនេះ។ ហើយដូច្នេះ សិស្សស្រីម្នាក់នេះ ក៏ត្រូវបានគេចាប់ឃាត់ខ្លួន ដើម្បីសួរនាំ និងជួបពិភាក្សាជាមួយអាណាព្យាបាលផងដែរ បើទោះបីជាមិនមានការបាញ់ប្រហារទៅលើនរណាម្នាក់ក៏ដោយ។

យ៉ាងណាមិញ រឿងរ៉ាវជាក់លាក់ទៅជាយ៉ាងណា មកទល់ពេលនេះគេមិនទាន់ដឹងនៅឡើយទេ។ តែបើងាកទៅកាន់សិស្សានុសិស្សនៅតាមសាលានីមួយៗវិញ បានដោះស្រាយបញ្ហានៃការមិនប្រើប្រាស់កាតាប ដោយពួកគេបាននាំគ្នាប្រើរទេះរុញឬអូសដែលជាប្រដាប់លេងរបស់កូនក្មេង កន្ត្រក់ដាក់ខោអាវ កន្ត្រក់ដាក់អីវ៉ាន់តាមផ្សារ ធ្នើររុញដាក់អីវ៉ាន់តាមផ្ទះ និងខ្សែរុំជាប់សៀវភៅដើម្បីស្ពាយពីក្រោយខ្នងជាដើម។

ចំពោះសកម្មភាពទាំងនេះ ត្រូវបានគេថតឡើងនិងយកទៅបង្ហោះចែកចាយលើបណ្ដាញសង្គម Tik Tok ដោយទទួលបានការចុចចូលទស្សនាជាង៣លានដងផងដែរ៕

ប្រភព: Daily Mail

សូមទស្សនារូបភាពនិងវីដេអូខាងក្រោម៖