អុញ! ម្ចាស់បារ៍រូបនេះស៊យធំ ត្រូវភ្ញៀវម្នាក់ប្ដឹង និងឈ្នះក្ដីបានប្រាក់៥.៥លានដុល្លារអាមេរិក

តិចសាស់៖ បុរសម្នាក់មកពីរដ្ឋតិចសាស់ នៃសហរដ្ឋអាមេរិក និងធ្លាប់មានប្រវត្តិនៃការចាប់ខ្លួនពីបទស្រវឹងជាសាធារណៈ បានឈ្នះបណ្ដឹងដែលរឿងហេតុបានកើតឡើងតាំងពីជាងពីរឆ្នាំមុនម៉្លេះ។ នេះបើយោងតាមការចុះផ្សាយពីសារព័ត៌មានអន្ដរជាតិ Daily Mail នៅព្រឹកថ្ងៃនេះ។

តាមប្រភពព័ត៌មានបានឲ្យដឹងដែរថា កាលពីខែឧសភា ឆ្នាំ២០១៩ លោក Daniel បានចូលបារ៍មួយកន្លែង និងបង្កឲ្យមានជម្លោះជាមួយអតិថិជនដូចគ្នា រហូតឈានដល់ការវាយប្រតប់ ហើយគាត់ក៏បានរបួសត្រង់ក្បាលយ៉ាងធ្ងន់ធ្ងរផងដែរ។ ទន្ទឹមនឹងនេះ មេធាវីរបស់គាត់ បានចោទប្រកាន់ទៅកាន់ម្ចាស់បារ៍ផ្ទាល់ ដោយលើកឡើងថា ម្ចាស់បារ៍បានបន្ដការបម្រើគ្រឿងស្រវឺងលើសលុបទៅដល់ភាគីសងខាង និងបណ្ដោយឲ្យភាគីទាំងពីរចាកចេញពីបារ៍ ទាំងដែលស្រវឹងខ្លាំងទៀត។ ហើយបន្ថែមពីនេះទៀត នៅពេលឃើញអតិថិជនរបួសក្បាលដូច្នេះ ក៏មិនទូរសព្ទទៅកាន់រថយន្ដសង្គ្រោះបន្ទាន់ផងដែរ។

យ៉ាងណាមិញ លោក Daniel បានដាក់ពាក្យបណ្ដឹងនៅខែឧសភា ឆ្នាំ២០២១កន្លងទៅនេះ ហើយលុះមកដល់ចុងខែកក្កដា ខាងតុលាការបានសម្រេចឲ្យគាត់ឈ្នះបណ្ដឹង និងទទួលបានប្រាក់ចំនួនសរុប៥.៥លានដុល្លារអាមេរិក ក្រោយពីម្ចាស់បារ៍មិនព្រមបង្ហាញខ្លួននៅតុលាការ។ បើទោះជាយ៉ាងណាក៏ដោយ ម្ចាស់បារ៍មាន​រយៈពេលបីខែ ក្នុងការប្ដឹងឧទ្ធរណ៍ចំពោះសេចក្ដីសម្រេចនេះផងដែរ៕

ប្រភព: Daily Mail / Odditycentral

សូមទស្សនារូបភាពខាងក្រោម៖