គួរឱ្យសោកស្តាយ! ភ្លើងឆេះព្រៃនៅអូស្រ្តាលី បានបំផ្លាញទាំងសម្បត្តិបេតិកភណ្ឌពិភពលោក

កង់បេរ៉ា៖  ភ្លើងឆេះព្រៃនៅប្រទេសអូស្រ្តាលី បានបំផ្លាញកោះខ្សាច់ដល់ធំជាងគេ ( Fraser island ) នៅលើពិភពលោក ស្ទើតែ ៤០% ដែលវាជាសម្បត្តិបេតិកភណ្ឌពិភពលោក ដោយបានចុះបញ្ជី​ក្នុងអង្គការយូណេស្កូនៅក្នុងឆ្នាំ ១៩៩២។

មន្ត្រីគ្រប់គ្រងគ្រោះអគ្គិភ័យ លោក James Haig បានប្រាប់ទៅកាន់កាសែត AFP​ ថា រុក្ខជាតិនៅលើកោះ​ Fraser គឺមានសភាពស្ងួតខ្លាំង ហើយដោយសារតែភាពស្ងួតនេះ បូករួមជាមួយការប្រែប្រួលនូវអាកាសធាតុ និងសីតុណ្ហភាពក្តៅខ្លាំងវា​អាចនឹងបង្កជាភ្នក់ភ្លើងកាន់តែខ្លាំងឡើង។

ហើយដោយសារតែ​អគ្គិភ័យបានឆាបឆេះកាន់តែខិតជិតមកដល់ទីលំនៅក្នុងប៉ុន្មានថ្ងៃថ្មីៗនេះ អាជ្ញាធរបាន ហាមឃាត់ភ្ញៀវទេសចរ ពីការធ្វើដំណើរទៅកាន់គោលដៅឈប់សម្រាកមួយនេះ និងបិទសេវាកម្មជិះកាណូត រហូតដល់មានការជូនដំណឹងបន្ថែមទៀត។

គួរជម្រាបផងដែរថា ភ្លើងឆេះព្រៃនៅក្នុងឆ្នាំ ២០១៩ ដល់ ២០២០ ត្រូវបានគេមើលឃើញថា វាឆេះរាលដាលលើផ្ទៃដី ២៤ លានហិកតា​ ហើយបានបំផ្លាញផ្ទះ ៣ពាន់ខ្នង សម្លាប់សត្វជាង ៣ ពាន់លានក្បាល និងបានសម្លាប់មនុស្សយ៉ាងហោចណាស់ ៣៣ នាក់ នៅប្រទេសអូស្ត្រាលី៕