តើអ្នកដឹងទេ? លោក ចូ បៃដិន នឹងក្លាយជាប្រធានាធិបតីទី៤៦ ដែលមានវ័យចំណាស់ជាងគេបំផុត នៅក្នុងប្រវត្តិសាស្ត្រអាមេរិក

អាមេរិក៖ លោក ចូ បៃដិន បានយកឈ្នះលោក ដូណាល់ ត្រាំ ហើយនឹងក្លាយជាប្រធានាធិបតីវ័យចំណាស់ជាងគេបំផុត ក្នុងប្រវត្តិសាស្ត្ររបស់អាមេរិក ដែលកាលពីមុនប្រធានាធិបតីវ័យចំណាស់ជាងគេ បានទៅលើលោក រ៉ូណាល់ រីហ្គែន។ ប្រធានាធិបតីជាប់ឆ្នោត លោក បៃដិន នឹងឈានចូលវ័យ៧៨ឆ្នាំ នៅថ្ងៃទី២០ ខែវិច្ឆិកា ដោយរូបលោកបានកើតនៅក្នុងឆ្នាំ១៩៤២ នៅសម័យសង្គ្រាមលោកលើកទី២។

កាលពីមុន លោក រ៉ូណាល់ រីហ្គែន គឺជាប្រធានាធិបតីអាមេរិក ដែលមានវ័យចំណាស់ជាងគេ ដែលមានអាយុ៧៧ឆ្នាំ នៅពេលគាត់លាលែងពីតំណែង នៅឆ្នាំ១៩៨៩។ លោក បៃដិន នឹងក្លាយជាប្រធានាធិបតីចាស់ជាងគេ នៅថ្ងៃស្បថចូលកាន់តំណែង ថ្ងៃទី២០ ខែមករា ឆ្នាំ២០២១។

ចំពោះលោក ដូណាល់ ត្រាំ ក្នុងពេលបច្ចុប្បន្នមានអាយុ៧៤ឆ្នាំ ក៏ស្ថិតនៅក្នុងវ័យចំណាស់ផងដែរ ដែលធ្លាប់បានកាន់តំណែងជាប្រធានាធិបតីរបស់អាមេរិក។ គួរបញ្ជាក់ផងដែរថា លោក ត្រាំ​ មានអាយុ៧០ឆ្នាំ នៅថ្ងៃស្បថចូលកាន់តំណែង ថ្ងៃទី២០ ខែមករា ឆ្នាំ២០១៧។

ចំពោះប្រធានាធិបតីអាមេរិក ដែលមានវ័យចំណាស់ជាងគេបំផុត កាលពីមុន នៅថ្ងៃស្បថចូលកាន់តំណែង គឺលោក រ៉ូណាល់ រីហ្គែន មានវ័យ៦៩ឆ្នាំ នៅក្នុងឆ្នាំ១៩៨១។ ប្រធានាធិបតីដែលមានវ័យក្មេងជាងគេ បានទៅលើលោក Theodore Roosevelt ដែលមានវ័យ៤២ឆ្នាំ នៅក្នុងឆ្នាំ១៩០១ នៅពេលដែលលោកចាប់ផ្ដើមអាណត្តិដំបូងក្នុងចំណោម២អាណត្តិរបស់លោក នៅសេតវិមាន៕