អាមេរិកនឹងដាក់ពង្រាយនាវាល្បាត ដើម្បី​ប្រឆាំងនឹងការនេសាទចិនខុសច្បាប់ នៅសមុទ្រចិនខាងត្បូង

បរទេស៖ ខណៈពេលដែលស្ថានភាពតានតឹង រវាងអាមេរិកនិងចិនចេះតែបន្តឡើងកម្តៅ កាលពីថ្ងៃ​សុក្រសប្តាហ៍មុននេះ អាមេរិកបាននិយាយថា ខ្លួននឹងដាក់ពង្រាយនាវាល្បាតនៅតំបន់ភាគខាងលិចមហាសមុទ្រប៉ាស៊ីហ្វិក ដើម្បីប្រឆាំងនឹងសកម្មភាពរបស់ចិនក្នុងដែននេសាទ ដែលមានជម្លោះ​នៅសមុទ្រចិនខាងត្បូង។

ទីប្រឹក្សាសន្តិសុខជាតិអាមេរិក លោក រ៉ូបឺត អូប្រាយអិន ​បានចោទប្រកាន់ប្រទេសចិនពីបទ “ធ្វើការនេសាទខុសច្បាប់” ​ហើយថែមទាំងគំរាមកំហែង ដល់ទូកនេសាទ​របស់បណ្តាប្រទេសដ៏ទៃទៀតនៅក្នុងតំបន់។

នៅក្នុងសេចក្តីថ្លែងការណ៍មួយ លោក រ៉ូបឺត អូប្រាយអិន បានលើកឡើងថា ឆ្មាំ​សមុទ្រសហរដ្ឋអាមេរិក គឺកំពុងរៀបចំបញ្ជូននាវាល្បាតទៅដាក់តាម​ភូមិសាស្ត្រដែលបានកំណត់​ ដើម្បីជាការឆ្លើយតបឱ្យបានឆាប់រហ័យទៅសកម្មភាព​នានា នៅតំបន់​​ភាគខាងលិចមហាសមុទ្រប៉ាស៊ីហ្វិក។ សហរដ្ឋអាមេរិកតែងតែចោទប្រកាន់ចិនពីបទរំលោភច្បាប់អន្តរជាតិ ​តាមរយៈការបញ្ជូននាវាចម្បាំង​ទៅអមនាវានេសាទ​របស់ខ្លួន ហើយចូលក្នុងដែននេសាទរបស់ប្រទេសដទៃទៀត។

គួររម្លឹកដែរថា កាលពីខែកក្កដា រដ្ឋមន្រ្តីក្រសួងការពារជាតិសហរដ្ឋអាមេរិក លោក Mark Esper ក៏បានរិះគន់​ ចំពោះអាកប្បកិរិយាមិនល្អរបស់ចិននៅក្នុងសមុទ្រចិនខាងត្បូងកាលប៉ុន្មានខែមុន ​​ព្រមទាំង​ចោទប្រកាន់យោធាចិន ថាបានបាញ់ពន្លិចទូកនេសាទវៀតណាម ​និងរំខានដល់ការអភិវឌ្ឍប្រេងនិងឧស្ម័នរបស់ម៉ាឡេស៊ី ក៏ដូចជា​សកម្មភាពអមនាវានេសាទ​របស់ខ្លួន ចូលទៅក្នុងតំបន់សមុទ្រសេដ្ឋកិច្ចផ្តាច់មុខរបស់ឥណ្ឌូណេស៊ី៕