ម៉ូស្គូ៖ រដ្ឋមន្ត្រីការបរទេសរុស្ស៊ីលោក Sergei Lavrov បានឱ្យដឹងថា ប្រទេសអាមេនីនិងអាស៊ែបៃសង់ បានយល់ព្រមលើបទឈប់បាញ់គ្នានៅតំបន់ជម្លោះ ណាហ្គ័រណូការ៉ាបាក់ ដោយមានទាំងការដោះដូរអ្នកទោស និងសាកសពខ្មោចទាហានទៅវិញទៅមក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការព្រមព្រៀងលើបទឈប់បាញ់គ្នា រវាងអាមេនីនិងអាស៊ែបៃសង់ បានចាប់ផ្តើមឡើងនៅថ្ងៃសៅរ៍នេះ ហើយវាក៏ជាកិច្ចចរចាទំនាក់ទំនងការទូតលើកដំបូងរវាងគូសត្រូវទាំងពីរ ក្រោយពីមានការប្រយុទ្ធគ្នានៅតំបន់ផ្តាច់ខ្លួនការ៉ាបាក់ កាលពីថ្ងៃទី២៧ ខែកញ្ញា ដែលបណ្តាលឱ្យមនុស្សរាប់រយនាក់ស្លាប់និងរបួស។
លោករដ្ឋមន្ត្រី Lavrov ដែលជាអ្នកសម្របសម្រួលកិច្ចចរចារនៅទីក្រុងមូស្គូ បានប្រកាសបទឈប់បាញ់គ្នានៅម៉ោង ៣រំលងអាធ្រាត្រ បន្ទាប់ពីមានកិច្ចពិភាក្សាអស់រយៈពេល ១០ម៉ោង ជាមួយសមភាគីអាមេនីនិងអាស៊ែបៃសង់។ លោកក៏បានលើកឡើងដែរថា អាមេនីនិងអាស៊ែបៃសង់ បានយល់ព្រមចាប់ផ្តើមកិច្ចពិភាក្សា ស្តីពីការដោះស្រាយបញ្ហាជម្លោះទឹកដីនេះ។
ណាហ្គ័រណូ ការ៉ាបាក់ គឺជាតំបន់ដែលត្រូវបានទទួលស្គាល់ជាអន្តរជាតិ ថាជាផ្នែកមួយនៃប្រទេសអាស៊ែបៃសង់។ ប៉ុន្តែនៅកំឡុងសម័យសង្គ្រាមពេលដែលសហភាពសូវៀតបានដួលរលំនៅឆ្នាំ ១៩៩១ តំបន់នេះបានប្រកាសផ្តាច់ខ្លួនចេញអាស៊ែបៃសង់ ហើយបច្ចុប្បន្នស្ថិតនៅក្រោមការគ្រប់គ្រងរបស់ពលរដ្ឋអាមេនី។
គួររម្លឹកដែរថា ការប្រយុទ្ធគ្នាដ៏ខ្លាំងក្លាបំផុត រវាងអតីតសាធារណរដ្ឋសូវៀតទាំងពីរ គឺអាស៊ែបៃសង់និងអាមេនី កាលពីសម័យសង្គ្រាមឆ្នាំ ១៩៩១ ដល់ ១៩៩៤ បានសម្លាប់មនុស្សអស់ប្រហែល ៣០,០០០នាក់ ហើយត្រូវបានបញ្ចប់ទៅវិញដោយបទឈប់បាញ់គ្នា។ ប៉ុន្តែទោះបីជាយ៉ាងក្តី ការប៉ះទង្គិចគ្នាតិចតួចក៏នៅតែបន្តកើតមានម្តងម្កាល រហូតមកដល់បច្ចុប្បន្ន៕
Bong I.T