ថ្ងៃនេះឥណ្ឌាមានអ្នកស្លាប់ដោយជំងឺកូវីដ១៩ជាង១ពាន់នាក់

ញូដេលី៖ យោងតាមទិន្នន័យ​របស់ក្រសួងសុខាភិបាល​ឥណ្ឌាបានបង្ហាញ​ថា នៅថ្ងៃ​​សុក្រ ទី២៥ ខែកញ្ញា ​​ប្រទេសឥណ្ឌាបានរកឃើញអ្នក​ស្លាប់ដោយជំងឺកូវីដ១៩ថ្មីចំនួន ១,១៤១នាក់ និងអ្នកឆ្លងថ្មី ៨៦,០៥២នាក់ ដែលធ្វើឱ្យតួលេខអ្នកស្លាប់សរុបឡើងដល់ ៩២,២៩០នាក់ ខណៈអ្នកឆ្លងសរុប​កើនដល់ ៥.៨២លាននាក់។

​បច្ចុប្បន្នតំបន់ដែលរងគ្រោះដោយសារជំងឺកូវីដ១៩ ខ្លាំងបំផុតក្នុងប្រទេសឥណ្ឌា​ គឺស្ថិតនៅក្នុងរដ្ឋ Maharashtra ជាមួយ​ចំនួនអ្នកឆ្លង​ ១,២៦៣,៧៩៩នាក់​ និងអ្នកស្លាប់ ៣៣,៨៨៦នាក់ ចំណែករដ្ឋ Andhra Pradesh មានអ្នកឆ្លង ៦៤៦,៥៣០នាក់ និងអ្នកស្លាប់ ៥,៥០៦នាក់។  

គួរជម្រាបដែរថា នៅទូទាំងពិភពលោក ប្រទេសឥណ្ឌាមានចំនួនអ្នកឆ្លងកូវីដ១៩ខ្ពស់ជាងគេលំដាប់ទី២ តាមពីក្រោយសហរដ្ឋអាមេរិក ដែលមាន​អ្នកឆ្លងជំងឺ​ជាង ៧លាននាក់​ ​អមដោយចំនួនអ្នកស្លាប់ជាង ២០ម៉ឺននាក់៕