ចិន​ទទួលជោគជ័យក្នុងការបាញ់បង្ហោះ ផ្កាយរណបអង្កេតផែនដីថ្មីទៅកាន់គន្លង​តារាវិថី

ប៉េកាំង៖ យោងតាមរដ្ឋបាលជាតិអវកាសចិន ហៅកាត់ CNSA បានឱ្យដឹងថា ប្រទេសចិនបានទទួលជោគជ័យ ក្នុងបេសកកម្មបាញ់បង្ហោះផ្កាយរណបអង្កេតផែនដីថ្មីមួយ ដែលមានឈ្មោះថា Gaofen-9 05 ចេញពីមជ្ឈមណ្ឌលបាញ់បង្ហោះផ្កាយរណប ជីវក្វាន (Jiuquan) នៅភាគពាយព្យប្រទេសចិន​ កាលពីវេលាម៉ោង ១០:២៧នាទីព្រឹក (ម៉ោងនៅទីក្រុងប៉េកាំង) នាថ្ងៃអាទិត្យនេះ។

ផ្កាយរណប Gaofen-9 05 ត្រូវបានបាញ់បង្ហោះឡើងទៅ​កាន់​គន្លង​តារាវិថី តាមរយៈការប្រើប្រាស់រ៉ុក្កែត​ Long March-2D ហើយផ្កាយរណបនេះនឹងត្រូវបានប្រើប្រាស់ជាចម្បង សម្រាប់ការវាស់ស្ទង់ដីធ្លី ការធ្វើផែនការទីក្រុង ការរចនាបណ្តាញផ្លូវថ្នល់ ការប៉ាន់ស្មានទិន្នផលដំណាំ ការការពារនិងកាត់បន្ថយគ្រោះមហន្តរាយ ក៏ដូចជាការផ្តល់ព័ត៌មានសម្រាប់​គម្រោងសាងសង់​នៃគោលនយោបាយផ្លូវមួយខ្សែក្រវ៉ាត់មួយ។

គួរបញ្ជាក់ដែរថា ការបាញ់បង្ហោះផ្កាយរណបកាលពី​ព្រឹកថ្ងៃអាទិត្យនេះ គឺជាការបាញ់បង្ហោះផ្កាយរណបលើកទី៣៤៣ ​តាមរយៈការប្រើប្រាស់គ្រាប់រ៉ុក្កែតប្រភេទ Long March ៕