អុញ! ហ្វេសប៊ុកបានលុបការបង្ហោះរបស់លោក ត្រាំ ដែលថាកុមារមានភាពស៊ាំទៅនឹងជំងឺកូវីដ-១៩

អាមេរិក៖ ក្រុមហ៊ុនហ្វេសប៊ុកបានលុបចោលនូវការបង្ហោះ ចេញពីទំព័រហ្វេសប៊ុករបស់ប្រធានាធិបតី ដូណាល់ ត្រាំ ដោយសារតែការអះអាងមិនត្រឹមត្រូវពាក់ព័ន្ធនឹងជំងឺកូវីដ-១៩។ ការបង្ហោះគឺជាវីដេអូនៃបទសម្ភាសន៍ ដែលលោកប្រធានាធិបតីបានផ្ដល់ឲ្យស្ថានីយទូរទស្សន៍ Fox News នៅព្រឹកថ្ងៃពុធ។

អ្នកនាំពាក្យរបស់ហ្វេសប៊ុក លោក Andy Stone បាននិយាយនៅក្នុងសេចក្ដីថ្លែងការណ៍មួយនៅល្ងាចថ្ងៃពុធនេះថា វីដេអូនេះរួមបញ្ចូលទាំងការអះអាងមិនត្រឹមត្រូវ ដែលថាប្រភេទមនុស្សមួយក្រុមមានភាពស៊ាំទៅនឹងជំងឺកូវីដ-១៩។

លោក Stone បានបន្ថែមការបកស្រាយយ៉ាងជាក់លាក់ ដែលត្រូវបានអនុវត្តតាមច្បាប់ហ្វេសប៊ុក គឺថាលោក ត្រាំ បានផ្ដល់ព័ត៌មានមិនពិតទាក់ទងនឹងការស៊ាំទៅវីរុសនេះ៕