ទីភ្នាក់ងារសន្តិសុខជាតិ បានព្រមានដល់យោធាអាមេរិក លើការប្រើប្រាស់មុខងារទីតាំង ដែលអាចបង្កហានិភ័យមកលើប្រទេសជាតិ

អាមេរិក៖ ទីភ្នាក់ងារសន្តិសុខជាតិ (NSA) បានណែនាំយោធាអាមេរិក និងក្រុមស៊ើបការណ៍សម្ងាត់អាមេរិក ឲ្យមានការប្រុងប្រយ័ត្នបន្ថែមទៀត ដើម្បីការពារទិន្នន័យទីតាំងរបស់ពួកគេ។ ទីភ្នាក់ងារអះអាងថា ឧបករណ៍និងកម្មវិធីប្រមូលព័ត៌មានអាចបង្កការគំរាមកំហែង ដល់សន្តិសុខជាតិ។

ទីភ្នាក់ងារនេះបានបន្ថែមទៀតថា ទិន្នន័យទីតាំងមានតម្លៃខ្លាំងណាស់ ហើយត្រូវតែការពារ។ វាអាចបង្ហាញព័ត៌មានលម្អិតអំពីចំនួនអ្នកប្រើប្រាស់ នៅក្នុងតំបន់តែមួយ និងការផ្លាស់ប្ដូរទីតាំងរបស់អ្នកប្រើប្រាស់ផងដែរ ហើយវាអាចបង្ហាញពីទំនាក់ទំនងរវាងអ្នកប្រើប្រាស់និងទីតាំងនានា។ NSA ក៏បានព្រមានប្រឆាំងនឹងការប្រើប្រាស់ឧបករណ៍តាមដាន និងនាឡិកាវៃឆ្លាត (smartwatches) ផងដែរ។

នៅពេលនិយាយអំពីវិធីការពារ ទីភ្នាក់ងារមានការផ្ដល់យោបល់ដូចគ្នាជាច្រើន ដែលអ្នកប្រើប្រាស់អាចស្វែងរកបានតាមរយៈអ៊ីនធឺណេត។ អ្នកប្រើប្រាស់គ្រាន់តែបិទមុខងារទីតាំង នៅពេលមិនចាំបាច់ និងអនុញ្ញាតឲ្យឧបករណ៍ដំណើរការលើមុខងារកាន់តែតិច។ ទីភ្នាក់ងារក៏បានប្រាប់ដែរថា ឲ្យអ្នកប្រើប្រាស់បិទមុខងារស្វែងរកទីតាំងឧបករណ៍ដែលជ្រុះបាត់ ឬភ្លេចកន្លែងដាក់ផងដែរ៕