ប្រធានាធិបតីហ្វីលីពីន បង្គាប់ឱ្យបិទទ្វារ​ក្រុងនិងខេត្តមួយចំនួនជាថ្មី​ ក្រោយករណី​ឆ្លងកូវីដ១៩កើនឡើងខ្លាំង

ម៉ានីល៖ ប្រធានាធិបតីហ្វីលីពីនលោក  រ៉ូឌ្រីហ្គោ ឌូតឺតេ (Rodrigo Duterte) បានធ្វើការប្រកាស​កាលពីព្រឹកថ្ងៃច័ន្ទនេះថា ប្រទេសហ្វីលីពីននឹងរៀបចំឡើងវិញនូវ​វិធានការបិទទីក្រុងម៉ានីល និងខេត្តជុំវិញមួយចំនួនទៀត រយៈពេលពីរសប្តាហ៍គិតចាប់ពីថ្ងៃអង្គារតទៅ ខណៈប្រទេសនេះកំពុងព្យាយាមទប់ស្កាត់​ករណីឆ្លង ដែលរហូតមក​ទល់ពេលនេះ បានកើនឡើង​ដល់ជាង ១០ម៉ឺនករណី៕

អ្នកនាំពាក្យ​លោក Harry Roque បានប្រាប់អ្នកយកព័ត៌មានថា លោកប្រធានាធិបតី ឌូតឺតេ បានយល់ព្រម​ចំពោះវិធានការ​បិទ​ទីក្រុងម៉ានីល និងខេត្តជិតៗមួយចំនួនទៀត​ ដូចជា ខេត្ត Laguna, Cavite, Rizal និងខេត្ត Bulacan ដោយគិត​ចាប់ពីថ្ងៃទី ៤ ខែសីហា រហូតដល់ថ្ងៃទី ១៨ ខែសីហា។

សូមជម្រាបផងដែរ ​បើគិតមកត្រឹមថ្ងៃនេះ ប្រទេសហ្វីលីពីនមានអ្នកស្លាប់ ដោយជំងឺកូវីដ១៩​ចំនួន  ២,១០៤នាក់ ក្នុងចំណោមអ្នកឆ្លងសរុប ១០៦,៣៣០នាក់។ ហើយចំពោះចំណាត់ការបិទទ្វារទីក្រុងជាថ្មីនេះ ត្រូវ​គេមើលឃើញថា វានឹងផ្តល់ផលប៉ះពាល់ដល់ប្រជាជនប្រមាណ ២៥លាននាក់ ដែលប្រហែលមួយភាគបួននៃចំនួនប្រជាជនហ្វីលីពីនសរុបជាង ១០០លាននាក់៕