ស្ថានការណ៍ក្នុងប្រទេសប្រេស៊ីល កាន់តែអាក្រក់ ដោយសារជំងឺកូវីដ-១៩បានសម្លាប់មនុស្សកាន់តែច្រើន រីឯការឆ្លងផ្ទុះឡើងកាន់តែខ្ពស់

ប្រេស៊ីល៖ ប្រទេសប្រេស៊ីលបានក្លាយជាប្រទេសទី២ ដែលបានកត់ត្រាចំនួនអ្នកស្លាប់ជាង៥០,០០០នាក់ ដោយសារជំងឺកូវីដ-១៩ បន្ទាប់ពីសហរដ្ឋអាមេរិក។

ព្រឹត្តិការណ៍ដ៏គួរឲ្យកត់សម្គាល់នេះកើតឡើងប៉ុន្មានថ្ងៃ បន្ទាប់ពីប្រទេសនេះបានបញ្ជាក់ថា មានការឆ្លងវីរុសកូរ៉ូណាច្រើនជាងមួយលាននាក់។ ប៉ុន្តែអ្នកជំនាញនិយាយថា ចំនួនពិតប្រាកដគឺខ្ពស់ជាងនេះ ដោយសារកង្វះការធ្វើតេស្ដ និងការឆ្លងកំពុងផ្ទុះឡើងកាន់តែខ្ពស់។

ទន្ទឹមនឹងនេះ ក្រុមអ្នកប្រឆាំងនឹងរដ្ឋាភិបាលកំពុងចោទប្រកាន់លោកប្រធានាធិបតីប្រេស៊ីល Jair Bolsonaro ផងដែរ។ លោក Bolsonaro ក៏បានរងការរិះគន់យ៉ាងខ្លាំង ទៅលើការឆ្លើយតបរបស់លោក ចំពោះការផ្ទុះឡើងនៃវីរុសកូរ៉ូណា។ គាត់បានប្រឆាំងនឹងការបិទប្រទេស និងមិនយល់ស្របចំពោះការផ្ដល់យោបល់ពីក្រសួងសុខាភិបាល នៃរដ្ឋាភិបាលរបស់គាត់។

កាលពីថ្ងៃអាទិត្យ ក្រសួងសុខាភិបាលបានប្រកាសថា មានអ្នកស្លាប់ចំនួន៦៤១នាក់បន្ថែមទៀត ដែលត្រូវបានចុះបញ្ជីក្នុងរយៈពេល២៤ម៉ោងកន្លងមក ហើយបានធ្វើឲ្យចំនួនអ្នកស្លាប់នៅទូទាំងប្រទេសកើនដល់ ចំនួន៥០,៦១៧នាក់។ ក្នុងរយៈពេលដូចគ្នានេះដែរ គេក៏បានរកឃើញអ្នកឆ្លងថ្មីចំនួនជាង១៧,០០០នាក់។

ចំណែកនៅសហរដ្ឋអាមេរិក ស្ថានការណ៍ក៏នៅតែអាក្រក់ ដោយមានករណីឆ្លងជាង២.២លាននាក់ និងជិត១២០,០០០នាក់បានស្លាប់៕