កីឡាករនៅ Premier League ម្នាក់នេះ បានប្រាប់មិត្តភក្ដិរបស់ខ្លួនថា ចង់ផ្លាស់ទៅចូលរួមជាមួយក្រុមលោក Mourinho

អង់គ្លេស៖ ខ្សែបម្រើប្រយុទ្ធក្រុម Bournemouth កីឡាករ Ryan Fraser ត្រូវបានគេរាយការណ៍មកថា មានបំណងចង់ផ្លាស់ទៅចូលរួ​មជាមួយនឹងក្រុម Tottenham Hotspur ដែលបច្ចុប្បន្នកំពុងដឹកនាំដោយ អ្នកចាត់ការទូទៅសញ្ជាតិព័រទុយហ្កាល់លោក Jose Mourinho។

កុងត្រារបស់ Fraser នៅកីឡដ្ឋាន Vitality Stadium នឹងផុតកំណត់នាដំណាច់ខែមិថុនាខាងមុខនេះ ដូច្នេះមានន័យថា ក្លិបផ្សេងៗអាចចូលចែចូវយកខ្សែបម្រើវ័យ២៦ឆ្នាំ ដោយមិនមានតម្លៃខ្លួន នៅរដូវកាលក្រោយ។

ជាក់ស្ដែងយោងតាមសេចក្ដីរាយការណ៍ ក្លិបយក្ស២នៅ Prmier League រួមមានក្រុមហង្សក្រហម Liverpool និង កាំភ្លើងធំ Arsenal សុទ្ធតែដាក់គោលដៅមកលើខ្សែបម្រើប្រយុទ្ធជម្រើសជាតិស្កុតឡេនរូបនេះ។

យ៉ាងណាមិញរបាយការណ៍របស់កាសែត Football Insider បានបញ្ជាក់ថា Fraser បានប្រាប់មិត្តភក្ដិរបស់គេ ថាគេមានចំណាប់អារម្មណ៍ផ្លាស់ទៅចូលរួមជាមួយក្រុមមាន់ខ្នាយមាស Spurs។

គួរឲ្យដឹងដែរថា សម្រាប់រដូវកាលនេះ មុនពេលក្លិបផ្អាកសកម្មភាពប្រកួតដោយសារជំងឺកូវីដ១៩ Fraser រកបានតែ១គ្រាប់ប៉ុណ្ណោះឲ្យក្រុមលោក Eddie Howe។​ ដោយឡែកកាលពីរដូវកាលមុន គេបង្ហាញទម្រង់លេងបានល្អ ដោយរកគ្រាប់បាល់ឲ្យ Bournemouth បាន៧គ្រាប់ និងបញ្ជូនបាល់ឲ្យមិត្តរួមក្រុមសម្រចទីបាន១៤ដង៕

ប្រភព៖ Sportsmole